Mazimuriyaa 144

S'oonuwaa Mazimuriyaa

Daawite s'aafeeddawaa

1Med'inaa Goday, ta zaallay galatetto! I ta kushiyaa olaw,

ta birad'd'etuwaakka tooraw loohissee.

2I taana siik'iyaa S'oossaanne ta geessuwaa;

I ta miis'aanne taana ashshiyaawaa.

I ta gonddalliyaanne taani bak'ataade attiyaa sa'aa.

Kawutetsatuwaa I taw moodissiyaawaa.

3Abeet Med'inaa Godaw,

neeni aw k'oppiyaa Asay I ayee?1

Neeni naagetiyaa asaa na'ay ayee?

4Asay itti gede c'arkkiyaa c'arkkuwaa mala;

Aa gallassatukka aad'd'iyaa kuwaa mala.

5Abeet Med'inaa Godaw, ne saluwaa daakaade duge wod'd'a!

Wogga deretuwaa bochcha; unttunttukka c'uwattino!

6Walk'k'antsaa yeddaade ne morkkatuwaa laala!

Ne wonddaafiyaa pootsaa yeddaade unttuntta yederssa!

7Bollaanna ne kushiyaa duge yeddaade,

taana c'iimmo haatsatuwaappe goochchaade kessa;

allaga asatuwaa kushiyaappe taana wotsa akka.

8Unttunttu tumuwaa haasayikkino,

C'aak'k'iiddekka wordduwaa haasayiino.

9Abeet S'oossaw, taani

new ooratsa yetsaa yes's'ana;

tammu bak'etsaan waas'etteedda diitsaan new diis's'ana.

10Kaatetoo s'oonuwaa immaasa;

ne k'oomaa Daawita ashshaasa.

11Taana iitaa mashshaappe ashshaasa;

allaga asatuwaa kushiyaappe taana wotsa akka.

Unttunttu tumuwaa haasayana giide c'aak'k'iiddekka,

wordduwaa haasayiino.

12Nu attuma naanatuu,

barenttu yalagatetsan dolk'k'idolk'k'iide,

dic'c'iyaa mitsaa mala gidino.

Nu mac'c'a naanatuukka kaatiyaa golliyaa zooziyaan,

alleek'k'oo esseedda tuuk'iyaa mala gidino.

13Nu diyyetuu,

daro dumma dumma k'ommo katsaan kumino;

nu dembbatuwaan de'iyaa dorssatuu sha"aa,

tammu sha"aa yelino.

14Nu miizzatuu birassino;

unttunttu sal"eesenan yelettiide c'orattino.

Nu ogetuwaan dagama waasuu sisettoppo.

15Ha yewuu tumu haniyaa asatuu,

anjjetteeddawantta.

Unttunttu S'oossay Med'inaa Godaa gidiyaa asatuu

anjjetteeddawantta.