Mazimuriyaa 108

Wontta Sabaanne Galataa

Daawita mazamuriyaa, yetsaa

1Abeet S'oossaw, ta wozanay minniide de'ee.

Taani new ta kumentsaa wozanaappe yes's'ananne neena sabbana.

2Diitsawunne maasink'k'oo beegottite!

Taanikka wontta guuraanna beegottana.

3Abeet Med'inaa Godaw, taani neena asaa giddon galatana;

k'ay kawutetsaa giddon neena sabbana.

4Ayaw gooppe, aggena ne siik'uu wolk'k'aama;

saluwaappe bollaw aad'd'ee.

Ne tumatetsaykka bolla shaariyaadan d'ok'k'ee.

5Abeet S'oossaw, salotuwaappe bollaanna

d'ok'k'u d'ok'k'u ga!

Ne bonchchuu sa'aa ubbaa bolla gido.

6Neeni siik'iyaawanttu attana mala,

ne ushechcha kushiyan nuuna ashsha;

neeni taw alla.

7S'oossay bare geeshsha sa'aan hawaadan yaageedda;

«Taani s'oonaade Sekeema biittaa shaakkana;

k'ay Sukkoota zanggaaraa gishana.

8Gala'aade tawaa; Minaasekka taassa;

Efireemi ta huup'iyaa ashshiyaa k'oobiyaa;

Yihuday ta kawutetsaa s'am"aa.

9Moo'aabe taani meec'ettiyaa kuyis'aaruwaa;

Eedoomi tawaa gidiyaawaa erissanaw

ta c'aammaa Aa bolla wotsay.

Taani Piliss's'eema s'oonaade gereeray» yaageedda.

10Gimbbetteedda katamaakko, taana oonee afanawe?

Eedooma gakkanaw taana oonee kaaletsanawe?

11Abeet S'oossaw, nuuna aggeedawe neena gidikkii?

Abeet S'oossaw, neeni nu tooranchchatuwaanna olaw kesakka.

12Asaa maaduu patsenna diraw,

morkkiyaanna olettanaw neeni nuuna maadda.

13S'oossaa wolk'k'an nuuni nu morkkatuwaa s'oonana;

nu morkkatuwaa yed'd'anawe Aa.