Dawro Full Bible Ethiopic
ዎጋ 25
ሳምባታ ላይ
(ዛረ. 15:1-11)
ሲና ደርያ ቦላን መና ጎዳይ ሙሴዉ ሀዋዳን ያጌዳ፤1 “ኔን እስራኤልያ አሳዉ ሀዋዳን ያጋደ ኦዳ፤ ‘ታን ህንተንቶ እምያ ቢታ ህንተ ገልያ ዎደ፥ ቢታይካ መና ጎዳ ሳምባታ ቦንቾ። ኡሱፑን ላይ ኩመን ህንተ ሾይቃን ዘርተ፤ ቃይ ኡሱፑን ላይ ኩመንካ ህንተ ዎይንያ ቱራ ጼራ ጹንቂተ፤ አ አይፍያካ ማጽ አክተ። ሽን ላፑን ላይይ ቢታዉ ሸምፖ ሳምባታ፤ ሄዌ መና ጎዳዉካ ሳምባታ። ሄ ላፑን ላይን ህንተ ሾይቃን ዘሮፕተ፤ ህንተ ዎይንያ ጼራካ ጹንቆፕተ። ህንተ ጋድያን አዛባ ግዲደ ሞክያዋካ ጫኮፕተ፤ ቃይ ጹንቀናን ደእሽን ጮ አይፌዳ ዎይንያካ ሺሾፕተ። ሄ ላይይ ቢታዉ ኡባና ሸምፖ ላይ ግዶ። ሄ ሳምባታ ላይን ቢታይ ኦሰታና ዮፐ ህንተንቶ፥ ህንተ ማጫነ አቱማ ቆማቶ፥ ህንተንቶ ከራ ኦያዋንቶ፥ በቲደ ዪደ ህንተናና ደእያዋንቶ፥ ህንተ መህያዉነ ህንተ ጋድያን ደእያ ዶአቶ ግድያ ቁማ እማና፤ ቢታይ ሞክያባይ ኡባይ ሜተቶ።
ማሮተ ላይ
“ ‘ላይቱዋ ግዶን ደእያ ላፑን ሳምባታቱዋ ፓይዳ፤ ላፑን ሳምባታቱዋ ላይ ፓይዱ ላፑ ገደ ላፑና፤ ሄዌካ ኦይታማነ ኡዱፑን ላይ። ሄዋፐ ጉይያን፥ ላፑን አግናን፥ ታማን ጋላሳን ቦንቼትያ ናጋራ አቶ ጊስያ ጋላሳን ማላካታ ፑንያ አሳ ህንተ ጋድያን ኡባን ኪትተ። እሻታማን ላይ ዱማዪደ፥ ሄ ጋድያን ደእያ ኡባዉ ላአተ አዋይተ። ሄዌ ህንተንቶ እሻታማን ላይ ባላ። ሄ ዎድያን ህንተ ኡባይካ ህንተ ጋድያዉነ ህንተ ያራዉ ያራዉ ስምተ። ሄ ላይይ ህንተንቶ እሻታማን ላይ ባላ። ሄ ላይን ዘሮፕተ፤ አዛባ ግዲደ ሞኬዳዋካ ጫኮፕተ፤ ቃይ ህንተ አ ጼራ ጹንቀናን አይፌዳ ዎይንያ አይፍያካ ሺሾፕተ። ሄዌ እሻታማን ላይ ባላ ግድያ ድራዉ፥ እ ህንተንቶ ጌሻ፤ ጎሸናን ጮ ደምባን ሞኬዳዋ ሚተ።
“ ‘ሀ እሻታማን ላይ ባላ ዎደ አሳይ ኡባይ ባረ ጋድያ ስሞ።
