ሌምሱዋ 14

1አዳ ኤራንቻ ምሽራታ ባረ ጎልያ ኬጻዉ፤ ሽን ቦዛታ ባረ ጎልያ ባረ ኩሽያን ኮላዉ።

2ሱረ ሀመትያ አሳይ መና ጎዳዉ ያዬ፤ ሽን ባረ ኦግያ ጌላይያ አሳይ መና ጎዳ ካ።

3ቦዛ ሃሳያይ አ ዞክያዉ ጻምኣ አዬ፤ ሽን አዳ ኤራንቻቱዋ እንጻርሳይ ኡንቱንታ ናጌ።

4ቦራቱ ባይና ሳን ዬሲ መላ ደኤ፤ ሽን ነዉ ጎሽያ ዎልቃማ ቦራቱ ደኦፐ፥ ነ ዬስያን ካይ ኩሜ።

5አማነትያ ማርካይ ኡባ ገደ ቱሙዋ ኦዴ፤ ሽን ዎርዱዋ ማርካይ ዎርዱዋ ጻላላ ሃሳዬ።

6ቅሊጭያዌ አዳ ኤራተ ኮዬ፤ ሽን ደመና፤ አኬካይ ደእያ አሳይ ኤራተ ደማናዌ አ ዋይሰና።

7ቦዛ አሳፐ ሃካ፤ አያዉ ጎፐ፥ ኔን አ ሃሳያፐ ኤራ ደማካ።

8ጭንጫ አሳይ ባረ ኦያዋ ኤርያ ድራዉ፥ አዳ ኤራንቻ፤ ሽን ቦዛ አሳይ አይነ ኤረናንካ ኤርያዋ ማላትያ ድራዉ ጭሜ።

9ቦዛቱ ናጋራ ኦደ፥ ካዮትያዋ አጊደ ቅሊጪኖ፤ ሽን ሱረቱ ባረንቱ ናጋራይ አቶ ጌተታናዋ ኮዪኖ።

10ባረ ዎዛና ካዩዋ እዛዉ ኤሬ፤ አ ናሸቻካ ኦንነ አናና ኮጸና።

11ኢታቱዋ ጎሊ ኮለተና፤ ሽን ሱረቱዋ ጎሊ ምኒደ ደአና።

12አሳዉ ልከ ማላትያ ኦጊ ደኤ፤ ሽን ቢና፥ አ ዉርሰይ ሀይቁዋን ከስ የጌ።1

13ሚቻንካ ዎዛናይ ካዮት ኤሬ፤ ናሸቻ ዉርሰይካ ካዩዋ ግዳናዉ ዳንዳዬ።

14ኢታ አሳይ ባረ ኢታ ኦሱዋ ጋትያ አካና፤ ሎኦ አሳይካ ባረ ሎኦ ኦሱዋ ጋትያ አካና።

15ቦዛ አሳይ ኡባ አማኔ፤ ሽን ጭንጫይ አኬኪደ ታንጌ።

16አዳ ኤራንቻ አሳይ መና ጎዳ ያዬ፤ ኢታፐካ ሃኬ፤ ሽን ቦዛይ አላለ ጌናነ ኤሌሌ።

17ኤለ ሀንቀትያ አሳቱ ቦዛ ኦሱዋ ኦኖ። ሽን ጭንጫቱ ዳንዳያንቻ።

18ቦዛቱ ባረንቱ ቦዛተ ጋትያ አኪኖ፤ ሽን ጭንጫቱ ኤራተ ካላቻዳን ዎናዋንታ።

19ኢታ አሳቱ ሎኦ አሳቱዋ ስንን ሆኪደ፥ ማሮታ ዎሳና። ናጋራንቻቱካ ጽሎቱዋ ፐንግያን ሆካና።

20ህዬሳይ ባረ ሾሩዋንካ ዶሰተና፤ ሽን ዱረቶ ዳሮ ላገቱ ደኢኖ።

21ባረ ሾሩዋ ካያ አሳይ ናጋራ ኦ፤ ሽን ህዬሳ ማድያዌ አንጀቴዳዋ።

22ኢታባ ማቀትያዋንቱ ባሊኖ ግድክኖ? ሽን ሎኦባ ኦናዉ ሀልችያዋንቱ ቱማተነ አገና ሲቁዋ ደሚኖ።

23ምኒደ ኦያዋን ኡባን ጎአይ ደኤ፤ ሽን ጮ መላ ሃሳያይ ህዬሳተ ጻላላ አዬ።

24አዳ ኤራንቻቶ ኡንቱንቱ ዱረተይ ካላቻ፤ ሽን ቦዛቱ ባረንቱ ቦዛተ ጉጅ ጉጂደ ቦዚኖ።

25ቱሙ ማርካይ ሸምፑዋ አሼ፤ ሽን ዎርዱዋ ማርካይ ባለ።

26መና ጎዳዉ ያይያ ኡራዉ ምኖ ጌሱ ደኤ። እ አ ናናቶካ ባቃቲደ አትያ ሳኣ ግዳናዋ።

27መና ጎዳዉ ያይያዌ ደኡዋ ፑልቶ፤ ሄዋ ድራዉ፥ መና ጎዳዉ ያይያዌ ሀይቁዋ ጲርያፐ አሼ።

28ካትያ ግታተይ እ ሞድያ አሳ ጮራተና፤ ሽን እ ሞድያ አሳይ ዮፐ፥ እካ ፓና።

29ዳንዳያንቻ አሳዉ ዎልቃማ አኬካይ ደኤ፤ ሽን ኤለ ሀንቀትያ አሳይ ባረ ቦዛተ ቆንጭሴ።

30ዎፑ ጌዳ ዎዛናይ ቦላ ፓጻ ዎ፤ ሽን ቃናቲ ቦላዉ አጃጅያ ሀርግያ ማላ።

31ህዬሳቱዋ ናቂያ አሳይ ኡንቱንታ መዳዋ ጫሼ፤ ሽን መቶታንቻቶ ኬክያ አሳይ ጾሳ ቦንቼ።

32ኢታቱ ባረንቱ ኢታ ኦሱዋን ኩንዳና፤ ሽን ጽሎቱ ባረንቱ ሱረተን ሀይቁዋፐ ናገታና።

33አኬካንቻ አሳ ዎዛናን አዳ ኤራተይ ኩሜዳ፤ ሽን ቦዛቱ አዳ ኤራተ አያነ ኤርክኖ።

34ጽሎተይ እት ካዉተ አሳ ቁ ቁ ኦ፤ ሽን ናጋራይ አይ አሳነ ካዉሼ።

35ካቲ ኤራንቻ ቆማን ናሸቴ፤ ሽን ዬላይያ ኦሱዋ ኦያ ቆማ ሀንቀቴ።