Dawro Full Bible Ethiopic
ሌምሱዋ 5
ዎሹማፐ ሃካ
ታ ናአዉ፥ ታ አዳ ኤራተ ሀይዛ፤ ነ ሀይ ታ አኬካኮ የጋ። ያቶፐ፥ አዱሳ ቆፋይ ነዉ ደአና፤ ነ ሃሳያይካ ነ ኤራተ ቆንጭሳና።
ዎሹምያ ማጫ ምሽራት እንጻርሳፐ ኤሳ እልሉ ጾኬ፤ እ ሃሳያይ ኦይሳፐካ አ ሹጌ። ሽን እዛ ዉርሰን ጎዳረ ኡዳን ጫማዉ፤ ላኡ ባጋን ቃንጽያ ማሻዳን ቃንጽያኖ፤ እ ገደቱ ሀይቁዋኮ ዱገ ቢኖ፤ እ ሀመታይ ስት ኦደ፥ ዱፉዋ አፌ። እዛ ደኡዋ ኦግያ ቆፑኩ፤ እ ኦገቱ ጌላ፤ ሽን ጌላ ግድያዋካ አ ኤሩኩ።
ታ ናቶ፥ ሀእካ ታን ኦድያዋ ስስተ፤ ታን ግያዋፐ ከሶፕተ። ዎሹምያ ማጫ ምሽራት ሄራ ቦፕተ፤ እ ጎልያ ፐንግያኮ ሺቆፕተ። ሄዌ ዮፐ፥ ህንተ ህንተንቱ ቦንቹዋ ሀራቶ አደ እማና። ህንተንቱ ህንተንቱ ያላጋተን መቀ ባይና አሳቱዋ ኩሽያን ሀይቃና። ህንተንቱ ማጹዋ አላጋ አሳቱ አካና። ህንተ ዳቡሪደ ሺሼዳዌ ሀራ አሳዉ ግዳናዋ። ዉርሰን ህንተ አሹነ ህንተ አሳተይ ግልቂና፥ ህንተ ኦላና። ቃይ ሀዋዳን ያጋንታ፤ “ታን ትምርትያ አያዉ እጻድታሻ! ታ ዎዛናይካ ሴራ አያዉ ካዴሻ! ታን ታና ታማርስያዋንቱ ኦዴዳዋ አካበይከ፤ ታና ዞርያዋንቱ ዞርያካ ሀይዛበይከ። ሄዋ ድራዉ፥ ታን አሳይ ሺቄዳ ሺቁዋን፥ አኬከናን ካዉሻናዉ ደአይ” ያጋና።
ነ ማቻትዉ አማነቴዳዋ ግዳ፤ እዝ ጻላላ ሲቃ። ሀራ ማጫንፐ የለቴዳ ነ ናናቱ፥ ነዉ ሎኦባ ኦክኖ። ኡንቱንቱ ኔና ማዳናዉ ድጭኖ፤ አላጋ ግዶፕኖ።
ሄዋ ድራዉ ነ ማቻትና ናሸታ፤ ያላጋተን ኔን አኬዳ ነ ማቻትፐ ናሸቻ ኮያ። ሎእያ ጋራትዳንነ ናሸችያ ገንአቲዳን፥ እ ንይ ኡባ ዎደካ ኔና አሎ፤ ኡባ ዎደ እ ሲቁ ኔና ኦሞዶ። ታ ናአዉ፥ ዎሹምያ ምሽራታ ኔና አያዉ ኦሞዳይ? ሀራ አሳ ማቻቶ አያዉ ቆማይ?
አያዉ ጎፐ፥ አሳይ ኦያዋ ኡባ መና ጎዳይ በኤ፤ እ ሀመትያ ሎሱዋ ኡባ ጼሌ። ናጋራንቻ እ ኦዳ ናጋራይ ኦይቄ። አ ናጋራ ግቲ አ ቃቼ። እ ባረ ቦዛተን ሀሌዳ፤ ባረ ሁጲያ ናግቤና ድራዉ ሀይቄዳ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.