ቲቶ 3

ጾሳ አሳይ ኦያ ኦሱዋ

1-2ኡንቱንቱ ሞድያዋንቶነ ማታይ ደእያዋንቶ ሞደታናዉ፥ አዛዘታናዉነ ሎኦ ኦሱዋ ኡባ ኦናዉ ጊገታናዳን ኡንቱንታ ሀሳይሳ፤ ቃይ ኡንቱንቱ ኦ ቦላንነ ኢታ ቃላ ሃሳየና ማላ፥ ኦናናነ ዋላቀተና ማላ፥ አሳ ኡባ አሽከተነ ስጋተ በስያዋንታ ግዳናዳን ዞራ። 3አያዉ ጎፐ፥ ኑን ካሰ ኑ ሁጰዉካ ኤያቱዋ፥ አዛዘተናዋንታ፥ ባልያዋንታነ አሞነ ዱማ ዱማ ናሸቻዉ አይልያዳን ሞደትያዋንታ፤ ቃይ ኢታተንነ ቃናትያን ደእያዋንታ፤ አሳን እጸትያዋንታነ እቱ እቱዋካ እጽያዋንታ። 4ሽን ኑና አሽያ ጾሳ ኬካተይነ አሳ እ ሲቅያ ሲቁ ቆንጬዳ ዎደ፥ 5እ ባረ ማሮተዳንካ፥ ኦራ የለቱሳን ሀኔዳ ጌዩሳንነ ጌሻ አያናን ኦራጼዳዋን ኑና አሼዳዋፐ አትን፥ ኑን ጽሎ ኦሱዋ ኦዳዋና ግደና። 6-7ጾሳይ ባረ አ ኬካተን ኑን ጽላናዳንነ፥ እ እማና ጌዳ መና ደኡዋ ላታናዳን፥ ኑና አሽያ የሱስ ክርስቶሳ ባጋና ጌሻ አያና ኑ ቦላ ዳርሲደ ትጌዳ። 8ሀ ሃሳያይ አማነቴዳዋ፤ ጾሳ አሳቱ ሎኦ ኦሱዋ ኦናዉ ጊጋናዳን፥ ሀ የዉዋ ኡንቱንቶ ኔን ምንሳደ ኦዳናዉ ኮያይ፤ ሀዋንቱ አሳዉ ሎአነ ጎእያዋንታ። 9ሽን ኤያተ ፓሉማፐ፥ ዛርያ ፓይድያዋፐ፥ ዋላሳፐነ ህግያባን ዋላቀትያዋፐ ናገታ። አያዉ ጎፐ፥ ሄዋንቱ ጎኤናዋንታነ ማደናዋንታ። 10-11ሻኮተ መያ ኡራይ ጌላ አሳ ግድያዋነ ባረ ሁጲያን ፕርዲደ ናጋራ ኦያዋ ኤራደ፥ እት ገደ ዎይ ላኡ ገደ አ ሴሬዳዋፐ ጉይያን፥ ሄዋ ማላትያ አሳፐ ሻከታ።

ዉርሰ ዞርያ

12ታን አርጸማሳ ዎይ ትክቆሳ ኔኮ ኪትያ ዎደ፥ ኔን ታኮ ንቆጲልዮና ያናዉ ምና። አያዉ ጎፐ፥ ታን ባልጉዋ1 ያን ሻጫናዉ ቆፋ ቃቻድ። 13ህግያ ኤርያ ዜናስነ አጲሎስ ኦግያ ብያ ዎደ፥ ኡንቱንቶ አያይነ ፓጨና ማላ፥ ኡንቱንታ ሎይ ማዳ። 14ኑ አሳይካ ማደና አሳ ግዲደ አተና ማላ፥ ባረንታ ሎይ ኮሽያዋ ደማናዉ፥ ሎኦ ኦሱዋ ምኒደ ኦያዋ ታማርኖ።

15ታናና ደእያ ኡባቱ ኔና ሳሮ ሳሮ ጌድኖ። ኑና አማኑዋን ሲቅያዋንታ ሳሮ ሳሮ ጋ። ጾሳ አ ኬካተይ ህንተናና ኡባና እትፐ ግዶ። አመንእ።