Dawro Full Bible Ethiopic
ኤርማሳ ሴላ 1
የሩሳላመ መቱዋነ ካዩዋ
(1:1-22)
ካሰ አሳይ ኩሜዳ የሩሳላመ ካታማታ ሀእ ዋናደ መላ አታዴ! ካሰ ካዉተቱዋ ግዶን ዎልቃማ ግዴዳና ሀእ አስናይ ሀይቄዳ ምሽራቲዳን፥ ዋናደ ባረካ አታዴ! ካታማቱዋ ኡባ ግዶን ካታቶ ግዴዳና ሀእ ዋናደ አይለ ግዳዴ! ቃማ ኡባን አፎይ እ ጋጩዋና ሆልሳካትሽን፥ ዬካደ አቃዱ። ካሰ እዞ ዶስያዋንቱፐ ሀእ እዞ ምንያዌ እቱነ ባዋ። እ ላገቱ እዞ አ እሚደ፥ እዉ ሞርከ ግዴድኖ። ይሁዳታ ናቀታደነ አይለታደ ኦሞደታደ ባዱ። እዛ ሀእ ካዉተቱዋ ግዶን ደአዉ፤ ሽን ሸምፕያ ሳኣ ደማበይኩ። እዞ የደርሴዳዋንቱ እዛ መቶታ ደእሽን ጋኪደ ደሜድኖ። ላይ ግዶን ቦንችያ ባላቱዋ ይያዌ ባይና ድራዉ፥ ጽዮነ ኦገቱ ካዮቲኖ። ካታማ ፐንገቱ መላ አቴድኖ፤ እ ቄሳቱ ካ ኦሊኖ። እ ዎዶሮ ናናቱካ ቱጋቴድኖ፤ ቃይ እዛ ባረ ሁጲያዉካ ኢታ ቱጋ ቱጋታዱ። እ ሞርከቱ እዉ ጎዳ ግዴድኖ፤ ኡንቱንቶ እንጅና ደኤድኖ። አያዉ ጎፐ፥ እ ናጋራ ዳሩዋ ጋሱዋን መና ጎዳይ እዞ ቱጋዬዳ፤ እ ጉ ናናቱ ሞርክያን ኦሞደቲደ ቤድኖ። ጽዮን ቦንቹ ኡባይ ኢፐ ቃረት ክቼዳ፤ እ ካፓቱካ ማታ ምያ ሳኣ ዬዳ ጋራ ማላ ግዴድኖ። ኡንቱንቱ ዎልቃ ዪደ፥ ባረንታ የደርስያዋንቱ ስንፐ ባቃቴድኖ።
የሩሳላማ ሀእ ባረ ቱጋነ ባረ ኡንኣ ጋላሳቱዋን በን ባረ ቦንቾ ዱረታ ሀሳያዉ። እ አሳይ ኡባይ ሞርከቱዋ ኩሽያን አደ እመቴዳ ዎደ፥ እዞ ማድያዌ እቱነ አትቤና። እ ሞርከቱ እዞ ጼሊደ፥ እ ባሻን ሚጬድኖ። የሩሳላማ ዎልቃማ ናጋራ ኦዱ፤ ሄዋ ድራዉ፥ እዛ ቱናባ ግዳዉ። ካሰ እዞ ቦንቼዳ ኡባይ ሀእ እ ካሉዋ በኤዳ ድራዉ፥ እዞ ካ። አካ ኦላዉነ ጉየ ስማዉ። እ ቱናተይ እ አፍላ ጼራ ባቂ ኦይቄዳ። ስንፐ ባረ ቦላ ያናባ እዛ ቆፓበይኩ። ሄዋ ድራዉ፥ እዝ ኩንደይ ዳጋንያዋ። እዛ፥ “አቤት መና ጎዳዉ፥ ታ ቱጋ በአ! ታ ሞርከቱ ታና ጾኔድኖ” ጊናካ፥ እዞ ምንያዌ እቱነ ባዋ። ሞርከቱ እዝ ቦንቾ ዱረታ ኡባ ቦላን ባረንቱ ኩሽያ የዴድኖ። ጋድያ ካዉተቱ፥ ካሰ ኔን ጾሳ ማባራ ግዶ ገልሰናን ድጌዳ አሳቱ፥ እ ጌሻ ጎልያ ገልሽን በኣዱ። እዝ አሳቱ ኮሻቲደ፥ ቁማ ደማናዉ ኦሊኖ። ኡንቱንቱ ፓጻ ደአና ድራዉ ጊደ፥ ባረንቱ ቦንቾ ዱረታ ኡባ ቁማን ላሚኖ።
