Dawro Full Bible Ethiopic
ዎጋ 22
እሞታ ጌሻተ
መና ጎዳይ ሙሳ ሀዋዳን ያጌዳ፤ “ታ ጌሻ ሱን ኡንቱንቱ ቱንሰና ማላ፥ እስራኤልያ አሳይ ታዉ ዱማዬዳ እሞታ አሮንነ አ አቱማ ናናይ ቦንቹዋን አኪደ፥ ጌሻተን ናጋና ማላ፥ ኡንቱንቶ ኦዳ። ታን መና ጎዳ።
“ኡንቱንቶ ሀዋዳን ያጋ፤ ‘ስንና ይያ የለታ ኡባን ህንተ ዛርያፐ ኦንነ ቱን ኡቲደ፥ እስራኤልያ አሳይ መና ጎዳዉ ዱማዬዳ ጌሻ ያርሹዋኮ ሺቆፐ፥ ሄ አሳይ ታ ስንፐ ቦሄቶ። ታን መና ጎዳ።
“ ‘አሮና ዛርያፐ ዎልቃማ ጋልባ ሀርጊ ደእያ፥ ዎይ ቦላፐ አያይኔካ ጎግያ ኦንነ ጌያና ጋካናዉ፥ ጌሻ ያርሹዋፐ ሞፖ። አሃ ቦቺደ ቱኔዳዋ ዎይ አ አቱማተፐ ዘረይ ጉኬዳ ኡራ ቦችያ ኦንነ ቱና። ዎይ ቃይ ሳኣና ጎሸትያ፥ ቱንስያዋንታ፥ ዎይ አይ ማላ ቱናተ ግዶፐነ ቱንስያ አሳ ቦችያ ኡራይ፥ ዎይ ሄዋ ማላባ አያነ ቦችያ አሳይ፥ ኦማርስ ጋካናዉ እ ቱና፤ ባረ ቦላ ሃን ሜጨተናን ደኢደ፥ ሄ ጌሻ ያርሹዋፐ እ ማናዉ ኮሸና። አዋይ ዉልያ ዎደ እ ጌሻ ግዴ፤ ሄዋፐ ጉይያን፥ ሄ ጌሻ ያርሹዋፐ ባረና ጋክያዋ ሞ ጋሱካ ሄዌ አ ቁማ። ባረዉ ሀይቄዳዋ ዎይ ዶአይ ዎዳ መህያ አሹዋ ሞፖ፤ ሄዌ ቱንስያባ። ታን መና ጎዳ።
“ ‘ቄሳቱ ታ ዎጋ፤ ናገናን እጾፐ፥ ኡንቱንቱ አ ቱንሲደ አ ናጋራን ሀይቃና። ኡንቱንታ ጌሽያዌ ታና መና ጎዳ።
“ ‘ሄ ጌሻ ያርሹዋ ቄስያ ሶ አሳፐ አትና፥ ሀራ አሳይ ሞፖ፤ ቄስያ ሶ ዬዳ እማ ግድና፥ ዎይ ቃጻረቲደ ኦያ ቆማ ግድናካ ሞፖ። ሽን ቄሲ ባረ ብራን ሻሜዳ አይልያ ዎይ አ ሶን የለቴዳ አይሊ ሄ ቁማፐ ሞ። ቄስያ ግደና ሀራ አሳ ገሌዳ ቄስያ ናታ ሄ ጌሻ ያርሹዋፐ ሙፑ። ሽን ቄስያ ናታ አስናይ ሀይቂና፥ ዎይ አስናይ የድና፥ ናኣ የለናን ካሰ ባረ ዎዶሮተን ደእያዋዳን ስማደ ባረ አዉዋ ጎለ ዮፐ፥ አ ባረ አዉዋ ጋክያ ቁማፐ ሙ። ሽን ሀራ አሳይ ኦንነ ሄዋፐ ሞፖ።
“ ‘እት አሳይ ኤረናን ደኢደ ጌሻ ያርሹዋፐ ሞፐ፥ ሄ እ ሜዳ ቁማ ጋትያ ቦላ ጼቱዋፐ ላታሙ ኩሽያ ጉጂደ ቄስያዉ እሞ። እስራኤልያ አሳይ መና ጎዳዉ ያርሽያ ጌሻ ያርሹዋ ቄሳቱ ቱንሶፕኖ። ኡንቱንቱ ባረንቱ አሄዳ ጌሻ ያርሹዋ ባረዉ ሚደ፥ ባረንቱ ናጋራን ኦሸታናዳን፥ ቄሳቱ ኦናዉ ኮሸና። አያዉ ጎፐ፥ ኡንቱንታ ጌሽያዌ፥ ታን መና ጎዳ ያጋ’ ” ያጌዳ።
አከተና ያርሾቱዋ
