Mazimuriyaa 125

S'oossay Bare Asaw Waase

Pudetsaa kesiidde yes's'eedda yetsaa

1Med'inaa Godaan ammanettiyaawanttu k'aas's'anaw danddayenna,

med'inaw de'iyaa S'iyoone deriyaa mala.

2Deretuu

Yerusaalame katamaa yuushshuwaan de'iyaawaadan,

hachcheppe med'inaa gakkanaw,

Med'inaa Goday bare asaa yuushshuwaan de'ee.

3S'illotuu barenttu kushshiyaa iitatetsaw dentsenna mala,

iitatuwaa ayissuwaa s'am"ay,

s'illotoo imetteedda biittaa bollan gam"enna.

4Abeet Med'inaa Godaw, keeka asatoonne,

wozanaa suure asatoo keekkabaa ootsa.

5Barenttu geella ogiyaa simmiyaawantta,

Med'inaa Goday iitaa ootsiyaawanttuna ittippe mura.

Israa'eeliyaw saruu gido!