Hizik'k'eela 19

Israa'eeliyaa Daannatuwaa Zilaassaa

1S'oossay Hizk'k'eela, «Israa'eeliyaa kaappatoo hawaadan yaagaade zilaala;

2«Hintte aata gaammotuwaa giddon,

iza ayiba gaammatii!

Yalaga gaammotuwaa giddon gisaade,

bare maratuwaa dichchaaddu.

3Iza bare maratuwaappe ittuwaa dichchina,

wodalla gaammuwaa keseedda.

I shankkaa tamaariide, asaa meedda.

4Kawutetsatuu ubbay aabaa sisiide,

ollaan geliide oyk'k'eteedda.

Unttunttu Aa maaggan goochchiide,

Gibs'e biittaa afeeddino.

5«Aa aata naagowe polettennaan is's'ina,

hidootay d'ayeeddawaa be'aade,

bare maratuwaappe laa"entsuwaa dichchaade,

wodalla gaammuwaa kessaaddu.

6I wodalla gaammuwaa gidiide,

hara gaammotuwaa giddon,

yaanne haanne simeretteedda.

I shankkaa tamaariide, asaa meedda.

7I unttunttu wolk'k'aama geessuwaa mentsereetsiide,

katamaakka bayzzeedda.

Biittaynne biittan de'iyaa Asay ubbay,

Aa gudetsan shabbiretteedda.

8Yuushshuwaan de'iyaa kawutetsatuu ubbay,

Aa oyk'k'anaw p'iriyaa yeggeeddino.

Barenttu gitiyaakka mic'c'eeddino;

barenttu ollaan Aa oyk'k'eeddino.

9Unttunttu barenttu maaggaan Aa goochchiide,

kootsaadan giigeedda guutsa golliyaan yeggiide,

Baabloone kaatiyaakko afeedino.

Laa"entso Aa gudetsay Israa'eeliyaa deretuwaan sisettennaadan,

unttunttu Aa k'asho golliyaa gelisseeddino.

10« ‹Ne aata haatsaa doonaan,

toketteedda woyniyaa turaa mala.

Daro haatsay de'iyaa diraw,

he woyniyaa turay ayifiyaa dars's'as's'i utteedda;

k'ay daro daashana de'ee.

11Aa maratuwaappe minniyaawe,

mooddiyaawanttu s'am"aa gideedda.

Aa maray wolk'k'aama maratuwaappe aduk'k'iide,

bollaw aad'd'eeda.

Bare maratuwaa c'oratetsaaninne

d'ok'k'atetsan bollaanna beetteedda.

12Shin he turay hank'k'uwaan shodettiide,

biittan oletteedda.

Away doliyaa c'arkkuu Aa ayifiyaa melissina k'ok'ofetteedda;

Aa mino tashii melina, tamay meedda.

13Ha"i k'ay I haatsi bayinna,

mela biittan toketteedda.

14Tamay Aa maratuwaappe ittuwaa oyk'k'iide,

Aa ayifiyaanakka dippi ootsiide meedda.

Yaatina, kawutetsaa s'am"aa gidiyaa,

ay mino maraykka Aa bollan attibeena.

« ‹Hawe yeekuwaa zilaassaa; hawaa zilaassaadan go'ettanaw bessee› yaaga» yaageedda.