“ ‘ህንተ ህንተ ሾሩዋፐ ጋድያ ሻሞፐ፥ ዎይ ቃይ አዉ ዛልኦፐ፥ እቱ እቱዋ ጭሞፕተ። ህንተ እሻታማን ላይ ባላፐ ጉይያን ደእያ ላይቱዋ ፓይዱዋዳን ህንተ ሾሩዋፐ ሻምተ፤ ህንተ ሾሩካ ቃይ ጋዲ ካ ሞካናዉ ደእያ ላይቱዋ ፓይዱዋዳን ዛልኦ። ላይቱዋ ፓይዱ ዳሮ ግዶፐ፥ ጋቲ ዳሬ፤ ላይቱዋ ፓይዱ ጉጾፐ፥ ጋቲካ ጉጼ። አያዉ ጎፐ፥ ህንተ ጫካና ካ ጫካ ፓይዱዋዳን ህንተ ሾሩ ህንተንቶ ዛልኤ። ህንተ እቱ እቱዋ ጭሞፕተ፤ ሽን ህንተ ህንተ ጾሳዉ ያይተ። ታን መና ጎዳይ፥ ህንተ ጾሳ።
ላፑን ላይ መቱዋ
“ ‘ታ አዛዙዋ ኦተ፤ ታ ህግያካ ናግተነ ኦተ፤ ያቶፐ ህንተ ሀ ጋድያን ሳሮተን ደአና። ቢታይ ባረ አይፍያ ህንተንቶ እማና፤ ህንተ ካላና ጋካናዉ ማና፤ ቃይ ሄ ቢታንካ ህንተ ሳሮተን ደአና። ህንተ፥ “ኑን ዘራና ዮፐ፥ ቃይ ካካ ጫኪደ ሺሻና ዮፐ፥ ላፑን ላይን አያ ማኔ?” ጎፐ፥ ታን ኡሱፑን ላይን ታ አንጁዋ ህንተ ቦላን ኪታና፤ ያቶፐ ቢታይ ሄዙ ላይዉ ግድያ አይፍያ አይፋና። ሆስፑን ላይን ህንተ ህንተ ጋድያን ዘርያ ዎደካ፥ ካሰ ሻቻ ካ ማና፤ ቃይ ህንተ ዘርያ ካ አይፍያ ኡዱፑን ላይን ሺሻና ጋካናዉካ፥ ሻቻ ካ ማና።
አቁዋ ዛርያ ዎጋ
“ ‘ቢታይ ታዋ ግድያ ድራዉነ ህንተካ ሀ ጋድያን እማነ በተ ግዲደ ደእያ ድራዉ፥ ቢታ ላኤን ስመናዳን ባይዞፕተ። ህንተ ኦይቄዳ ጋድያን ኡባን ደእያ ጋድያ ጎዳቱ ዎዛና ማላ፥ ኡንቱንቱ ማታ ናጋናዉ ኮሼ።
“ ‘ነ እሻይ ህዬሲደ ባረ ጋድያፐ ዛልኦፐ፥ አዉ ማታትያ ዳቡ ዪደ፥ ሄ ጋድያ አዉ ዎዞ። አዉ ሄ ጋድያ ዎዝያ ዳቡ ዮፐ፥ ቃይ እካ ስም ዱረቲደ ዎዝያ ሚሻ ደሞፐ፥ ባረ ዛልኤዳ ዎድያፐ ዶሚደ ደእያ ላይ ፓይዲደ፥ አቴዳ ላይ ሚሻ ሻሜዳዎ ዛሮ፤ ያቲደ እ ባረ ጋድያዉ ስሞ። ሽን አዉ ሄ ጋድያ ዎዛናዉ ግድያ ሻሉ ዮፐ፥ እሻታማን ላይ ባላይ ጋካናዉ ጋዲ ሻሜዳ ብታንያ ኩሽያን ጋምኦ፤ እሻታማን ላይ ባላ ዎደ፥ አ ጋዲ አዉ ስሞ፤ እካ ባረ ጋድያዉ ስሞ።
“ ‘ግምበት ኡቴዳ ካታማ ግዶን እት አሳይ ደእያ ጎልያ ሀራ ኡራዉ ዛልኦፐ፥ እ ዛልኦሳፐ ቢደ እት ላይ ጋካናዉ ደእያ ዎድያን ዛሪደ ዎዛናዉ አዉ ማታይ ደኤ። እት ላይ ኩመን ግዶን ዎዛና ዮፐ፥ ሄ ግምበቴዳ ካታማ ግዶን ደእያ ጎሊ ሻሜዳዎ ናኣ ናአዉ መናዉ አዋ ግዴ። እሻታማን ላይ ባላ ዎደካ ስመና። ሽን ግምበትቤና ሄራቱዋን ደእያ ጎለቱ ሾይቃ ማላ። ኡንቱንቱ ዎዘቲኖ፤ እሻታማን ላይ ባላ ዎደካ ዛልኤዳዎ ስሚኖ።
