ሉቃሳ ምሽራቹዋ 10

ምሽራቹዋ ቃላዉ ኪተቴዳ አሳቱዋ

1ሀዋፐ ካላ ጎዳይ ሀራ ላፑን ታሙ1 አሳ ሱንደ ላኡዋ ላኡዋ ኦደ እ ባናዉ ደእያ ካታማ ኡባ ኪቴዳ። 2የሱስ ኡንቱንታ፥2

“ቆይቻዉ ጋኬዳ ካይ ዳራ፤ ኪተትያ አሳይ ጉ። ስም ቆይጨትያ ካ ጎዳይ፥ ቆይቻዉ ኪተትያዋንታ የዳና ማላ ዎስተ። 3ታን ዶርሳቱዋዳን ዋላቱዋ ግዶ ህንተና ኪታይ፥ ቢተ።3 4ህንተንቱ ኦገዉ አያነ ኦይቆፕተ: ቦርሳ፥ ቃርጪትያ፥ ጫማ፥ ግድናካ ኦይቆፕተ፤ አሳና ሳሮተቲደ ኦግያን ዎድያ ዉርሶፕተ።45

5“ህንተንቱ ገልያ ጎለ ኡባ ካስያን፥ ‘ሳሮተይ ሀ ጎለዉ ግዶ’ ያግተ። 6ሄ ጎልያን ሳሮተ ዶስያ አሳይ ደኦፐ፥ ህንተንቱ ሳሮታይ ሄ ጎልያን አቃናዋ፤ ኮየናዋ ግዶፐ፥ ህንተንቱ ሳሮታይ ህንተንቶ ስማናዋ። 7ሄ ጎልያን ኡንቱንቶ ደእያዋፐ ሚድነ ኡሺደ ደእሽተ፤ ኦሳንቻዉ አ ድርጉዋ ጭጋይ ኮሼ፤ እት ጎልያፐ ሀራ ጎልያ ዩዮፕተ።6

8“አይ ካታማነ ህንተንቱ ገልያ ዎደ፥ አሳይ ህንተና ሞክ አኪደ ምዛናዉ ሺሾዋ አያነ ሚተ። 9ሄ ካታማትን ደእያ ሀርጋንቻቱዋ ፓደ አሳዉ፥ ‘ጾሳ ካዉተይ ህንተኮ ማቴዳ’7 ያጊደ ኦድተ። 10የዉዋን ቃይ አይ ካታማነ ገሎደ፥ አሳይ ህንተንታ ሞክ አከናዋንታ ግዶፐ ሄ ካታማ ቃአኮ ከስኔ፥ 11‘ኑን ህንተና ዬላያናዉ፥ ሀራይ አቶ ኑ ገድያ ቦላን ደእያ ህንተንቱ ካታማ ባናካ ህንተንቶ ቆቆፌቶ8፤ የዉዋን ቃይ፥ ጾሳ ካዉተይ ህንተንቱኮ ማቴዳዋ ኤርተ’ ያግተ።9 12ፕርዳ ጋላስ ሀ ካታማትፐ ሶዶማ ካታማ ጋኬዳ ሙራይ ካዉሻናዋ ያጋደ ታን ህንተዉ ኦዳይ።10

አማነናን እጼዳ ካታማቱዋ

(ማቶሳ 11:20-24)

13“አየ ነዉ ኮራዚነ፤ አየ ነዉ ቤተሳይደ፤ ህንተንቱን ሀኔዳ ማላታቱ ጺሮሳ ካታማንነ ሲዶና ካታማን ሀኔደንቶ፥ ሄዋን ደእያ አሳቱ ካዩዋ ማዩዋ ማዪደ፥ ብድን ቦላን ኡቲደ፥ በንፐ ባረንቱ ናጋራፐ ስማናዋንታሽን። 14ሀዋ ድራዉ፥ ሙረትያ ጋላስ ህንተንቱፐ አደ ጺሮሳ ካታማዉነ ሲዶና ካታማዉ ሙራይ ካዉሻናዋ። 15ሀነ ቅፍርናሆመ፥ ኔን ሳሉዋ ፑደ ቁ ጋናዉ ኮያድ? ዱገ ስኦልያ ዎናሳ።11