የሩሳላማ ሀዋዳን ያጋዉ፤ “አቤት መና ጎዳዉ፥ ጼላ፤ ታን ካቴዳዋ በአ! ህንተኖ፥ ሀዋና አያዋንቶ፥ ሀዌ ህንተዉ ኡባዉ አያነ ግደኔ? መቱ ኡባይ መና ጎዳይ ባረ ኤጽያ ሀንቁዋ ጋላስ ታ ቦላ አሄዳ መቱዋ ማሌ? ጾሳይ ቦላ ቃፐ ታማ ዱገ የዴዳ፤ ሄ ታማይ ታ መቀ ግዶ ገሌዳ። ታ ገድያ ኦይቃናዉ ጲርያ ዎዳ፤ ታና ጉየ ዛሬዳ። እ ታና ጋላሳ ኡባን ላባንደ፥ የግ ባሼዳ። ታን ኦዳ ናጋራ ኡባ ሺሽ ቃቺደ፥ ሞርገ ምዳን ታ ሞርግያን ዎዳ። ያቲደ ታ ዎልቃ ዉርሴዳ። ታን ኤቀታናዉ ዳንዳየናዋንቶ ጎዳይ ታና አ እሜዳ። ጎዳይ ታ ግዶን ዎልቃማ ኦላንቻቱዋ ኡባ እጼዳ። ታ ያላጋቱዋካ ይሳናዉ ዎድያ ኬሬዳ። ዎይንያ ቴራ ጉምእያ ሳኣን የያዋዳን፥ ጎዳይ ይሁዳ አሳ የዳ። ታን ዬክያዌነ ታ አይፊ አፎ ሆልሳይያዌ ሄዋሳ። ታና ምንናዉነ ታ ዎልቃ ምንስያዌ እት አሳይነ ባዋ። ሞርኪ ጎቤዳ፤ ታ ናናቱነ መላ አቴድኖ” ያጋዉ።
ጽዮና ባረ ኩሽያ ምጫዱ፤ ሽን እዞ ምንያዌ ባዋ። እ ዩሹዋን ደእያዋንቱ እዞ ሞርካናዳን፥ መና ጎዳይ ኦዳ። የሩሳላማ ኡንቱንቱ ግዶን ቱናባ ግዳዱ።
እዛ ሀዋዳን ያጋዉ፤ “መና ጎዳይ ጽሉዋ፤ አ ቃላዉ አዛዘተናን ማካሌዳና ታና። ህንተኖ፥ አሳቶ ኡባይካ ስስተ! ታ መቱዋካ በእተ። ታ ዎዳላቱነ ታ ጌላዮቱ ኦሞደቲደ ቤድኖ። ታን ታና ዶስያዋንታ ጼሳድ፤ ሽን ኡንቱንቱ ታና ጭሜድኖ። ታ ቄሳቱ ነ ታ ጭማቱ ባረንቱ አካታ ምንሳናዉ ቁማ ኮዪደ፥ ካታማ ግዶን ሀይቄድኖ። አቤት መና ጎዳዉ፥ ታ ዋይያ በአ! ታ ጋርሳይ ሻቢረቴዳ። ታን ሎይ ማካሌዳ ድራዉ፥ ታ ዎዛናይ መኤዳ። ካረን ማሻይ ዉርሴ፤ ሶንካ ሀይቆ ጻላላይ ደኤ። አሳይ ታን ዝላልያዋ ስሴዳ፤ ሽን ታና ምንያ እት አሳይነ ባዋ። ታ ሞርከቱ ኡባይ ታን መቶትያዋ ስሴድኖ፤ ኔን ኦዳባን ናሸቴድኖ። ኡንቱንቱካ ታናዳን ሀናና ማላ፥ ኡንቱንቱ ቦላ ኔን አዋዬዳ ጋላሳ አያ! ኡንቱንቱ ኢታተይ ኡባይ ነ ስን ጋኮ፤ ታ ናጋራ ኡባ ድራዉ፥ ኔን ታና ሙሬዳዋዳን፥ ኡንቱንታካ ሙራ! አያዉ ጎፐ፥ ታ ዝላሳይ ዳሬዳ፤ ታ ዎዛናይካ መኤዳ” ያጋዉ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.