“ ‘ግዶፐነ ሌዋቱዋ ካታማቱዋን ደእያ ባረንቱ ጎልያ ሌዋቱ ባረንቱ ኮዬዳ ዎድያን ዎዝ አካናዉ ዳንዳዪኖ። ሌዋቱዋፐ እት አሳይ ኡንቱንቱ ካታማ ግዶን ደእያ ጎልያ ዛልኢደ ዎዛና ዮፐ፥ ሄ ኡንቱንቱ ካታማ ግዶን ደእያ ጎሊ እሻታማን ላይ ባላ ዎደ ስሜ። አያዉ ጎፐ፥ ሌዋቱዋ ካታማ ግዶን ደእያ ጎለቱ እስራኤልያ አሳ ግዶን ሌዋቶ አቆ። ሽን ኡንቱንቱ ካታማ ዩሹዋን ኡንቱንቱ ኡባዉ እትፐ ደእያ ቢታይ ኡንቱንቶ መናዉ አቆ ግድያ ድራዉ ዛልኤተና።
ማንቄዳ አሳዉ ታልእያዋ
“ ‘ቃይ ነ እሻይ ህዬሲደ ባረና ዳንዳያና ዮፐ፥ እማዳንነ በትያዳን እ ኔናና ደአና ማላ፥ ኔን አ ማዳ።2 ነ እሻ ኔናና ዎናዉ አፐ ድቻ አኮፓ፤ ዎይ ዎያ ሞፓ። ሽን ኔን ነ ጾሳዉ ያያ። ነ ብራ አዉ ድቻዉ ታልኦፓ፤ ነ ቁማካ አዉ ዎያን ዛልኦፓ።3 ህንተዉ ካናነ ቢታ እማናዉነ ህንተ ጾሳ ግዳናዉ፥ ህንተና ግብጼ ጋድያፐ ከሴዳዌ፥ ታን መና ጎዳይ፥ ህንተ ጾሳ።
አይለቱ አይለተፐ ከስያዋ
“ ‘ነዉ ዳቦ ግድያ እስራኤልያ አሳይ ማንቂደ፥ ባረና ነዉ አይለተዉ ዛልኦፐ፥ ኔን አ አይልያዳን ኦስሶፓ።4 እ ከራ ኦያ አሳዳንነ በትያዳን ኔናና ደኦ፤ እሻታማን ላይ ባላይ ጋካናዉ እ ነዉ ኦ። ሄ ዎደ እ ባረ ናናቱዋናካ እትፐ ነ ጎለፐ ከሲደ ባረ ጎልያ አሳኮ ቦ፤ ባረ አዉዋ ጋድያኮካ ስሞ። እስራኤላቱ ታን ግብጼ ጋድያፐ ከሴዳ ታ አይለቱዋ ግድያ ድራዉ፥ ኡንቱንቱ አይለተዉ ዛልኤቶፕኖ። ኔን ኡንቱንቶ መቀ ኢታደ ሞዶፓ፤ ሽን ኔን ነ ጾሳዉ ያያ።
“ ‘ነዉ አቱማነ ማጫ አይለቱ ደአና ማላ ኮዮፐ፥ ነ ዩሹዋን ደእያ ካዉተቱዋፐ ሻማ። ቃይ ህንተ ጋድያን ደእያ በተቱዋፐነ ህንተ ጋድያን ደእሽን የለቴዳ ኡንቱንቱ ሶ አሳፐ ሻማናዉ ዳንዳዪታ፤ ኡንቱንቱ ህንተንቶ አቆ ግድኖ። ህንተፐ ጉይያን ህንተ ናናይ ኡንቱንታ መናዉ ላታና ማላ፥ ህንተ ናናዉ እምተ። ህንተ ኡንቱንቱፐ ኡባ ዎደካ አይልያ ሻማናዉ ዳንዳዪታ፤ ሽን ህንተ እሻ ግድያ እስራኤልያ አሳ መቀ ኢሲደ ሞዶፕተ።
