Skip to content
BibleKenya

Dawro Full Bible Ethiopic

ዎጋ 4

ቆፐናን ኦዳ ናጋራ ያርሹዋ

መና ጎዳይ ሙሳ ሀዋዳን ያጌዳ፤ “ኔን እስራኤልያ አሳዉ ሀዋዳን ያጋደ ኦዳ፤ ‘ኦንነ ቆፐናን ናጋራ ኦፐነ፥ መና ጎዳ አዛዞቱዋፐ እቱዋ ሀቃዋነ መንፐ፥ ሀዋፐ ካሊደ ደእያ ዎጋ ናጎ።

“ ‘ቄስያ ካፑ ናጋራ ኦፐነ ሄ ናጋራይ አሳ ባይዛንቻ ከስያዋ ግዶፐ፥ እ ባረ ኦዳ ናጋራ ድራዉ፥ ትላ ቦላና ደእያ ኮሩማ መና ጎዳዉ ናጋራ ያርሹዋ ኦደ አሆ። ሄ ኮሩማ መና ጎዳ ዱንካንያ ፐንገ አደ፥ ኮሩማ ሁጲያን ባረ ኩሽያ ዎደ፥ መና ጎዳ ስንን ሹኮ። ቄስያ ካፑ ኮሩማ ሱፐ አማሬዳዋ አኪደ፥ መና ጎዳ ዱንካንያ አፎ። ባረ ኩሽያ ብራያ ሱን ቱሽ ቱሽ ከሲደ፥ መና ጎዳ ዱንካንያ ጋርዱዋ ስንን መና ጎዳ ስንን ላፑ ገደ ዱኮ። ሄዋፐ ጉይያን፥ ቄስያ ካፑ አማሬዳ ሱ አኪደ፥ መና ጎዳ ዱንካንያ ግዶን መና ጎዳ ስንን ሳዊያ እጻና ጩውስያ ሳጽንያ ቦላ ደእያ ካጨቱዋ ቦላ ጾክሶ። አቴዳ ሱ ቃይ ጾሳ ዱንካንያ ገልያ ሳኣ ባጋና ደእያ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። ናጋራ ያርሾ ሹከቴዳ ሀ ኮሩማ ሞዋ ኡባ፥ ቃን አሹዋ ማዬዳ ሀንዳነ ኡንቱንታ ጋ ኦይያ ሞዋ፥ ላኡ ክላሆቱዋ፥ ኡንቱንታ ማዬዳ ሀንዳነ ጋይልያ ማታን ደእያ ሞያነ ትርያ ጼራ ቦላ ደእያ ሞያ ክላሆቱዋና እትፐ ከሲደ አኮ። እትፐተ ያርሾ ሹከቴዳ ኮሩማፐ አኬዳ ሞዋዳን አኮ። ቄስያ ካፑ ጹግያ ያርሹዋ ያርሽያ ሳኣ ቦላን ጹጎ። ሽን ኮሩማ ጋልባ፥ አ አሹዋ ኡባ፥ አ ሁጲያነ፥ አ ገደቱዋ፥ ቃን አሹዋ፥ ቶጭያ፥ ኮሩማ አሹዋፐ አቴዳዋ ኡባ ዱንካኔዳ ሳኣፐ ካረ ከሲደ፤ ብድን ቆልያ ዎጋዳን ጌሻ ግዴዳ ሳኣ አፎ፤ ያን ም ታማን ጹጎ።

“ ‘እስራኤልያ ማባራይ ኡባይ ቆፐናን ናጋራ ኦፐነ፥ መና ጎዳ አዛዞቱዋፐ እቱዋ ሀቃዋነ መንፐ፥ ኡንቱንቱ ባይዛንቻ ግዲደ ፓይደታና። ኡንቱንቱ ኦዳ ናጋራይ ኤረትያ ዎደ፥ ናጋራ ያርሾ ሀንያ ኮሩማ ጾሳ ዱንካንያ ስን አህኖ። ሄ ማባራ ጭማቱ መና ጎዳ ስንን ባረንቱ ኩሽያ ኮሩማ ሁጲያ ቦላን ዎደ፥ ሄ ኮሩማ መና ጎዳ ስንን ሹክኖ። ሄዋፐ ጉይያን፥ ቄስያ ካፑ ኮሩማ ሱፐ ጉ አኪደ፥ ጾሳ ዱንካንያ ግዶ ገሎ፤ እ ባረ ኩሽያ ብራያ ሱን ቱሽ ቱሽ ከሲደ፥ ጋርዱዋ ስን ባጋና መና ጎዳ ስንን ላፑ ገደ ዱኮ። ቃይ አማሬዳ ሱ አኪደ፥ መና ጎዳ ዱንካንያ ግዶን ስንን እጻና ጩውስያ ሳጽንያ ቦላ ደእያ ካጨቱዋ ቦላ ጾክሶ። አቴዳ ሱ ቃይ መና ጎዳ ዱንካንያ ገልያሳ ባጋና ደእያ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። ሞዋ ኡባ አኪደ፥ ያርሽያ ሳኣ ቦላን ጹጎ። ናጋራ ያርሾ ሹከቴዳ ኮሩማ ኦዳዋዳን ሀ ኮሩማካ ኦ። ሄዋዳን ኦደ፥ ቄሲ ናጋራ አቶ ጊስያ ዎጋ ፖላና፤ አሳይካ ናጋራፐ ማረታናዋ። ሄዋፐ ጉይያን፥ ኮሩማ ዱንካኔዳ ሳኣፐ ካረ ከሲደ፥ ካሰ ኮሩማ ጹጌዳዋዳን አካ ጹጎ፤ ሀዌ ማባራ ናጋራዉ ያርሽያ ያርሹዋ።

