ኤርማሳ ሴላ 3

ብሮ ህዶታይ ደእያዋ ግዱሳ

(3:1-66)

1ጾሳ ሀንቁዋ ጋትማን መቱዋ በኤዳ አሳይ ታና። 2እ ታና ላግ ከሲደ፥ ፖኡ ባይና ማዉ አፌዳ። 3እ ዛር ዛሪደካ ጋላሳ ሙልያ ታና ሾጫናዉ ባረ ኩሽያ ታ ቦላን ደንዳ። 4እ ታ ጋልባነ ታ አሹዋ ኤጭሴዳ፤ ታ መቀካ መንዳ። 5እ ታና ድሬዳ፤ መቱዋንነ ዳቡራን እ ታና ዶዴዳ። 6በን አይደንቶ ሀይቄዳ አሳዳን፥ ታና ማ ግዶን ዎዳ። 7ታን ከሰናዳን፥ ታ ዩሹዋ ድሬዳ፤ ዴጾ ሳንሳላታንካ ታና ቃቼዳ። 8ታን አ ጼሳድ፤ አኮ ዋስናካ፥ እ ታ ዎሳ ስሰናን እጼዳ። 9ታ ኦግያን ማሰቴዳ ሹቻ ዎደ ጎርዴዳ፤ ታ ኦግያካ ጌላዬዳ።

10እ ታዉ ሙግያ ባባን ማላ፥ ዎይ ቆሰቲደ ናግያ ጋሙዋ ማላ ግዴዳ። 11እ ታና ታ ኦግያፐ ከስ ኦሊደ፥ ዱሰረዳ። ያቲደ ታና አሳይ ባይና ሳን የግ ባሼዳ።

12ባረ ዎንዳፍያ ዳፊደ፥ ታና ዱካናዉ ማሌዳ። 13እ ባረ ዎንዳፍያ ዳፊደ፥ ታ ዎዛና አይፍያ ጫዴዳ። 14ታን አሳ ኡባዉ ሚቻነ ጋላሳ ኩመን ቦሪደ የጽያዋ ግዳድ። 15እ ታና ጫሙዋን ኩንዳ፤ ቃይ ጎዳረ ኡዳን ጫምያ ጹኣ ኡሺደ፥ ታና ካልሴዳ።

16እ ታ አቻ አንጩዋን መንዳ፤ ባና ግዶን እ ታና የዳ። 17ሳሩ ታፐ ሃኬዳ፤ ታን እንጀ ደኡዋ ዶጋድ። 18ሄዋ ድራዉ፥ ታን፥ “ታ ዎልቃይ ታፐ ክቼዳ፤ ታን መና ጎዳን ህዶታ ዎዳዌ ኡባይካ ዬዳ” ያጋድ። 19ታ መቱዋነ ታን ቶይላካትያዋ ሀሳይና፥ ደኡ ታና ጫሜዳ። 20ሄዌ ታን ኡባካ ዶገናባነ ታ ሸምፑካ ካዮትያዋ።

21ግዶፐነ፥ ታን ሀ እትባ ታ ዎዛናን ቆፕያ ዎደ፥ ታዉ ስንናዉ ህዶታይ ደኤ። 22ሄዌነ፥ መና ጎዳ አገና ሲቁዋፐ ደንዴዳዋን ኑን ይቦኮ። አ ቃረታይካ ሙለ ዉር ኤረና፤ 23ኡንቱንቱ ዎንታ ዎንታ ኦራ። ኔን ሎይ አማነትያዋ። 24ታን ታዉ፥ “መና ጎዳይ ታና ጋኬዳ ሳማ፤ ሄዋ ድራዉ፥ ታን አን ህዶታ ዎይ” ያጋድ።

25ባረንቱ ህዶታ አን ዎያዋንቶነ አ ኮይያዋንቶ መና ጎዳይ ሎኦ። 26ሄዋ ድራዉ፥ አሳይ መና ጎዳይ አሽያ አሹዋ ዳንዳያን ናጎፐ ሎአ። 27ቃይ አሳይ ባረ ያላጋተን ደኢድ፥ ዳንዳያ ታማሮፐ ሎአ።

28መና ጎዳይ መቱዋ አህያ ዎደ፥ እ ጮኡ ጊደ፥ ባረካ ኡት አጎ። 29እ ባረ ሶምኡዋ ቢታ ጋደ ሀይዞ። ኦን ኤሪ፥ አዉ ስንናዉ ህዶታይ ደአነንቶነ። 30እ ባረ ሻይያ ባቂያዎ በሶ፤ ባረ ሞርከቱ ሸቂያ ሸቃካ ካሎ።

31አያዉ ጎፐ፥ ጎዳይ አሳ መናዉ ኦለና፤ 32እት ዎደ ካዩዋ አሆፐነ፥ እ ባረ አገና ሲቁዋ ዳሩዋዳን ቃረቴ። 33አያዉ ጎፐ፥ እ አሳ ቱጋይያዋንነ መቶይያዋን ናሸተና።

34አ አሳ ካለያዋንቱ ቃሸቴዳዋንታ ባረንቱ ገድያፐ ጋርሳ ባጋና የድኖ፤ 35ቃይ ኡባፐ ቂያ ጾሳ ስንን አሳዉ ደእያ ማታ ድጊኖ፤ 36ቃይካ ችሎታን ፕርዳ ጌላዪኖ። ኡንቱንቱ ጎዳይ ሄዋ ኡባ በኤና ጊደ ቆፒኖየ?