16“ህንተንቱ ግያዋ ስስያ አሳይ፥ ታን ግያዋ ስሴ፤ ህንተንታ እጽያ ኡራይ ታና እጼ፤ ታና እጽያ ኡራይ ታና ኪቴዳዋካ እጼ” ያጌዳ።12

አ ካልያዋንቱ ኪተቴዳሳፐ ስሜድኖ

17ላፑን ታሙ አሳቱካ፥ “ጎዳዉ፥ ኢታ አያናቱካ ነ ሱንን ኑዉ አዛዘቴድኖ” ያጊደ ናሸቻን ስሜድኖ።

18የሱስካ ኡንቱንቶ፥ “ሴጻናይ ዋልቃንዳን ሳሉዋፐ ዎሽን በኣድ። 19ስም ሾሻነ ሶጉዋ የናዳን ህንተንቱ ሞርክያ ጻላህያ ዎልቃ ጾናና ማላ ማታ እማድ። ህንተንታ ቆሀናዌ አይኔካ ደኤና። 20ግዶፐ አትን ህንተንቱ ሱንይ ሳሉዋ ማዝጎብያን ጻፈቶ ድራዉ፥ ናሸትተፐ አትን ኢታ አያናቱ አዛዘቶ ድራዉ ናሸቶፕተ” ያጌዳ።

የሱስ ባረ ናሸቻ ቆንጭሴዳ

(ማቶሳ 11:25-27፤ 16:13-17)

21ሄ ዎድያን የሱስ አያና ጌሻን ዳሮ ናሸቲደ፥ “ሳሉዋነ ሳኣ ጎዳዉ፥ ኔን ሀ የዉዋ ታማሮዋንቱፐነ አ ኤራንቻቱዋፐ ገንደ፥ ቄር ናናዉ ቆንጭሶ ድራዉ፥ ኔና ጋላታይ፤ ኤ፥ ታ አቦ፥ አያዉ ጎፐ፥ ሀዋ ኦናዉ ነ ሎኦ ሸነ ግዴዳ።

22“ኡባ የዉ ታዉ ታ አቡፐ እመቴዳ። ናአይ ኦነንቶ አዉዋፐ አትሽን ኦንነ ኤርያዌ ባዋ፤ ሄዋዳንካ አዉ ኦነንቶ ናኣፐነ እ ቆንጭሳናዉ ኮዮ ኡራፐ አትን፥ ሀራይ ኦንነ ኤርያዌ ባዋ” ያጌዳ።

23ካሊደካ የሱስ ባረና ካልያዋንቱኮ ስም ዎደ፥ ኡንቱንቱ ጻላላ፥ “ህንተንቱ በእያዋ ጼልያ አይፋቱ አንጀቴዳዋንታ። 24ታ ህንተዉ ኦድያዌ አዬ ጎፐ፥ ጮራ ናባቱነ ካታቱ ህንተንቱ በእያዋ በአናዉ አሞቴድኖሽን በእበይክኖ፤ ህንተንቱ ስስያዋካ ስሳናዉ አሞቴድኖ፤ ሽን ስስበይክኖ” ያጌዳ።

አሳዉ ቃረትያ ሳማርያ ብታንያ

25እት ጋላስ ህግያ ኤርያዌ እቱ የሱሳ ፓጫናዉ አኮ ዪደ፥ “ታማርስያዎ፥ መና ደኡዋ ላታናዉ፥ ታን አያ ኦ?” ያግ ኦቼዳ።

26የሱስ ዛሪደ፥ “ሙሴ ህግያ ማጻፋን ጻፈቶዌ አዬ? ኔን አያ ጋደ ብላይ?” ያጌዳ።

27ብታኒካ፥ “ሙሴ ህግያ ማጻፋይ፥ ‘ጾሳ ነ ጎዳ ፖሎ ነ ዎዛናፐ፥ ፖሎ ነ ሸምፑዋፐ፥ ፖሎ ነ ዎልቃፐነ ፖሎ ነ ቆፋፐ ሲቃ፤ ሄዋዳንካ ነ ላገካ ነ ሁጲያዳን ዶሳ’ ጌ” ያጌዳ።13

