ዮሃንሳ ምሽራቹዋ

ዮሃንስ ጻፌዳ

ምሽራቹዋ ቃላ

ገሉዋ

ዮሃንስ ጻፌዳ ምሽራቹ፥ የሱስ አሹዋ ማዪደ አሳ ግዱዋን ቤቴዳ ደኡዋ ጾሳ ቃላ ግድያዋ ቆንጭሴ። ሀ ማጻፋይ ባረ ሁጰዉ ቆንጭስያዋዳን ሀ ምሽራቹዋ ቃላይ ጻፈቴዳዌ፥ አ ናባብያ አሳይ የሱስ አሳ አሽያ ልያ ግዲደ ያናዋ ጌተቴዳ ጾሳ ናኣ ግድያዋ አማናና ማላነ አን አማኖ ጋሱዋን መና ደኡ ኡንቱንቶ ደአናዋ ኡንቱንቱ ኤራና ማላ ጻፈቴዳ (20:31)።

ምሽራቹዋ ቃላዉ ኮይሮ ሻኩ መና ጾሳ ቃላይነ የሱስነ እቱዋ ግድያዋ ኦድ ስሚደ፥ የሱስ አሽያዋ ግዲደ ያና ጌተቴዳ ጾሳ ናኣ ግድያዋ በስያ ዱማ ዱማ ማላታቱዋ ሺሼ። ሄዋፐ ካሊደ ቃይ ሀ ማላታቱዋፐ ቤቴዳ አይፍያ ኦድያ ታርካቱ ካሊኖ። ሀ ክፍሊ እት እት አሳይ የሱሳን አማኒደ፥ አ ካልያዋንታ ግዴዳዋ ኦዴ፤ ሀራቱ ቃይ አ አያዉ እጼደንቶነ አን አያዉ አማኖኮ ጌደንቶ ኦዲኖ። (ሸምፑዋ 13-17) የሱስ ኦይቀቴዳ ኦማርስ አዉ አ ካልያዋንቱና አይ ኬና ምኖ እትፐተይ ደእንቶነ፥ ቃይ እ ካቀታናዉ ማቴዳ ዎንተ ጋላስ ኡንቱንቶ ጊገታና ማላነ ምናና ማላ እ ሃሳዬዳ ቃላ ኦዲኖ። ዉርሰ ሸምፓቱ የሱስ ኦይቀቴዳዋነ ፕርዳዉ ሺቄዳዋ፥ አ ካቁዋነ አ ደንዱዋ፥ ቃይካ ደንዱዋፐ ጉይያን ባረና ካልያዋንቶ እ ቆንጬዳ ሀኖታ ኦዲኖ።

ዮሃንስ ጎዳ የሱስ ክርስቶሳ ባጋና ቤትያ መና ደኡዋ ቆንጭያን በስያ ሀ አ ኬካተይ ሀእፐ ዶሚደ የሱስ ኦገ፥ ቱማነ ደኦ ግድያዋ አማንያዋንቱሳ። ዮሃንስ ጻፌዳ ምሽራቹዋ ቃላ ሀራቱዋፐ ዱማይያዌ፥ አያና ቱማተቱዋ ታማርሳናዉ ደኡዋ ኡባን አሳይ ሜዘቴዳ ቃላቱዋ ጎኤትያ ድራሳ። ሄዋንቱካ፥ ሃ፥ ሶሉዋ፥ ፖኡዋ፥ ሄንንቻ፥ ዶርሳ፥ ዎይንያ ም፥ ዎይንያ አይፍያነ ሄዋንታ ማላትያዋንታ።

ዎሹማደ ኦይቀቴዳ ምሽራት ታርክያ 7:53—8:11 ጮራ ብለቱነ በን ማጻፋቱ ባረንቱን ጉጅክኖ፤ ሀራቱ ዮሃንሳ ምሽራቹዋን 21:24ፐ ጉይያን ገልሲኖ፤ ሀራንቱ ቃይ ሉቃሳ ምሽራቹዋ ሉቃሳ 21:38ፐ ጉይያን ገልሲኖ፤ እት በን ጻፈቴዳ ብለይ ዮሃንሳ ምሽራቹዋ 7:36ፐ ጉይያን ገልሴዳ።

ሸምፓቱዋ ኡባቶ እመቴዳ ቃን ቆፋቱዋ

ሀ ማጻፋ ጻፌዳዋ ቆፋ

ጻማቅያ ዮሃንሳነ የሱሳ ኮይሮ ካሌዳዋንታ

የሱሳ ኦሱዋ ዶመ

የሩሳላመንነ እዝ ዩሹዋን ዉርሰ ጋላሳቱዋን ሀኔዳ የሱሳ ኦሱዋ

ጎዳ የሱሳ ደንዱዋነ ቆንጨ

ዉርሰ ቁትያ፥ ጋሊላን ዛሪደ ባረና ካልያዋንቶ የሱስ ቆንጬዳዋ