“ ‘አሳ ካለያ ሱንቱዋፐ እቱ ቆፐናን ናጋራ ኦፐነ መና ጎዳይ አ ጾሳይ አ አዛዜዳ አዛዙዋፐ እቱዋ ሀቃዋነ መንፐ፥ ሄ ኡራይ ባይዛንቻ። እ ባረ ኦዳ ናጋራ ኤሬዳዋፐ ጉይያን፥ ትላ ቦላና ደእያ እት ዴሻ ኦርግያ አሆ። ሄ ዴሻ ኦርግያ ሁጲያን ባረ ኩሽያ ዎደ ጹግያ ያርሹ መና ጎዳ ስንን ሹከትያ ሳኣን ሹኮ፤ ሄዌ ናጋራ ያርሹዋ። ቄስያ ካፑ ናጋራ ያርሹዋ ሱ ግዶ ባረ ኩሽያ ብራያ ቱሽ ቱሽ ከሲደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱ ቃይ ጹግያ ያርሹዋ ያርሽያ ሳኣፐ ጋርሳ ባጋና ደእያ ሳኣን ጉሶ። ሞዋ ኡባ እትፐተ ያርሹዋ ሞዋ ያርሽያዋዳን ያርሽያ ሳኣ ቦላን ያርሾ። ሀዋዳን ኦደ፥ ቄሲ ብታንያ ናጋራ አቶ ጊሴ፤ ብታኒካ ባረ ናጋራፐ ማረታናዋ።

“ ‘ሄ ማባራ አሳፐ እቱ ቆፐናን ናጋራ ኦፐነ መና ጎዳ አዛዙዋፐ እቱዋ ሀቃዋነ መንፐ፥ ሄ ኡራይ ባይዛንቻ ግዲደ ፓይደቴ።1 እ ባረ ኦዳ ናጋራይ አዉ ኤረቴዳዋፐ ጉይያን፥ ትላ ቦላና ደእያ ማጫ ዴሻቶ ባረ ናጋራዉ አሆ። ባረ ኩሽያ ናጋራ ያርሹዋ ኦደ ሹክያ ዴሻት ሁጲያን ዎ፤ ያቲደ ጹግያ ያርሹዋ ያርሽያ ሳኣን ናጋራ ያርሹዋ ኦደ ሹኮ። ሄዋፐ ጉይያን፥ ቄስያ ካፑ ሄ ዴሻት ሱፐ ባረ ኩሽያ ብራያን አኪደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱ ኡባ ያርሽያ ሳኣፐ ጋርሳ ባጋና ደእያ ሳኣን ጉሶ። ሞዋ ኡባ እትፐተ ያርሾ ሹኬዳ መህያፐ ከስያዋዳን፥ ሄ ዴሻት ሞዋካ ቆሪደ ከስ አኪደ፥ ያርሽያ ሳኣ ቦላ ዎደ፥ መና ጎዳዉ ሳዉዋ ቶሹኩ ግያ ያርሹዋ ግዳና ማላ ጹጎ። ሄዋዳን ኦደ፥ ቄሲ ሄ ብታንያ ናጋራ አቶ ጊሴ፤ ብታኒካ ባረ ናጋራፐ ማረቴ።

“ ‘ሄ ብታኒ ባረ ናጋራ ያርሾ ዶርሳ ሺሻናዉ ኮዮፐ፥ ትላ ቦላና ደእያ ማጫውኖ አሆ። እ ባረ ኩሽያ ሄ ዶርሳት ሁጲያን ዎደ ጹግያ ያርሾ ሹክያ መሂ ሹከትያ ሳኣን እዞ ሹኮ። ሄዋፐ ጉይያን፥ ቄሲ ናጋራ ያርሹዋ ግዴዳ ሄ ዶርሳት ሱን ባረ ብራያ ቱሽ ቱሽ ከሲደ፥ ጹግያ ያርሹዋ ያርሽያ ሳኣ ቦላ ደእያ ካጨቱዋ ቦላ ጾክሶ፤ አቴዳ ሱ ቃይ ያርሽያ ሳኣፐ ጋርሳ ባጋና ደእያ ሳኣን ጉሶ። እትፐተ ያርሾ ሹከቴዳ ሞዋ ቃሪደ ከስያዋዳን፥ ሄ ዶርሳት ሞዋካ ቃሪደ ከሶ። ያቲደ፥ ያርሽያ ሳኣ ቦላ መና ጎዳዉ ታማን ጹግያ ያርሹዋ ቦላ ዎደ ጹጎ። ሀዋዳን ኦደ፥ ቄሲ ሄ ብታንያ ናጋራ አቶ ጊሴ። ብታኒካ ባረ ናጋራፐ ማረታናዋ።

Source notes (1)
  1. Cross-reference ፓይ. 15:27-28

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.