28የሱስ አ፥ “ልከ፥ ቱሙዋ ጋዳ፤ ስም ኔንካ ሀዋ ኦ፤ ደኡዋን ደአናሳ” ያጌዳ።

29ሙሴ ህግያ ታማርስያ ብታኒ ቃይ ባረና ጽሎ ኦናዉ ኮዪደ የሱሳ፥ “ሀኖሽን፥ ታ ላገይ ኦኔ?” ያጊደ ኦቼዳ።

30የሱስ ዛሪደ፥ “እት ብታኒ የሩሳላመፐ እያርኮ ቢደ ደእሽን፥ ኦግያ ቦላን ፓናቱ አ ደሚደ፥ አ ማዩዋ ቃሮዋፐ ጉየ ሾጪደ፥ ሀይቃናዉ ፖሉ ጎደ ኦሊደ ቤድኖ። 31ቆፐናን እት ቄሳይ ሄ ኦግያና ብደእያዌ፥ ሾጨቲደ ኩንዴዳ ብታንያ በኤዳ ዎደ፥ አያነ ኦናን ምይያና አደ ቤዳ። 32ሄዋዳንካ እት ሌዊ ሄ ኦግያና ብደኤ። እካ ብታንያ በኢደ፥ ምየት አዳ። 33ሽን ሳማርያ አሳ ግዴዳ እት ብታኒ፥ ሄ ባጋና አደ፥ ሀ ብታንያኮ ዬዳ። አ በኤዳ ዎደ አዉ ቃረቴዳ።14 34አኮካ ሺቂደ፥ ዛይትያነ ዎይንያ ኤሳ15 አ ማይን ትጊደ፥ ቃቼዳ። ሄዋፐ ጉየ ባረ ሀርያ ቶግሲደ፥ እማይ አቅያ ጎልያ አክ ቤዳ፤ ሄዋን ብዪደ ናጌዳ። 35ዎንተ ጋላስ ጉ ብራ ባረ ኪስያፐ ከሲደ፥ እማይ አቅያ ጎልያ ጎዳዉ እሚደ፥ ‘ሀ ብታንያ ታዉ ሎይ ብያ፤ ሀዋፐ ዳሩዋ ኔን ከሶፐካ፥ ታን ስምያ ዎደ ነዉ ጭጋና’ ያጌዳ።

36“ስም ሀ ሄዙ አሳቱዋፐ፥ ፓናቱዋ ኩሽያን ሾጨቲደ ኩንዴዳ ብታነዉ፥ ላገ ግዴዳዌ ሀቃዋ ማላቲ?” ያጌዳ።

37ህግያ ታማርስያዌካ፥ “ሄ አዉ ቃረቶዋ” ያጌዳ።

የሱስካ አ፥ “ስም ባደ ኔንካ ሄዋዳን ኦ” ያጌዳ።

የሱስ ማርትነ ማይራም ሶይ ቤዳ

38የሱስ ባረና ካልያዋንቱና ኦግያ ቢደ፥ እት ሄራ ጋርሳ ጋኬዳ። ሄዋን ማርቶ ጌተትያ እት ምሽራታ ባረ ጎለን ሞካዱ።16 39እዝዉካ ማይራሞ ጌተትያ ምቻታ ደአዉ፤ ሄናካ የሱሳ ገድያ ማታን ኡታደ፥ እ ኦድያዋ ሀይዛደ ደአዉ። 40ማርታ ቃይ ሶይባ ጊግሳደ ዳቡራ ደአዉ፤ ሄዋ ድራዉ የሱሳኮ ሺቃደ፥ “ሀና ታ ምቻታ፥ ኪታ ኡባ ታ ቦላ ኦልና፥ ታን ታረካ ላባኖደ ጼላደ ጮኡ ጋይ? ሀያና ታና ማዳናዳን እዝዉ ኦዳ” ያጋዱ።

41የሱስካ ዛሪደ እዞ፥ “ማርቴ፥ ማርቴ፥ ኔን ጮራ የዉዋ ቆፓደ ህርጋ፤ ቃይካ መቶታ። 42ሽን ኮሽያዌ እትባ፤ ማይራማ ባረፐ ኦንነ አከና ሎኦባ ዶራዱ” ያጌዳ።