ሆሰ 13

እስራኤልያ ዉርሰ ፕርዳ

1ኤፍሬማ አሳይ ሃሳዬዳ ዎደ፥ ስሴዳ አሳይ ያሻዉ ኮኮሬዳ፤ እስራኤልያ ጋድያን ኡንቱንቱ ቦንቼቴዳ አሳ። ሽን ባኣላ ግያ ኤቃዉ ጎይኔድኖ፤ ሄ ባይዙዋ ጋሱዋን ሀይቄድኖ። 2ሀእካ ናጋራ ቦላ ናጋራ ኦኖ፤ ቃይ ባረዉ ጎይናናዉ፥ ሲልሲደ ምስለቱዋ መኖ። ሄ ምስለቱ ሂላን ብራፐ መቴዳዋንታ፤ ኡንቱንቱ ኡባይካ ኩሽያ ሂላይ መዳዋንታ። ኡንቱንቱዋ አሳይ ሃሳዪደ፤ “አሳ ያርሹዋ ያርሽተ፤ ሀ ማራ ምስልያካ የርተ” ያግኖ። 3ሄዋ ሀዳን ኡንቱንቱ ዎንታ ሻርያ ማላ፥ ዎይ ጉራን ቆለትያ ዎንታ ከተርሳ ማላ ዎይ ጫርኩ ኡዱማፐ ደንደ አፍያ ሱላ ማላ ዎይ ማስኮትያና ከስያ ፔኑዋ ማላ ግዳናዋ።

4ጾሳይ ሀዋዳን ያጌ፤ “ታን ህንተና ግብጼ ጋድያፐ ከሳደ አሄዳ መና ጎዳ ህንተ ጾሳ። ህንተ ታፐ አትና፥ ሀራ ጾሳ ኤርክታ፤ አሽያዌካ ታፐ አትና፥ ሀራይ ባዋ። 5መላ ቢታን፥ መላ ጋድያን ታን ህንተና ናጋድ።1 6ታን ህንተና ምዝና፥ ሚደ ካሌድታ፤ ካሊደ ኦቶረቴድታ፤ ሄዋፐ ጉይያን፥ ታና ዶጌድታ። 7ሄዋ ድራዉ፥ ታን ህንተ ቦላ ጋሙዋ ማላ ግዳናዋ፤ ቃይ ማህያዳን፥ ኦግያ ዶናን ዙጋና። 8ማራቱዋ ዎ አኬዳ ማሀቲዳን፥ ታን ህንተናና ጋከታና፤ ህንተና ዳከሬና። ቃይ ታን ህንተና ጋሙዋዳን ያን ማና፤ ባዙዋ ዶኣዳን፥ ህንተና ፖሸረና።

9“እስራኤልያ አሳቶ፥ ህንተ ታ ቦላ፥ ህንተና ማድያዋ ቦላ ሞርከተን ደንድያ ድራዉ፥ ታን ህንተና ይሳና። 10ህንተ ታና፥ ‘ኑዉ ካትያነ ጋድያ ሞድያዋንታ እማ’ ያጊደ ኦቼድታ። ህንተና አሻናዉ ህንተ ካቲ አኔ? ህንተ ጋድያ ሞድያዋንቱ ህንተ ካታማቱዋ ግዶን ሀቃን ደኢኖ?2 11ታን ታ ሀንቁዋን ህንተንቶ ካትያ እማድ፤ ታ ይሉዋን አ ድጋድ።3

12“ኤፍሬማ ባይዙነ ናጋራይ ጻፈቲደ፥ ማዝጎባ ጎልያን ኡቴዳ። 13የሉ ኦይቄዳ ምሽራታ ቱጋትያዋ ማላ ቱጋይ አ ቦላ ያና። ሽን እ ኤር ባይና ናኣ፤ አያዉ ጎፐ፥ እ የለትያ ዎዲ ጋክና፥ ባረ ዳይ ኡሉዋፐ ዎናን እጽያ ናኣ ማላ። 14ኡንቱንታ ታን ዱፉዋፐ አሻና፤ ሀይቁዋ ዎልቃፐካ ዎዛና። ሀይቆ፥ ነ ኢታ ሀርገቱ ሀቃነ? ዱፎ፥ ነ ባሻይ ሀቃነ?4

“ታን ታ አሳዉ ቃረትከ። 15ኤፍሬመ ባረ እሻቱዋ ግዶን ምንንቶካ፥ መና ጎዳይ የዴዳ አዋይ ዶልያ ባጋ ጫርኩ መላ ቢታፐ ጫርኪደ ያና። አ ፑልቶቱ ቶአና፤ አ ሃ ኦላቱካ መላና። እ ምንጅያ ጎለቱዋን ደእያ አልኦ ሚሻ ኡባይ ቦንቀታናዋ። 16ሳማርያ አሳይ ባረንቱ ጾሳ ቦላ ማካሌዳ ድራዉ፥ ባረንቱ ባይዙዋ ሙራ አካናዉ በሰ። ኡንቱንቱ ማሻን ቡሳከታና፤ ኡንቱንቱ ጉ ናናይካ ክንቼታና፤ ኡንቱንቱ ሻሃራ ማጫ አሳቱዋ ኡሉካ ጳልቀታና” ያጌ።