Dawro Full Bible Ethiopic
ዎጋ 6
መና ጎዳይ ሙሴዉ ሀዋዳን ያጌዳ፤1 “መና ጎዳይ ኦንነ ናጋራ ኦደ ባረ ሾሩዋ ዎርዶቲደ ጭሞፐ ሀዋፐ ካሊደ ደእያ ህገቱዋ እሜዳ: ሾሩዋ ማታን ሀዳራ ዎባ ዎይ ኦይደ ታልኤዳባ ካዶፐ፥ ዎይ አሳዋ ቦንቆፐ፥ ዎይ ባረ ሾሩዋ ቦላን ሱገ ኦፐ፥ ዎይ ባዬዳዋ ደሚደ ታ በአበይከ ጎፐነ ዎርዱዋን ጫቆፐ፥ ሀዋንታ ማላትያዋንቱፐ እቱዋ ኦፐ፥ እ ሀቃዋነ ግዶ፥ ኦደ፥ ሄዋን ናጋራንቻ ግዶፐ፥ ባረ ቦንቂ አኬዳዋ፥ ዎይ ኦይና ካዲደ አኬዳዋ፥ ዎይ ሀዳራ እሜዳዋ ዎይ፥ ባይና ደሜዳዋ፥ ዎይ ዎርዱዋን ጫቂ አኬዳዋ ኡባካ አ ጎዳዉ ዛሮ። ቃይ ባረ ናቁዋ ያርሹዋ ያርሽያ ጋላስ ባረ አኬዳዋ ቦላ ጼቱዋፐ ላታሙ ኩሽያ ጉጂደ አ ጎዳዉ እሞ። ቃይካ ባረ ናቁዋ ድራዉ መና ጎዳዉ ያርሽያ ያርሾ ባረ ዉድያ ግዶፐ ትላ ቦላና ደእያ እት ዶርሳ ኦርግያ ቄስያኮ አሆ። ሄ ዶርሳ ጋቲ ሱረ ቆፈቴዳዋ ግዶ። ቄሲ ሄ ዶርሳ መና ጎዳ ስንን ያርሺደ፥ ብታንያ ናቁዋ አቶ ጊሴ፤ ብታኒካ ባረ ናቁዋ ኡባፐ ማረታናዋ” ያጌዳ።
ዉርስ ጹግያ ያርሹዋ
መና ጎዳይ ሙሴዉ ሀዋዳን ያጊደ ኦዴዳ፤ “አሮናነ አ አቱማ ናናቱዋ ሀዋዳን ያጋደ አዛዛ፤ ‘ጹግያ ያርሾ ደእያ ዎጋይ ሀዋ: ጹግያ ያርሹ ቃማይ ዎንታና ጋካናዉ ያርሽያ ሳኣን ደኦ። ታማይካ ያርሽያ ሳኣን ኡባ ዎደ ኤጺደ ደኦ። ቄሲ ሊኑዋፐ ዳደቴዳ ቃምሽያነ ሱርያ ማዪደ፥ ጹግያ ያርሹዋ ታማይ ም ስምና አቴዳ ብድን ደንደ፥ ያርሽያ ሳ ምይያን ላሎ። ሄዋፐ ጉይያን፥ ሄ ማዩዋ ቃር ዎ ሀራ ማዩዋ ማዪደ፥ ሄ ብድን ዱንካኔዳ ሳኣፐ ጋጻ አፊደ፥ ህግያዳን ጌዬዳ ሳኣን ቆሎ። ያርሽያ ሳኣ ቦላ ደእያ ታማይ ቶኤናን ኡባ ዎደ ኤጺደ ደኦ። ቄሲ ዎንታ ዎንታ ም አን ጉጅ ጉጂደ ዎ። ጹግያ ያርሹዋካ ሄ ም ቦላ ማራን ዎደ፥ እትፐተ ያርሹዋ ሀንዳ አ ቦላ ጹጎ። ታማይ ያርሽያ ሳኣ ቦላ ኡባ ዎደ ኤጺደ ደኦ፤ ቶአናዉ ኮሸና።
ካ ያርሹዋ
“ ‘ካ ያርሾ እመቴዳ ዎጋይ ሀዋ: አሮና አቱማ ናና ግድያ ቄሳቱ ያርሽያ ሳኣፐ ስን ባጋና መና ጎዳ ስንን ሺሽኖ። ቄሲ ሎኦ ልያፐ ኮጵያዋነ ዛይትያ አኪደ፥ ካ ያርሹዋ ቦላ ደእያ እጻና ኡባካ ደንደ፥ መና ጎዳዉ ሳዉዋ ቶሹኩ ግያ ያርሹዋ ኦደ፥ ሀሳይስያዋ ግዳናዳን ያርሽያ ሳኣ ቦላ ጹጎ። ሄዋፐ አቴዳዋ አሮንነ አ አቱማ ናናይ ሚኖ፤ ሄዋ ኡንቱንቱ እርሹ የገትቤና ኡክ ኦ ኡኪደ፥ ዱንካንያ ዳባባ ግዶን ደእያ ጌሻ ሳኣን ሚኖ። ሄ ኡክይ እርሹዋ የገናን ኡከቶ። ሄዋ ታዉ ታማን ጹግያ ያርሹዋፐ ኡንቱንታ ጋክያዋ ታን ኡንቱንቶ እማድ። ናጋራ ያርሹዋዳንነ ናቁዋ ያርሹዋዳን እካ ሎይደ ጌሻ። መና ጎዳዉ ታማን ጹግያ ያርሹዋፐ ኡንቱንታ ጋክያዋ ግድያ ድራዉ፥ ይያ ላይቱዋንካ አሮና ዛረ ግድያ አቱማዋንቱ ኡባይ ሄዋ ሚኖ። ሄ ያርሹዋ ቦችያ አያይነ ጌሻ ግዳና’ ያጋ” ያጌዳ።
ቄስያ ካፑዋ ሱንያ ዎደ ያርሸትያ ካ ያርሹዋ
መና ጎዳይ ቃይካ ሙሴዉ ሀዋዳን ያጊደ ኦዴዳ፤ “አሮንነ አ አቱማ ናናቱዋፐ ቄሳተ ካፖተዉ ኦከትያ ጋላስ ላኡ ኪሎ ግራመ ግድያ ሎኦ ልያ ካ ያርሹዋ ኦደ መና ጎዳዉ አህኖ። ሄዋፐ ባጋ ዎንታ፥ ባጋ ኦማርስ ያርሽኖ። ሄ ሊ ዛይትያን ሙናቀት ሎኦ ዋላከቲደ ባሽያን ኡከቶ፤ ቡንቻደ፥ ሳዉዋ ቶሹኩ ግያ ካ ያርሹዋ ኦደ መና ጎዳዉ ሺሻ። ቃይ አሮና አቱማ ናናቱዋፐ አ ቄሰተ ካፖተ ኦሶ ኦከትያ ኡባይካ ሄ ዎጋ ኦኖ። ሄዌ መና ጎዳዉ ኡባ ገደ ያርሽያ ያርሹዋ ግዲደ ኡባና ጹገቶ። ቄሲ ሺሽያ ካ ያርሹዋፐ ጉየ አተናን ዉር ጹገቶ፤ አፐ አያይነ ሜተቶፖ” ያጌዳ።
ናጋራ ያርሹዋ ዎጋ
መና ጎዳይ ሙሴዉ ሀዋዳን ያጊደ ኦዴዳ፤ “አሮናሳነ አ አቱማ ናናቶ፥ ሀዋዳን ያጋ፤ ‘ናጋራ ያርሹዋ ዎጋይ ሀዋ: መና ጎዳዉ ጹግያ ያርሾ ሺሽያ መሂ ሹከትያ ሳኣን ናጋራ ያርሾ ሺሽያ መሂካ ሄዋን ጾሳ ስንን ሹከቶ፤ እካ ጌሻ ያርሹዋ ኡባፐ እቱዋ ግዴዳ ጌሻ ያርሹዋ። ሄ ያርሹዋ ያርሽያ ቄሲ ዱንካንያ ዳባባ ግዶን ደእያ ጌሻ ሳኣን ሞ። ሄ አሹዋ ቦችያ አያይነ ጌሻ ግዳናዋ፤ ቃይ ሹክሺን አይ ማዩዋ ቦላነ ሱይ ጨቶፐ፥ ሄ ማዩ ጌሻ ሳኣን ሜጨቶ። አሹ ዶይሰቴዳ ኡርቃ ሚሻይ መኦ፤ ማዳብያ ብራታ ድስትያን ዶይሴዳዋ ግዶፐ፥ ሄ ድስትያ ቃጪደ ሃን ሾክ ድጋናዉ ኮሼ። ቄሳቱዋ ዛርያፐ አቱማ አሳ ግዴዳ ኦንነ ሄ አሹዋ ሞ፤ ሄ አሹ ጌሻ ኡባፐ እቱዋ ግዴዳ ሎይ ጌሻ። ግዶ ሽን ጌሻ ሳኣን ናጋራ አቶ ጊሳናዉ አ ሱ አኪደ፥ ዱንካንያ ግዶ ገልሴዳ አይ መህያ አሹዋነ ማናዉ ኮሸና፤ እ ታማን ጹገታናዉ ኮሼ።
Source notes (1)
- Cross-reference ፓይ. 5:5-8
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.