ሌምሱዋ 26

1ቦንያን ሻቻይ፥ ካ ጫክያ ዎድያንካ እራይ ኮሸናዋዳን፥ ቦዛዉ ቦንቹ ኮሸና።

2ካፎቱ ያነ ሃነ ፓሊደ፥ አሳ ቆሄናዋዳን፥ ጋሱ ባይናን ሸቂያ ሸቃይ አሳ ጋከና።

3ፓራዉ ልሱዋ፥ ሀርያዉ ፓጾሩዋ ኮሽያዋዳን፥ ቦዛ ዞክያዉ ዋ ኮሼ።

4ቦዛ ኡራዉ አ ቦዛተዳን ዛሮፓ፤ ዛሮፐ ኔንካ አ ማላ ግዳና።

5ቦዛ ኡራዉ አ ቦዛተዳን ዛራ፤ ሄዌ ዮፐ፥ እ ባረና ኤራንቻዳን ፓይዳና።

6ቦዛ አሳ ቦላ ኪታ ኪትያዌ ባረ ገድያ ቃንጽያዋነ ዎያዋ ኡሽያዋ ማላ።

7ቦዛ ኡራ ሌምሱ ዎባ ኡራ ገድያ ማላ ማደና።

8ቦዛ ኡራ ቦንችያ አሳይ ሹቻ ያምባርሻ ቦላ ቃች ዎደ ዩሽያ አሳ ማላ።

9ቦዛ ኡራ ሌምሱ ማቴዳ አሳይ ባረ ኩሽያ ጫዴዳ አጉን ከሳናዉ ባጸትያዋ ማላ።

10ቦዛ አሳ ዎይ ባረዉ ኦግያና አያ አሳ ኦሶ ቃጻርያ አሳይ ደሜዳ አሳ ኡባ ጫዳናዳን ዎንዳፍያ ዱክያ አሳ ማላ።

11ካናይ ባረ ጮሻ ጉየ ስሚደ ምያዋዳን፥ ቦዛይ ባረ ቦዛተ ኦሱዋ ዛር ዛር ኦ።

12ባረካ ባረና፥ “ታን አዳ ኤራንቻ” ግያ አሳ በኣድ? አፐ ቦዛ ኡራዉ ስንፐ ሎኦ ህዶታይ ደኤ።

13አዛላይ፥ “ኦግያን ጋሙ ደኤ፤ ያሽያ ጋሙ አኮ ኦግያን ዩዬ” ያጌ።

14ፐንጊ ባረ ማጻፍያን ያነ ሃነ ቃጽያዋዳን፥ አዛላይካ ባረ ሂጻን ያነ ሃነ አ ዎ።

15እት እት አሳቱ ዳሮ አዛላ፤ ኡንቱንቱ ሀራይ አትና፥ ዎጽያን ቱሼዳ ሶሉዋካ ፑደ ባራናዉ ዳቡሪኖ።

16አዛላ አሳይ ማርካና ኦድያ ላፑን ኤራንቻቱዋፐካ ባረና አዳ ኤራንቻ ጊደ ቆፔ።

17ባረና ጋያዌ ባይና ሳን ፓላማዉ አያ አሳይ ኦግያና ብያ ካና ሀይ ኦይቂያ አሳ ማላ።

18-19ባረ ሾሩዋ፥ “ታን ካሳዉ ኦድ” ያጊደ ጭምያ አሳይ፥ ጎዪደ ታማ ጺፋ ኦልያ፥ ዎይ ዎያ ጩብያ ደንያ አሳ ማላ።

20ምይ ዉሮፐ፥ ታማይ ቶኤ፤ ዝግርያዌ ዮፐ፥ ዋላሳይ አቴ።

21ጺጹንይ ቦንቁዋ ዳርስያዋዳንነ ምይ ታማ ዳርስያዋዳን፥ ፓሉማንቻ አሳይ ዋላሳ ዳርሴ።

22ዝግርሳ ቃላይ ማልኦ ቁማ ማላ፤ ናሸቺደ ዱገ ጋንጅያ ጋኬ።

23ዎዛናን ኢታባይ ደእሺና፥ ባረ እንጻርሳን ጭሙዋ ቃላ ሃሳይያ አሳይ ብራን ሼሼዳ ኡርቃ ሚሻ ማላ።

24ሎኦ ማላትያ ኢታ አሳይ ባረ ዎዛናን ደእያ ኢታተ ባረ ናሾ ሃሳያን ገን። 25አ ዎዛናን ላፑን ቱናተይ ኩም ኡቴዳ ድራዉ፥ እ ሎኦ ቃላ ሃሳዮፐካ አ አማኖፓ። 26ባረ ሞርከተ እ ገንፐካ፥ እ ኦያ ኢታተይ ሺቁዋን ቆንጫና።

27ሀራቶ ኦላ ቦክያ ኡራይ ሄ ኦላን ባረዉ ኩንዳና፤ ሀራቱ ቦላ ሹቻ ጎንዶርስያ ኡራ ቦላ ሄ ሹቻይ ስሚደ ጎንዶረታና።

28ዎርዶትያ እንጻርሳይ ባረ ቆሄዳ አሳቱዋ እጼ፤ ጭምያ ሃሳያይ ባየ አሄፐ አትን፥ ሀራባ አሄና።