Dawro Full Bible Ethiopic
ናህምያ 8
ሙሴ ህጊ ዛረ ናባበቱሳነ ቃላ ጫቁዋ ኦራጹሳ
(8:1—10:39)
ላፑን አግናይ ጋኮ ዎደ፥ እስራኤልያ አሳይ ኡባይካ ባረንቱ ካታማን ካታማን ኡቴድኖ። ሄ አግናን ኡንቱንቱ ኡባይካ እትፐ ሃ ፐንግያ ስንን ደእያ ዳባባን ሺቄድኖ። መና ጎዳይ ሙሴ ባጋና እስራኤልያ አሳዉ እሜዳ ህግያ ማጻፋ አሀና ማላ፥ ጻፍያ እዝራ ኦቼድኖ። ያትና፥ ላፑን አግናን ኮይሮ ጋላሳን፥ አቱማዌ ማጫዌ፥ አኬካናዉ ዳንዳይያ አሳይ ኡባይ ሺቄዳ ሳኣን እዝር ህግያ ማጻፋ አሄዳ። ሃ ፐንግያ ስንን ደእያ ዳባባን ኤቂደ፥ አቱማዎ ማጫዎ፥ አኬካናዉ ዳንዳይያ አሳ ኡባዉ ህግያ ማጻፋ ዎንታፐ ጋላሳ ሴታይ ጋካናዉ ናባቤዳ፤ አሳይካ ሎይ ሀይዚደ ስሴዳ።
እዝር ኤቂደ ናባባናዉ ምፐ ጊግሴዳ ጉታራ ቦላን ኤቄዳ። አፐ ኡሸቻ ባጋና ማቲትያ፥ ሻማእያ፥ አናያ፥ ኦርዮና፥ ህልቂያነ ማእሴያ ጌተትያ አሳቱ ኤቄድኖ። ሀድርሳ ባጋና ቃይ ፓዳያ፥ ምሻኤላ፥ ማልክያ፥ ሀሹማ፥ ሀሽባዳናሀ፥ ዛካራሳነ ማሹላማ ጌተትያ አሳቱ ኤቄድኖ።
እዝር አሳ ኡባፐ ቂያ ሳኣን ኤቄዳ ድራዉ፥ ኡባይካ አ ሎይደ ጼልሽን፥ ኡንቱንቱ ስንን ህግያ ማጻፋ ዶዬዳ። ሄ ዎደ ኡንቱንቱ ኡባይ ኡቴዳ ሳፐ ደንድ ኤቄድኖ። እዝር መና ጎዳ፥ ዎልቃማ ጾሳ ጋላቴዳ። አሳይ ኡባይ ባረንቱ ኩሽያ ፑደ ደንደ፥ “አመንእ፥ አመንእ” ያጌድኖ። ቃይ ኡንቱንቱ ሶምእ ሳኣ ቦቻና ጋካናዉ ጉፋኒደ፥ መና ጎዳዉ ጎይኔድኖ።
ሄዋፐ ጉይያን ደንዲደ፥ ባረንቱ ደእያ ሳኣን ኤቄድኖ። ኢያሳ፥ ባና፥ ሸረብያ፥ ያሚና፥ አቁባ፥ ሻባታያ፥ ሆድያ፥ ማእሴያ፥ ቃሊጻ፥ አዛርያ፥ ዮዛባዳ፥ ሀናናነ ፓላያ ጌተትያ ሌዋቱ ህግያ አሳይ አኬካናዳን ኦድኖ። ኡንቱንቱ ጾሳ ህግያ ማጻፋፐ ናባቢደ፥ ቃይ ናባበቴዳዌ ዋግንቶ፥ አሳይ ኤራና ማላ፥ ብል ቆንጭሴድኖ።
አሳይ ህግያ ቃላ ስሴዳ ዎደ፥ ባረንቱ ዎዛናን ምሸቲደ ዬኬድኖ። ሄዋ ድራዉ፥ ቢታ ሞድያ ናህሚ፥ ቄሰነ ጻፍያ ግዴዳ እዝርነ አሳዉ ማጻፋ ብልያ ሌዋቱ አሳ ሀዋዳን ያጌድኖ፤ “ሀ ጋላሳይ መና ጎዳዉ፥ ህንተንቱ ጾሳዉ፥ ጌሻ ጋላሳ ግድያ ድራዉ፥ እቱነ ካዮቶፕተነ ዬኮፕተ” ያጌድኖ።
