Dawro Full Bible Ethiopic
ሲቁዋ ሳባ 4
ዎዳላይ:
ታ ሲቃቴ፥ ኔን አያ ማላንቻቲ! ኔን ዎታ ሎአይ!
ነ አይፈቱ ነ ሶምኡዋ ካምያ ሻርበ ግዱዋና በእያ ዎደ፥
ሀራጵያዳን ሎኢኖ።
ነ ብናናይ ጋላኣደ ደርያፐ ዎያ ዴሻ ዉድያ ማላ።
ነ አቻይ ሜደቲደ፥ ሃን ሜጨቴዳ ኡባይካ ማንትያ የልያ፥
ኡንቱንቱ ግዶን ማይኒ ባይና ዶርሳ ዉድያ ማላ።
ነ መተርሻቱ ዞኦ ቃጭና ማላ፤
ነ ሃሳይያ ዎደ ዳሮ ናሸቺኖ።
ነ ላኡ ጋጮቱዋ ሻርቢያ ግዱዋና ጼልያ ዎደ፥
እት ሮማንያ ላኡ ከስ ጳልቄዳዋ ማላቲኖ።
ነ ቆ ኦላ ሚሻ ካቃናዉ ግምቤዳ፥
ዳዊታ አዱሳ ግምቢያ ማላቴ፤
ሄ ግምቢ ሻኡ ምኖ ኦላንቻቱዋ ጎንዳሊ ካቀትና፥
አሌቀት ኡቴዳ።
ነ ንቱ ማንትያ የለቴዳ፥
ዎራ ጪሻ ግዶን ምያ ገንእያ ማራቱዋ ማላቲኖ።
ሶይዙዋ እትፐተ
(ስቁዋ 4:6—5:16)
ቃማይ ዎንታናዉ፥ ኩዋይ ክቻናዉ፥
ካርቢያ ደርያነ እጻና ዞዝያ ባደ ሸምፓሻና።
ታ ሲቃቴ፥ ነ አሳተይ ኡባይካ ማላንቻ፤
ኔናን ዎያዌ አያይነ ባዋ።
ታ ሙሹራቴ፥ ሊባኖሳ ደርያፐ ዎ።
ጋሙነ ማሂ ጌሱ አማና ደርያፐ፥
ሳኒራ ደርያፐነ ሄርሞነ ኪክያፐ ዎ።
ታ ሲቁዋ ምቻቶ ግድያ ታ ሲቃቴ!
ነ አይፍያ ጼሉነ ነ ቆያ አሌቁ፥
ታ ዎዛና ናሸቻን ጎሼዳ።
ታ ሲቁዋ ምቻቶ ግድያ ታ ሙሹራተ!
ነ ሲቁ ታና አያ ናሸቺ!
ነ ሲቁ ዎይንያ ኤሳፐ አ ናሸቼ፤
ነ ሽቱ ኡባባፐካ አደ ሳዌ።
ታ ሙሹራቴ፥ ነ መተርሻና ኤሳ እልሉ ጾኬ።
ነ ዶናፐ ኤሳይነ ማይ ፑልቴ፤
ነ ማዩ ሊባኖሳ ጺዳይ ሳዊያዋዳን ሳዌ።
ታ ሲቁዋ ምቻቶ ግድያ ታ ሙሹራት ዩሹ፥
ድረቲደ ናገትያ አታክልትያ ሳኣ ማላ።
ዩሹ ግምበቴዳ ፑልቱዋ፥
ማታፋይ አታመቴዳ ጎግያ ሃ ማላ።
ነ አታክልተቱዋ ግዶን: ሮማኒ፥
ዶረቴዳ አታክልትያ አይፈቱ፥
ሄናይነ ናርዶስያ ግያዋንቱ ደኢኖ።
ሄዋዳንካ ቃይ ናርዶሲ፥
ላዲ፥ ሳዉዋ ማታይነ ቃራፋይ፥
ሄዋዳንካ እጻናዳን ሳዊያባቱ ደኢኖ፤
ሄዋዳንካ ቃይ ካርቢ፥
ጎዳረ ኡ ጪሻይነ ዱማ ዱማ ቅማምያ አታክልተቱ ሞኪኖ።
ኔን አታክልትያ ሳኣ አልያ ፑልቱዋ ማላ፤
ደኡዋ ሃይ ቤትያ ኦላ ማላ፤
ሊባኖሳ ደርያፐ ጎግያ ሻፋ ማላ ያጌዳ።
ወዶራታ:
ሁጲሳ ባጋ ጫርኮ፥ ደንዳ!
ገድሳ ባጋ ጫርኮ፥ ሃያ!
ታ አታክልትያ ቦላ ጫርካ! አ ሳዉ ሄዋን ቶሹኩ ጎ።
ታ ሲቁ ባረ አታክልትያ ግዶ ዮ።
ዳሮ ማልእያ ቴራቱዋ ሞ ያጋዱ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.