ፕልጵስዮሳ

ጳዉሎስ

ፕልጵስዮሳ አሳዉ

ጻፌዳ ኪታ

ገሉዋ

ጳዉሎስ ፕልጵስዮሳ አሳዉ ጻፌዳ ኪታይ ጻፈቴዳዌ፥ ማቅዶንያ ግዱዋን ደእያ ሮመን ኦሞደቴዳ ፕልጵስዮሳ ጌተትያ ጋድያን ደእያ አማንያዋንቱሳ። ሀዋንቱ ጳዉሎስ ኮይሮ አማንደ ሺሼዳዋንታ። ኡንቱንቱ ሮመ ጋደ የለታ ግዶ ድራዉነ ቃይካ ካረ ጋደፐ ዬዳ ዎጋንነ አማኑዋን ዳሮፐ አዪኖ። ጳዉሎሳ ቦላን ኡንቱንቱ ዳሮፐ ሀንቅቴዳ ጋሱካ ሀዋ (ኪታ 16:20)። ሀ ኪታይ ጻፈቴዳዌ፥ ሀራ አማንያ ኦሳንቻቱ ጳዉሎሳ ቆፋ ጳልቂ ጳልቂደ ዋይስያ ዎድያናነ ፕልጵስዮሳ አማንያዋንቱ ግዶን ደንዴዳ ዎርዶ ትምርትያ ጋሱዋን አ ዎዛናይ ዳሮ ካዮቲደ መኤዳ ዎደነ ቃሾ ጎልያን እ ደእያ ዎድያና። ግዶ ሽን፥ ጳዉሎስ የሱስ ክርስቶሳ ምንሲደ አማንያ አሳ ግዴዳ ድራዉ፥ ሀ ኪታ ቦላን ቆንጪደ ቤትያዌ ናሸቻነ ኩመን አማነትያዋ።

ጳዉሎስ ሀ ኪታ ጻፌዳ ኮይሮ ጋሱ አ መቱዋ ዎደ አ ማዳናዉ ፕልጵስዮሳ አማንያ አሳይ እሞታ አዉ ኪቴዳ ድራዉ፥ ኡንቱንታ ጋላታናሳ። አ ቦላንካ ኡንቱንቱ ቦላንካ ዱማ ዱማ መቱ ጋኬዳዋ ግዶፐካ፥ ኡንቱንቱ ጻላና ማላነ ኩመን አማነቲደ ደአና ማላ፥ ሀ ጋከቴዳ እንጅያን ኡንቱንታ መን። አዩዋነ ኦቶሩዋ ድጊደ፥ የሱስ ክርስቶሳ አሽከተን ኡንቱንቱ ኩማና ማላ፥ ምንሲደ ኡንቱንታ ሀሳይሴዳ። የሱስ ክርስቶሳና እትፐ ግዴዳዋን ኡንቱንቱ ደሜዳ ደኡ ጾሳ አ ኬካተፐ ፑልቴዳዋነ ኡንቱንቱ አማኑዋን አኬዳዋ ግድያዋፐ አትን፥ አይሁዳቱዋ ዎጋቱዋ ፖልያዋን ቤቴዳዋ ግደናዋ ኡንቱንታ ሀሳይሴ። የሱስ ክርስቶሳና እቱዋ ግዲደ ደእያ ኡባቶ ጾሳይ እምያ ሳሮተባነ ናሸቻባ ኡንቱንቶ ጻፌ።

ሀ ኪታይ ኤረትያዌ ናሸቻ፥ አማነትያዋ፥ እትፐተነ ክርስትና አማኑዋንነ ደኡዋን ምኒደ ደእያዋ ጌሺደ በስያዋና። ሄዋ ቦላካ ጉጂደ፥ ጳዉሎስ ፕልጵስዮሳን ደእያ አማንያ አሳቱዋ ሲቅያ ዎልቃማ ሲቁዋ ቆንጭሴ።

ሸምፓቱዋ ኡባቶ እመቴዳ ቃን ቆፋቱዋ

ገሉዋ

ጳዉሎሳዉ ደኤዳ ደኡዋ ሀኖታ

ክርስትና ደኡዋ ሌምሱዋ

ጽሞቶሳዉነ ኤጳፍሮዲቱሳዉ ደእያ ቆፋ

አማኑዋ ኤቀትያዋንቱፐ ናገታና ማላ ኦደቴዳዋ

ጳዉሎስ ፕልጵስዮሳ አማንያዋንቶ ሺሼዳ ጋላታነ ማቁዋ

ዉርሰ ቁትያ