ቃይ ናህሚ ጉጂደካ ሀዋዳን ያጌዳ፤ “ቢተ፥ ሞዋ ሚተ፤ ማልእያዋካ ኡሽተ፤ ቃይ ባይናዋንቶካ ህንተዋፐ ሻክ እምተ። አያዉ ጎፐ፥ ሀቼ ጋላሳይ ኑ ጾሳዉ ጌሻ ጋላሳ። መና ጎዳ ናሸቻይ ህንተንቶ ዎልቃ ግድያ ድራዉ ካዮቶፕተ” ያጌዳ።
ሌዋቱካ ቃይ፥ “ሀዌ ጌሻ ጋላሳ ግድያ ድራዉ፥ ካዮቶፕተ፤ ሀይዝተ” ያጊደ አሳ ጮኡ ኦድኖ። ሄዋፐ ጉይያን፥ አሳይ ናሸቻን ማናዉነ ኡሻናዉ ቃይ ባይናዋንቶካ ዴእያዋፐ ሻክ እማናዉ ቤድኖ። አያዉ ጎፐ፥ ኡንቱንቱ ኦዴዳ ቃላ ስሴድኖነ አኬኬድኖ።
አግናዉ ላኤን ጋላስ ዛራቱዋ ካፓቱ፥ ቄሳቱ ነ ሌዋቱ ህግያ ቃላ ኡንቱንቶ ብርሻና ማላ፥ እዝራኮ ዬድኖ። ሄዋን ታማሪደ፥ ላፑን አግናን ዳስያ ባላ ቦንችያ ዎደ፥ እስራኤልያ አሳይ ኡባይ ዳስያ ግዶን ኡታናዳን መና ጎዳይ ሙሴ ባጋና አዛዜዳዋ አኬኬድኖ።1 ሄዋ ድራዉ፥ ካታማቱዋ ኡባንነ የሩሳላመን ሀዋዳን ያጊደ አዋዬድኖ፤ “ደርያ ሁጲያ ከስተ፤ ዛይትያ ዎጋራፐ፥ ዎራን ዶልያ ዎጋራፐ፥ ባርሴነትያ ምፐ፥ ዛምባ ምፐነ ሀይይ ደእያ ም ኡባፐ ህግያን ጻፈቴዳዋዳን፥ ዳስያ ዳሳናዉ ታሽያ አህተ” ያጌድኖ።
ሄዋ ድራዉ፥ አሳይ ቢደ ም ታሽያ አሄድኖ፤ ባረንቱ ጎልያ ቦላን ደእያ ደምባ ሳኣን፥ ባረንቱ ግቢያን፥ ጾሳ ጌሻ ጎልያ ዳባባን፥ ሃ ፐንግያ ዳባባንነ ኤፍሬማ ፐንግያ ዳባባን ዳስያ ዳሴድኖ። ኦሞዱዋፐ ስሜዳ አሳይ ኡባይ ዳስያ ዳሴዳ፥ አ ግዶን ኡቴድኖ። ነዌ ናኣ ኢያሱ ዎድያፐ ዶሚደ፥ ሄ ጋላሳይ ጋካናዉ፥ ኡንቱንቱ ሀዋ ማላ ባላ ቦንች ኤርክኖ። ሄዋ ድራዉ፥ ኡባይካ ሎይ ናሸቴድኖ። ባላይ ዶመቶደፐ ቢደ ዉራና ጋካናዉ፥ ሀቼ ሀቼ እዝር ጾሳ ህግያ ማጻፋፐ አሳዉ ናባቤዳ። ባላ ላፑን ጋላሳ ቦንቾዋፐ ጉይያን፥ ሆስፑን ጋላሳን ህጊ አዛዝያዋዳን ጌሻ ሽቁዋ ኦድኖ።
Source notes (1)
- Cross-reference ዎጋ 23:33-36፣ 39-43፤ ዛረ. 16:13-15
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.