37ጎዳይ አዛዝቤናዋ አዛዚደ፥ ፖልሳናዉ ዳንዳይያዌ ኦኔ? 38ኢታባ ግድና ሎኦባ ግድናካ፥ ሃሳዪደ ፖልያዌ ኡባፐ ቂያ ጾሳ ግደኔየ? 39ያትና፥ ኑን አሳ ግድያዋንቱ ኑ ናጋራ ድራዉ፥ እ ኑና ሙርያ ዎደ፥ አያዉ ዙዙሜቶ?

40ሄዋ አጊደ፥ አነ ኑ ኦግያ ፓጮይተነ ቆሮይተ፤ መና ጎዳኮካ አነ ስሞይተ። 41አነ ኑ ዎዛናነ ኑ ኩሽያ ሳሉዋን ደእያ ጾሳኮ ደንደ፥ ሀዋዳን ያጎይተ፤ 42“ኑን ኔና ናቄዶ፤ ነዉ ማካሌዶ፤ ኔንካ ኑዉ አቶ ጋባካ። 43ነ ሀንቁዋን ኑና የደርሳዳ፤ ቃይ ኔን ኑዉ ቃረተናን ኑና ሲፋዳ። 44ኑ ዎሳይ ኔኮ አናዳን፥ ነ ሁጲያ ሻርያን ካማዳ። 45አሳ ግዶን ኑና ፕቶነ ቡራ ኦዳ። 46ኑ ሞርከቱ ኡባይ ኑ ቦላን ሃሳዬድኖ። 47ኑን ዳጋሜዶነ ግትያን ገሌዶ፤ ባዬዶነ ዬዶ” ያጌቶ።

48ታ አሳይ መቱዋን ዬዳ ድራዉ፥ ታ አይፊ ሻፋዳን አፎ ጎጌ። 49ታ አይፊ ሙለ ዎደ አገናን አፎ ትጌ። 50መና ጎዳይ ሳሉዋፐ ዱገ ጼሊደ በአና ጋካናዉ ሄዌ ሀኔ። 51ታ ካታማን ደእያ ማጫ አሳቱዋ ኡባ ቦላን ጋኬዳዋ ታ አይፊ በኤዳ ዎደ፥ ታ ዎዛናይ ካዮቴዳ።

52ጮ ታና ሞርክያዋንቱ ታና ካፉዋ ሻንካትያዋዳን ሻንካቴድኖ። 53ኡንቱንቱ ታና ፓጻ ደእሺና ኦላን የጊደ፥ ኦላ ዶና ሹቻን ጎርዴድኖ። 54ሃይ ኩሚደ፥ ታ ሁጲያና ጎግያ ዎደ፥ ታን ያድ ጋደ ቆፓድ።

55አቤት መና ጎዳዉ፥ ታን ጪማ ኦላ ግዶን ደኣደ ነ ሱን ጼሳድ። 56ታ ዋሱዋ ስሳናዳን ታን ኔና ዎስያ ዎደ፥ ኔን ታዉ ስሳዳ። 57ታን ኔና ጼሴዳ ዎደ፥ ታኮ ሺቃደ፥ “ያዮፓ” ያጋዳ። 58አቤት ጎዳዉ፥ ኔን ታ ሞቱዋ ሞተታደ፥ ታና ዎዛዳ። 59አቤት መና ጎዳዉ፥ ኔን ታ ቱጋ በኣዳ። ሄዋ ድራዉ፥ ታ ሞቱዋ ኔን ፕርዳ። 60ኡንቱንቱ ሀሉዋ ከሳናዉ ታ ቦላን ማቀትያ ማቁዋ ኡባ በኣዳ። 61አቤት መና ጎዳዉ፥ ኡንቱንቱ ታና ሸቂያ ሸቃነ ታ ቦላን ማቀትያ ማቁዋ ኡባ ስሳዳ። 62ቃይ ታ ሞርከቱ ጋላሳ ኩመን ታ ቦላን ዙዙምያዋነ ሳሱክያዋ ስሳዳ። 63በአ፥ ኡንቱንቱ ኡቲድነ ኤቂደ፥ ታና ቦር ቦሪደ የጺኖ።

64አቤት መና ጎዳዉ፥ ኡንቱንቱ ኦዳ ኦሶ በስያ ጋትያ ኡንቱንቶ ጭጋ! 65ኡንቱንቱ ዎዛና ዳምሳ! ነ ሸቃይ ኡንቱንታ ጋኮ! 66አቤት መና ጎዳዉ፥ ኔን ኡንቱንታ ነ ሀንቁዋን የደርሳ፥ ሳሎቱዋፐ ጋርሳና ኡንቱንቱ ደኢያሳፐ ኡንቱንታ ይሳ!