መና ጎዳይ ሙሳ ሀዋዳን ያጌዳ፥ “አሮናዉ፥ አ ናናቶነ እስራኤልያ አሳ ኡባዉ ሀዋዳን ያጋደ ኦዳ፤ ‘እስራኤልያ አሳፐ ግድና ዎይ ኡንቱንቱ ግዶን ደእያ በትያፐ ኦንነ መና ጎዳዉ ጹግያ ያርሹዋ ባረ ዶሱዋን ጮ እምያ ዎይ ባረ ሺቆዋ ጋናዉ ያርሽያ ዎደ፥ ሄ ያርሹ አከታና ማላ፥ ኮሩማፐ ዎይ ዶርሳፐ ዎይ ዴሻፐ ትላ ቦላና ደእያ አቱማዋ ግዶ። ቦላይ ትላ ግደናዌ አያ ግዶፐነ አከተና ድራዉ፥ ሄዋ ሺሾፓ።1
“ ‘ቃይ ኦና ግዶፐነ ባረ ሺቆዋ ጋናዉ እትፐተ ያርሹዋ ጾሳዉ ያርሽያ ዎደ፥ ዎይ ባረ መህያፐ ባረ ዶሱዋን ጮ እምያ እሞታ መና ጎዳዉ ሺሽያ ዎደ፥ ሄዌ አከታና ማላ እ ትላ ቦላና ደእያዋ ግዶ። ህንተ መህያፐ ቆቅያ፥ ዎይ መኡዋ፥ ዎይ ጉንዳ፥ ዎይ ጊይያ ማይይ፥ ዎይ ፑሱ፥ ዎይ እላሁ ደእያዋ መና ጎዳዉ ያርሾፕተ፤ ቃይ ታማን ጹግያ ያርሹዋ ኦደካ ያርሽያ ሳኣ ቦላን መና ጎዳዉ ሺሾፕተ። አ ቦላን ፓጫ መታይ ዎይ ፓጫባይ ደእያ ኮሩማ ዎይ ዶርሳ እት አሳይ ባረ ዶሱዋን ጮ እምያ ያርሾ ሺሻናዉ ዳንዳዬ፤ ሽን ሺቁ ጋ ግዶፐ፥ ሄዌ አከተና። ሳንግሰቴዳዋ ዎይ ቆጸቴዳዋ ዎይ ካይ ማይቴዳዋ ዎይ ቃንጸቴዳዋ መና ጎዳዉ ያርሾፕተ። ህንተ ጋድያን ሄዋ ማላባ ኦፕተ። ህንተ ግዶን ደእያ አላጋ አሳቱዋፐ አኬዳ ሄዋ ማላ መህያካ ህንተ ጾሳዉ ቁማ ኦደ ሺሾፕተ። ኡንቱንቱ ቦላይ ትላ ግደናዋ ጋሱዋን ኡንቱንቱን ፖኩ ደእያ ድራዉ፥ ኡንቱንቱ ህንተ ድራዉ አከትክኖ’ ያጋ” ያጌዳ።
ቃይካ መና ጎዳይ ሙሳ ሀዋዳን ያጌዳ፥ “ሚዛ ማራይ ዎይ ዶርሳ ማራይ ዎይ ዴሻ ማራይ የለትያ ዎደ፥ ላፑን ጋላሳ ባረ ዳይና ጋምኦ። ሆስፑን ጋላሳፐ ዶሚደ፥ መና ጎዳዉ ታማን ጹጊደ ሺሽያ ያርሾ ኦደ ሺሻናዉ ዳንዳየቴ። ምያቶ፥ ዶርሳቶ፥ ዎይ ዴሻቶ እ ማራና እት ጋላስ ሹኮፕተ።
“ህንተ ጋላታ ያርሹዋ መና ጎዳዉ ሺሽያ ዎደ፥ ህንተ ያርሹ አከታናዳን ያርሽተ። ሄ ያርሹ ሄ ጋላስካ ሜተታናዉ ኮሼ፤ አፐ አያነ ዎንትዉ አሾፕተ። ታን መና ጎዳ።
“ታ አዛዙዋ ናግተነ ኦተ። ታን መና ጎዳ። ቃይ ታ ጌሻ ሱን ህንተ ቱንሶፕተ፤ እስራኤልያ አሳ ግዶን ታን ጌሻ ግድያዌ ኤረታናዉ በሴ። ህንተና ጌሽያዌ፥ ታን መና ጎዳ። ህንተዉ ጾሳ ግዳናዉ፥ ህንተና ግብጼ ጋድያፐ ከሴዳዌ ታና። ታን መና ጎዳ” ያጌዳ።
Source notes (1)
- Cross-reference ዛረ. 17:1
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.