Skip to content
BibleKenya

Dawro Full Bible Ethiopic

ዎጋ 9

አሮን ጾሳዉ ሺሽያ ያርሹዋ

ሆስፑን ጋላሳን ሙሴ አሮናነ አ ናናቱዋ፥ ቃይ እስራኤልያ ጭማቱዋካ ጼሴዳ። አሮና ሀዋዳን ያጌዳ፤ “ናጋራ ያርሾ እት ኮሩማ፥ ቃይ ጹግያ ያርሾ እት ዶርሳ ኦርግያ መና ጎዳ ስን ሺሻ። መሄቱ ላኡካ ትላ ቦላና ደእያዋንታ ግድኖ። ቃይ እስራኤልያ አሳ ሀዋዳን ያጋ፤ ‘መና ጎዳይ ህንተንቶ ቆንጭያ ድራዉ፥ መና ጎዳ ስንን ያርሻናዉ፥ ናጋራ ያርሾ እት ዴሻ ኦርግያ፥ ጹግያ ያርሾ ትላ ቦላና ደእያ እት ላይ ማራነ እት ላይ ዶርሳ አሆ። እትፐተ ያርሾ እት ኮሩማ፥ እት ዶርሳ ኦርግያነ ዛይትያን ሙናቀቴዳ ካ ያርሹዋ አህተ ያጋ’ ” ያጌዳ።

ኡንቱንቱ ሙሴ አዛዜዳዋ ኡባ ጾሳ ዱንካንያ ስን አሄድኖ፤ ያቲደ ማባራ ኡባይ ሺቂደ፥ መና ጎዳ ስንን ኤቄድኖ። ሙሴ ኡንቱንታ፥ “መና ጎዳ ቦንቹ ህንተንቶ ቆንጫና ማላ፥ ህንተ ኦናዳን መና ጎዳይ ህንተና አዛዜዳዌ ሀዋ” ያጌዳ።

ቃይ ሙሴ አሮናዉ ሀዋዳን ያጌዳ፤ “ያርሽያ ሳኮ ሃ ሺቃ፤ ነ ናጋራ ያርሹዋነ ነ ጹግያ ያርሹዋ ያርሻ፤ ያታደ ነ ሁጰ ናጋራነ ነ አሳ ናጋራካ አቶ ጊሳ። ቃይ መና ጎዳይ አዛዜዳዋዳን፥ አሳይ ሺሽያ ያርሹዋ ያርሻደ፥ ኡንቱንቱ ናጋራካ አቶ ጊሳ” ያጌዳ።1

አሮን ያርሽያ ሳኮ ዪደ፥ ባረ ሁጰ ናጋራዉ ያርሹዋ ኦ ሺሼዳ ኮሩማ ሹኬዳ። አሮና አቱማ ናናይ ሱፐ አኪደ አዉ አሄድኖ፤ እ ባረ ኩሽያ ብራያ ሄ ሱን የድ ከሲደ፥ ያርሽያ ሳኣ ካጨቱዋ ቦቼዳ፤ አቴዳ ሱካ ያርሽያ ሳኣፐ ጋርሳ ባጋና ጉሴዳ። መና ጎዳይ ሙሳ አዛዜዳዋዳን፥ ቃይ ሄ ናጋራ ያርሹዋ አሹዋፐ ሞዋ፥ ክላሆቱዋነ ትርያ ጼራ ቦላ ደእያ ሞያ ያርሽያ ሳኣ ቦላን ዎደ ጹጌዳ። ሽን አቴዳ አሹዋነ ጋልባ ዱንካኔዳ ሳኣፐ ካረ ከሲደ ጹጌዳ።

ሄዋፐ ጉይያን፥ አሮን ጹግያ ያርሹዋ ሹኬዳ፤ አ ናናይ ሱ አኪደ አዉ አሄድኖ፤ እ ያርሽያ ሳኣ ምይያ ኡባን ጉሴዳ። ቃይ ኡንቱንቱ ጹግያ ያርሹዋ ቆሙዋን ቆሙዋን ከሲደ፥ ሁጲያናካ አዉ አሄድኖ፤ እ ያርሽያ ሳኣ ቦላን ዎደ ጹጌዳ። ቃን አሹዋነ ገደቱዋካ ሃን ሜጪደ፥ ያርሽያ ሳኣ ቦላን ደእያ ጹግያ ያርሹዋ ቦላን ዎደ ጹጌዳ።

ሄዋፐ ጉይያን፥ አሮን አሳ ያርሹዋ ሺሼዳ፤ እ አሳ ናጋራ ያርሾ ግድያ ዴሻ ኦርግያ አኪደ ሹኬዳ፤ ካሰ ባረዋዳንካ ኡንቱንቱ ናጋራዉ ያርሼዳ። ቃይ እ ጹግያ ያርሹዋ መህያ አሂደ፥ ዎጋይ አዛዝያዋዳን ኦደ ያርሼዳ። ካ ያርሹዋካ ሺሼዳ፤ አፐ እት ኮጵያ ግድያዋ አኪደ፥ ዎንታ ዎንታ ጹግያ ያርሹዋፐ ሀራ አ ቦላን ዎደ ጹጌዳ።

አሮን ቃይካ አሳ እትፐተ ያርሾ ኮሩማነ ዶርሳ ኦርግያ ሹኬዳ፤ አ አቱማ ናናይ ሱ አዉ አሄድኖ፤ እ ሄ ሱ አኪደ፥ ያርሽያ ሳኣ ምይያ ኡባ ጉሴዳ።2 ቃይ ኮሩማነ ዶርሳ ኦርግያ አሹዋፐ ሞዋ፥ ናስያ፥ ቃን አሹዋ ማዬዳ ሀንዳ፥ ክላሆቱዋነ ትርያ ጼራ ቦላ ደእያ ሞያ አሮና ናናይ አዉ አሄድኖ። ኡንቱንቱ ሄ ሀንዳ አንጎሱዋ ቦላ ዎና፥ አሮን ያርሽያ ሳኣ ቦላን ሄዋ ጹጌዳ። ሽን ሙሴ አዛዜዳዋዳን፥ አሮን አንጎሶቱዋነ ኡሸቻ ገድያ ቃያ ያርሹዋ ኦደ፥ መና ጎዳ ስንን ቃዳ።

ሄዋፐ ጉይያን፥ አሮን ባረ ኩሽያ አሳኮ ዛር ደንደ ኡንቱንታ አንጄዳ። እ ናጋራ ያርሹዋ፥ ጹግያ ያርሹዋነ እትፐተ ያርሹዋ ያርሾዋፐ ጉይያን፥ ያርሽያ ሳኣፐ ዱገ ዎዳ።3 ሙሴነ አሮን መና ጎዳ ዱንካንያ ግዶ ገሌድኖ፤ ኡንቱንቱ ሄዋፐ ከሴዳ ዎደ፥ አሳ አንጄድኖ። ያትና መና ጎዳ ቦንቹ አሳ ኡባዉ ቤቴዳ። መና ጎዳ ስንፐ ታማይ ዎደ፥ ያርሽያ ሳኣ ቦላን ደእያ ጹግያ ያርሹዋነ ሞያ ሜዳ። አሳይ ኡባይ ሄዋ በኤዳ ዎደ እልሌዳ፤ ቃይ ኡንቱንቱ ባረንቱ ሶምኡዋን ሳኣ ቦቺደ ጉፋኔድኖ።

Source notes (3)
  1. Cross-reference እብራ. 7:27
  2. Cross-reference ዎጋ 3:1-11
  3. Cross-reference ፓይ. 6:22-26

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.