Dawro Full Bible Ethiopic
ዎጋ 18
ድገቴዳ ማጫነ አቱማ አሳ ግሱዋ
መና ጎዳይ ሙሳ ሀዋዳን ያጌዳ፤ “እስራኤልያ አሳ ሀዋዳን ያጋ፤ ‘ታን፥ መና ጎዳይ፥ ህንተ ጾሳ። ህንተ ካሰ ደኤዳ ግብጼ ቢታ አሳይ ኦያዋዳን ኦፕተ፤ ዎይ ሀእ ታን ህንተና አፍያ ካናነ ቢታ አሳይ ኦያዋዳንካ ኦፕተ፤ ኡንቱንቱ ዎጋካ ካሎፕተ። ህንተ ታ አዛዙዋ ኦተ፤ ታ ዎጋካ ናግተ፤ ቃይ አን ቢተ። ታን፥ መና ጎዳይ፥ ህንተ ጾሳ። ሄዋ ድራዉ ታ አዛዙዋነ ታ ዎጋ ናጎፐ፥ ህንተ ፓጻ ደአና። ታን መና ጎዳ።1
“ ‘ህንተፐ ኦንነ አሹዋ አሙዋ ፖላናዉ ባረ ማታ ዳቡዋና ግሶፖ። ታን ጾሳ። ነ አሹዋ አሙዋ ፖላናዉ ነ ዳይና ግሶፓ፤ ነ አዉዋ ካዉሾፓ። እዛ ነ ዳዮ፤ ኢናና ግሶፓ። ነ አሹዋ አሙዋ ፖላናዉ ነ አዉዋ ማቻትና ግሶፓ፤ ነ አዉዋ ካዉሾፓ።2
“ ‘ነ አሹዋ አሙዋ ፖላናዉ ነ ምቻትና ግሶፓ፤ ዎይ ቃይ ሶን የለቴዳ ዎይ ካረን የለቴዳ ነ አዉዋ ዎይ ነ ዳይ ናትናካ ግሶፓ።3
“ ‘ነ አሹዋ አሙዋ ፖላናዉ ነ ናኣ ናትና ዎይ ነ ናት ናትና ግሶፓ። ነ ሁጲያዉ ኔና ካዉሻሳ። ነ አሹዋ አሙዋ ፖላናዉ ነ አዉዋ ማቻት ናትና ግሶፓ፤ እዛ ነ ምቻቶ ግድያ ድራዉ ኢናና ግሶፓ። ነ አሹዋ አሙዋ ፖላናዉ ነ አዉዋ ምቻትና ግሶፓ። እዛ ነ አዎ ማታ ዳቦ።4 አሹዋ አሙዋ ፖላናዉ ነ ዳይ ምቻትና ግሶፓ፤ እዛ ነ ዳይዉ ማታ ዳቦ። ነ አዉዋ እሻ ካሉዋ ቃራደ ነ አሹዋ አሙዋ ፖላናዉ አ ማቻትና ግሶፓ፤ እዛ ነ አዉዋ እሻ ማቻቶ። ነ አሹዋ አሙዋ ፖላናዉ ነ ናኣ ማቻትና ግሶፓ፤ እዛ ነ ናኣ ማቻቶ ግድያ ድራዉ፥ ኢናና ግሶፓ።5 ነ አሹዋ አሙዋ ፖላናዉ ነ እሻ ማቻትና ግሶፓ፤ ግሶፐ ነ እሻ ካዉሻሳ።6
“ ‘ነ አሹዋ አሙዋ ፖላናዉ ምሽራትናነ እ ናትናነ ላኡዋና ግሶፓ። እ ናት ናትና ዎይ ቃይ እ ናኣ ናትናካ ግሶፓ፤ ኡንቱንቱ እዝዉ ማታ ዳቦ ግድያ ድራዉ፥ ሄዌ ሻርሙጻ።7
“ ‘ነ ማቻታ ፓጻ ደእሽን፥ ነ ማቻት ምቻቶ አካደ ነ አሹዋ አሙዋ ፖላናዉ ኢናና ግሶፓ።
“ ‘ነ አሹዋ አሙዋ ፖላናዉ ፒላይ ዪና ቱና ኡቴዳ ምሽራትና ግሶፓ።8
“ ‘ኔን ቱነናዳን ነ ሾሩዋ ማቻትና ግሶፓ።9