“ ‘ነ ማታን ደእያ እማ ዎይ በተ አሳይ ዱረትና፥ ቃይ አ ማታን ደእያ ነ እሻይ ማንቂደ፥ ሄ ነ ማታን ደእያ እማዉ ዎይ በትያዉ ዎይ እማ ብታንያ ዛርያፐ እቶ ባረና ዛልኦፐ፥ እ ዛልኤት ስምና አ ዎዛናዉ ዳንዳየቴ፤ አ እሻቱዋፐ እቱ አ ዎዞ። ዎይ አ አዉዋ እሻይ፥ ዎይ አ አዉዋ እሻ ናአይ አ ዎዞ፤ ዎይ አ ያራፐ አዉ ማታ ዳቦ ግድያ አሳይ አ ዎዞ፤ ዎይ ቃይ እ ባረ ሁጲያዉ ዱረቶፐ እ ባረና ዎዞ። እ ባረና ሻሜዳ ብታንያና እትፐ ግዲደ፥ እ ባረና ዛልኤዳ ላይፐ ዶሚደ እሻታማን ላይ ባላይ ጋካናዉ ደእያ ላይ ፓይዶ፤ አ ብልያ ጋቲ ሄ ላይ ፓይዱዋ ኬሻ ግዶ። እ ባረና ሻሜዳዋና ጋምኤዳ ዎድያ ጋቲ እት አሳይ ከራ ኦደ ደምያ ሚሻ ኬሻ ግዶ። እሻታማን ላይ ባላይ ጋካናዉ ብሮ ዳሮ ላይይ አቴዳዋ ግዶፐ፥ ባረ ዛልኤቴዳ ጋትያፐ ሄ ላይ ፓይዱዋን ባረና ዎዝያ ጋትያ ጭጎ። ቃይ እሻታማን ላይ ባላይ ጋካናዉ አቴዳ ላይይ ጉ ግዶፐ፥ ባረና ሻሜዳዋና እትፐ ፓይዲደ፥ ሄ ላይ ፓይዱዋን ባረና ዎዝያ ጋትያ ጭጎ። እ ላይን ላይን ከራ ኦያ አሳዳን ባረና ሻሜዳዋና ደኦፐ አትና፥ ህንተ ጼሊደ እስራኤልያ አሳ ግድያ ብታንያ መቀ ኢሲደ ሞዶፕተ።
“ ‘ሽን እ ሄዋ ማላ ኦግያን ዎዘታና ዮፐ፥ እሻታማን ላይ ባላይ ጋክያ ዎደ እነ አ ናናይ ቆማተፐ ከስኖ። አያዉ ጎፐ፥ እስራኤልያ አሳይ ታ ቆማቱዋቴ፤ ታን ግብጼ ጋድያፐ ከሴዳ ታ ቆማቱዋ። ታን፥ መና ጎዳይ፥ ህንተ ጾሳ’ ያጋ” ያጌዳ።
Source notes (4)
- Cross-reference ከሳ 23:10-11
- Cross-reference ዛረ. 15:7-8
- Cross-reference ከሳ 22:25፤ ዛረ. 23:19-20
- Cross-reference ከሳ 21:2-6፤ ዛረ. 15:12-18
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.