Dawro Full Bible Ethiopic
ዛካራሳ 8
የሩሳላመ ኦራጻና
ኡባፐ ዎልቃማ መና ጎዳ ቃላይ ቃይካ ታኮ፥ ሀዋዳን ያጊድ ዬዳ፤ “ኡባፐ ዎልቃማ መና ጎዳይ፥ ‘ታን ጽዮንዉ ሎይ ምሸታይ፤ ታና እ ምሹ ጹጌ’ ያጌ። መና ጎዳይ ሀዋዳን ያጌ፤ ‘ታን ጽዮነ ስማና፤ የሩሳላመ ግዶን ደአና። ቃይ የሩሳላመካ አማነትያ ካታማ ጌተታና፤ ኡባፐ ዎልቃማ መና ጎዳ ደሪ ቃይ ጌሻ ደርያ ጌተቲደ ጼሰታና’ ያጌ።
“ኡባፐ ዎልቃማ መና ጎዳይ ሀዋዳን ያጌ፤ ‘ጭሚደ ጉፍያን ብያ አቱማ አሳይነ ማጫ አሳይ ካሰዋንቱዋዳን ቃይካ የሩሳላመ ዳባባን ኡታና። የሩሳላመ ካታማ ኦገቱ ካሳ ካእያ አቱማ ናናቱዋንነ ማጫ ናናቱዋን ኩማና’ ያጌ። ኡባፐ ዎልቃማይ መና ጎዳይ፥ ‘ሀዌ ሀቃ አሳፐ አቴዳዋንቶ ማላልስያባ ግዶፐነ፥ ታዉ ማላልስያባ ግደና’ ያጌ ኡባፐ ዎልቃማይ መና ጎዳይ። ኡባፐ ዎልቃማይ መና ጎዳይ ሀዋዳን ያጌ፤ ‘በእተ፥ ታን ታ አሳ አዋይ ዉልያ ባጋ ቢታፐነ አዋይ ዶልያ ባጋ ጋድያፐ አሻና። ኡንቱንቱ የሩሳላመ ግዶን ደአናዳን አሀና። ኡንቱንቱ ታ አሳ ግዳና፤ ታንካ ኡንቱንቱ ጾሳ፥ አማነትያነ ጽሎ ጾሳ ግዳና’ ያጌ” ያጊድ ዬዳ።
ኡባፐ ዎልቃማ መና ጎዳይ ሀዋዳን ያጌ፤ “ህንተኖ፥ ኡባፐ ዎልቃማ መና ጎዳ ጌሻ ጎልያ ባሱዋ ባስያ ጋላሳፐ ዶሚደ፥ ትምቢትያ ኦድያዋንቱ ኦዴዳ ቃላ ስሴዳዋንቶ፥ ህንተ ኩሽያ ምንሲደ ፖልተ። አያዉ ጎፐ፥ ሄ ጋላሳቱዋፐ ካሰ ባጋን አሳዉ ድርጉ ባዋ፤ መህያዉካ ከራ ጭጋይ ባዋ፤ ቃይ ታን አሳ ኡባ እቱዋ እቱዋ ቦላ ሞርከተን ደን ዎዳ ድራዉ፥ ገልያዋዉነ ከስያዎ ሳሩ ባዋ። ሽን ሀእ ታን ሀ አሳፐ አቴዳዋንታ ካሰ ኦዳዋዳን ኦከ። ታን ኡባፐ ዎልቃማ መና ጎዳይ ሀዋ ኦዳይ።
“ኡንቱንቱ ባረንቱ ዘረ ሳሩዋን ዘራና፤ ኡንቱንቱ ዎይንያ ቱራይካ ባረ አይፍያ አይፋና፤ ቢታይካ ካ ዳርሲደ ሞካና፤ ሳሎቱካ እራ ቡካና። ሀ አሳፐ አቴዳዋንቶ ታን ሀ ኡባ አንጁዋ እማና። ህንተኖ ይሁዳ አሳቶ፥ ህንተኖ እስራኤልያ አሳቶ፥ ካዉተቱዋ ግዶን ህንተ ሸቀቴዳዋንታ ግዲደ ደኤድታ፤ ሽን ሀእ ታን ህንተና አሻና፤ ህንተካ አንጀቴዳዋንታ ግዳና። ያዮፕተ! ህንተ ኩሽያካ ምንስተ!” ያጌ።
ኡባፐ ዎልቃማ መና ጎዳይ ሀዋዳን ያጌ፤ “ህንተ ማይዛ አዎቱ ታና ሀንቀዳ ዎደ፥ ኡንቱንቱ ቦላን ኢታባ አሀና ጋደ ቃቼዳ ቆፋ ላመናን ኦዳዋዳን፥ ሄዋዳንካ ሀእ ታን የሩሳላመዉነ ይሁዳዉ ሎኦባ ኦናዉ ቆፋ ቃቻድ። ስም ያዮፕተ! ህንተ ኦናዉ ኮሽያዌ ሀዋንታ: እቱ እቱዋና ቱሙዋ ሃሳይተ፤ ህንተ ፕርዳ ጎልያንካ ቱሙዋነ ሳሩዋ አህያ ፕርዳ ፕርድተ፤1 እቱ እቱዋ ቆሀናዉ ኢታባ ህንተ ዎዛናን ማቀቶፕተ፤ ዎርዱዋን ጫቂያዋ ዶሶፕተ። ሄዋንታ ኡባ ታን መና ጎዳይ እጻይ” ያጌ።
ኡባፐ ዎልቃማ መና ጎዳ ቃላይ ቃይካ ታኮ፥ ሀዋዳን ያጊድ ዬዳ፤ “ኡባፐ ዎልቃማ መና ጎዳይ ሀዋዳን ያጌ፤ ‘ኦይደን፥ እቼሸን፥ ላፑንነ ታማን አግናቱዋን ህንተ ጾሜዳ ጾማቱ ይሁዳ አሳዉ ፓሽክስያ ዎደነ ናሸችያ ግብራ ግዳናዋ። ሄዋ ድራዉ፥ ህንተ ቱማተነ ሳሮተ ዶስተ’ ያጌ።
“ኡባፐ ዎልቃማ መና ጎዳይ ሀዋዳን ያጌ፤ ‘አሳይ፥ ኡባ ቃይ ዳሮ ካታማቱዋን ደእያ አሳይ ብሮ የሩሳላመ ያና። እት ካታማን ደእያ አሳይ ሀራ ካታማን ደእያ አሳኮ ቢደ፥ “መና ጎዳ አንጁ ያና ማላ ዎሳናዉነ ኡባፐ ዎልቃማ መና ጎዳ ኮያናዉ አነ ቤቶ፤ ታንካ ባይ” ያጋና። ቃይ ዳሮ አሳይነ ዎልቃማ ካዉተቱ ኡባፐ ዎልቃማ መና ጎዳ ኮያናዉነ ዎሳናዉ የሩሳላመ ያና’ ያጌ።
“ኡባፐ ዎልቃማ መና ጎዳይ ሀዋዳን ያጌ፤ ‘ሄ ጋላሳቱዋን ዱማ ዱማ ቃላን ሃሳይያ ካዉተቱዋ ኡባፐ ታሙ አሳቱ ዪደ፥ እት አይሁዳ ብታንያ ማዩዋ ማጫራ ኦይቂደ፥ “ጾሳይ ህንተናና ደእያዋ ኑን ስሴዳ ድራዉ፥ አነ ኑንካ ኔናና ቤቶ” ያጋና’ ያጌ” ያጊድ ዬዳ።
Source notes (1)
- Cross-reference ኤፈ. 4:25
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.