Dawro Full Bible Ethiopic
ሲቁዋ ሳባ 1
ሲቁ ዎይንያ ኤሳፐ አ
(1:1—2:7)
ማዛሙርያ ኡባፐ አያ ሶሎሞና ማዛሙሪ ሀዋ።
ወዶራታ:
“ነ ሲቁ ዎይንያ ኤሳፐ አ ናሸችያ ድራዉ፥
ነ መተርሻን ዛራ ዛራደካ ታና የራ።
ነ ኦከትያ ሽቱ ዎት ሳዊ!
ነ ሱንይ ጼሰትያ ዎደካ አያ ናሸቺ!
ጌላዮቱ ኔና ሲቅያዌ ሄዋሳ።
ታና ኔናና አካደ ባ። ሃያ፥ አነ ላኡ እትፐ ዎጾይተ!
ታ ካትያዉ፥ ታና ነ ሲርጻ ገልሳ” ያጋዱ።
የሩሳላመ ማጫ አሳቱ:
አባን ኑን አይ ኬሻ ናሸቴዶ!
ኑን አ ሲቁዋ ዎይንያ ኤሳፐካ አደ ናሸቶ።
ቱሙካ ማጫ አሳይ ኡባይ ኔና ሲቃናዉ በሴ ያጌድኖ።
ወዶራታ:
ህንተኖ፥ የሩሳላመ ማጫ አሳቶ፥ ስስተ፥
ታን ካረ፤ ግዶፐነ፥ ማላንቻ።
ታ ካረተይ ቄዳረ ዱንካንያ ማላ፤
ሽን ታ ማላይ ሶሎሞና ካትያ ጎልያ ጋርዳቱዋ ማላ።
ታ ማላ ካረጽሴዳዌ ጹግያ አዋ፤
ታን ካረ ግዴዳ ድራዉ፥ ታና ካፓ።
ታ እሻቱ፥ ታ አት ናናቱ ታናና ዋላቀቲደ፥
ታና ዎይንያ ቱራ ናጋንቻ ኦድኖ፤
ያትና፥ ታን ታና ናጋበይከ።
ታ ሲቆዉ፥ አነ ታዉ ኦዳ፤
ነ ዶርሳ ዉድያ ኔን ሄምያዌ ሀቃኔ?
ጋላስ አዋፐ ነ ኡንቱንታ ሸምፕስያዌ ሀቃኔ?
ኔና ደማናዉ ነ ላገቱዋ ዉድያ ካላደ፥
አያዉ ዩሻንቻ ማጫ አሳ ግዶ? ያጋዱ።
የሩሳላመ ማጫ አሳቱ:
ሀነ፥ ማጫ አሳ ኡባፐ አ ሎእያ ማላንቻቴ!
ሳኣ ኤራና ዮፐ፥ ዶርሳይ ቤዳ ሳ ካላደ ባ፤
ነ ዴሻ ማራቱዋካ ሄንንቻቱዋ ዱንካንያ ማታን ሄማ።
ዎዳላይ
ታ ሲቃቴ!
ግብጼ ካትያ ፓራ ጋርያ ጎችያ ፓራቱዋ ግዶን ደእያ ማጋያቲዳን ሎኣሳ።
አቤት፥ ነ ሀይን ጎላካትያ አሌቁዋና ሺቂደ፥
ነ ጋጩ አያ ሎኢ! ነ ዚዚካ እንቁዋን አሌቀቴዳዋ።
ኑን ነዉ ብራን አሌቀቴዳ፥
ዎርቃ አሌቁዋ ኦስሳና ያጌድኖ።
ወዶራታ:
ካቲ ማዳን ኡት ደእሽን፥
ታ ሽቱዋ ሳዉ ጎልያ ግዶ ኡባን ቶሹኩ ጌዳ።
ታ ሲቁ ታ ንቱዋፐ ግዱዋን ሸምፕያ ዎደ፥
አ ፔኑ ቃርጪትያና ደእያ ካዋራዳን ሳዌ።
ታ ሲቁ ኤንጋደ ጌተትያ ዎይንያ ሳኣን ዶሌዳ፥
ባዙዋ ጪሻ ማላ ያጋዱ።
ዎዳላይ:
ታ ሲቃቴ፥ ኔን ዋታ ሎአይ! ኔን ዋታ ሎአይ!
ነ አይፈቱ ሀራጵያ አይፍያዳን ሎኢኖ ያጌዳ።
ወዶራታ:
ታ ሲቆዉ፥ ኔን አያ ሎአይ! አያ ናሸቻይ፤
ኑ አርሳይካ አጬዳ ማታዳን ናሸችያዋ።
ኑ ጎልያ ዛሩ ዝጋ፤ ካራይካ ጺዳን ዳደቴዳዋ ያጋዱ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.