“ ‘ነ ጾሳ ሱን ቱንሳናዉ ነ ናናቱዋፐ እቱዋነ ታማን ጹጊደ፥ ሞሎካ ግያ ኤቃዉ ያርሻናዳን እሞፓ። ታን መና ጎዳ።10
“ ‘ማጫ አሳና ግስያዋዳን አቱማ አሳና ግሶፓ፤ ሄዌ ሸነይያባ።11
“ ‘ኔን ቱነናዳን አይ መህያናነ ግሶፓ፥ ቃይ ማጫ አሳይካ መህያና ግሳናዉ መህያ ስን አፖ። ሄዌ ዎጋይ ባይናዋ።12
“ ‘ታን ህንተ ስንፐ የደርስያ ካዉተቱ ሀ ኦሶቱዋን ቱኔዳ ድራዉ፥ ህንተ ሀዋንታ ማላትያዋቱዋን ቱኖፕተ። ሀራይ አቶ ኡንቱንቱ ቢታይካ ቱኔዳ ድራዉ፥ አ ናጋራዉ ታን አ ሙራድ፤ ቢታይካ ባረናን ደእያዋንታ ጩቼዳ። ሽን ህንተ ታ ህግያነ ታ አዛዙዋ ናግተፐ አትና፥ እስራኤልያ አሳ ግድና ዎይ ህንተ ግዶን ደእያ ሀራ ቢታ አሳፐ ኦንነ ሀዋ ማላ ቱና ኦሱዋ ኦፕተ።
“ ‘ህንተፐ ካሰ ሀ ጋድያን ደኤዳ አሳቱ ሀዋ ማላ ቱናባ ኦዳ ድራዉ፥ ቢታይ ቱኔዳ። ህንተ ሀ ቢታ ቱንሶፐ፥ ህንተፐ ካሰ ደኤዳ ካዉተቱዋ ሀ ቢታይ ጩቼዳዋዳን፥ ህንተናካ ጩቼናዳን ናገትተ። ሄዋንታ ማላትያ ቱና ኦሶቱዋፐ እቱዋነ ኦያ አሳይ ደኦፐ፥ ሄ አሳይ ባረ አሳ ግዶፐ ቦሄቶ።
“ ‘ሄዋ ድራዉ ህንተፐ ካሰ ደኤዳ አሳቱ ኦዳ ቱና ኦሶቱዋ ኡባ ኦደ ህንተ ቱነናዳን፥ ህንተ ታ አዛዙዋ ናግተ፤ ታን፥ መና ጎዳይ፥ ህንተ ጾሳ’ ያጋ” ያጌዳ።
Source notes (12)
- Cross-reference ናህ. 9:29፤ ህዝ. 18:9፤ 20:11-13፤ ሉቃሳ 10:28፤ ሮመ 10:5፤ ጋላ. 3:12
- Cross-reference ዎጋ 20:11፤ ዛረ. 22:30፤ 27:20
- Cross-reference ዎጋ 20:17፤ ዛረ. 27:22
- Cross-reference ዎጋ 20:19-20
- Cross-reference ዎጋ 20:12
- Cross-reference ዎጋ 20:21
- Cross-reference ዎጋ 20:14፤ ዛረ. 27:23
- Cross-reference ዎጋ 20:18
- Cross-reference ዎጋ 20:10
- Cross-reference ዎጋ 20:1-5
- Cross-reference ዎጋ 20:13
- Cross-reference ከሳ 22:19፤ ዎጋ 20:15-16፤ ዛረ. 27:21
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.