Dawro Full Bible Ethiopic
ዶመ 3
ናጋራነ ናጋራ ማሮታባ
(3:1-24)
ሾሻይ መና ጎዳይ ጾሳይ መዳ ዶኣ ኡባፐ አዳ ገናንቻ። እት ጋላስ ሾሻይ ሄ ምሽራቶ፥ “ጾሳይ ቱሙ ህንተንታ፥ ‘ገነትያን ደእያ ም ቴራ ኡባፐ ሞፕተ’ ጌዴ?” ያጊደ ኦቼዳ።1
ምሽራታ ሾሻዉ ዛራደ፥ “ቱይት፥ ጾሳይ ሀዋዳን ግቤና፤ ኑን ገነትያን ደእያ ምቱዋ ቴራ ማናዉ ዳንዳዬቶ፤ ሽን ጾሳይ ኑና፥ ገነትያ ግዱዋን ደእያ ም ቴራ ሞፕተ፤ ቦቾፕተ፤ ሄዌ ዮፐ ህንተንቱ ሀይቃንታ ጌዳ” ያጋዱ።
ሾሻይ ምሽራቶ፥ “ቱይት፥ ህንተንቱ አይነ ሀይቂክታ፤ ጾሳይ ሄዋ ጌዳዌ፥ ሄ ም ቴራ ህንተንቱ ሞፐ፥ ህንተንቱ አይፊ ዶየትና፥ ሎኡዋነ ኢታ ጾሳዳን2 ህንተንቱ ኤራናዋ እ ኤርያ ድራሳ” ያጌዳ።
ምሽራታ ሄ ም ቴራይ ማናዉ ማልእያዋ፥ ጼላናዉ ሎእያዋ፥ ቃይ አሳይ አዳ ኤራ ደማናዉ አሞይያዋ ግድያዋ በኣዱ፤ ሄ ም ቴራፐ አካደ ማዱ፤ ቃይ ባረናና ደእያ ባረ አስናዉካ ሄዋፐ እምና፥ እካ ሜዳ።
ሄዋፐ ኡንቱንቱ ላኡዋ አይፊካ ዶየቴዳ፤ ያትና ኡንቱንቱ ባረንቶ ካሎ ጺራ ደእያዋ ኤሬድኖ፤ ባላስያ ግያ ም ሀይ ስኪደ፥ ባረንቶ ቃንን ዳንጬድኖ።
ሳአይ ኦማርሴዳ ዎደ፥ ገነትያ ግዱዋን መና ጎዳይ ጾሳይ ሀመትሽን፥ አ ኮሻ ብታኒነ አ ማቻታ ስሴድኖ፤ ኡንቱንቱ ገነትያ ም ግዶን መና ጎዳ ጾሳፐ ቆሰቴድኖ። ሽን መና ጎዳይ ጾሳይ ብታንያ ጼሲደ፥ “አዳማ፥ ሀቃን ደአይ?” ያጌዳ።
ብታኒ፥ “ገነትያ ግዱዋን ነ ኮሻ ስሳደ፥ ታን ካሎ ደእያ ድራዉ፥ ያያደ ቆሰታድ” ያጌዳ።
መና ጎዳይ ጾሳይ አ፥ “ ‘ኔን ካሎ ደኣሳ’ ጊደ ነዉ ኦዴዳዌ ኦኔ? ታን ኔና፥ ‘ሞፓ’ ጋደ አዛዜዳ ም ቴራፐ ማድዬ?” ያጊደ ኦቼዳ።
ሽን እ፥ “ታናና ደአናዳን ኔን እሜዳ ማጫውና ሄ ም ቴራፐ ታዉ እምና ማድ” ያጌዳ።
መና ጎዳይ ጾሳይ ሄዋፐ ጉየ ማቻቶ፥ “ኔን ሄዋ አያዉ ኦድ?”3 ያጊደ ኦቼዳ።
ምሽራታ፥ “ታና ሾሻይ ጭምና ማድ” ያጋዱ።
ጾሳ ፕርዳ
መና ጎዳይ ጾሳይ ሄዋፐ ጉየ ሾሻ፥ “ኔን ሀዋ ኦዳ ድራዉ፥ መህያ ኡባነ ዶኣ ኡባ ጋርሳን ነ ጻላላይ ሸቀቴዳዋ! ኔን ነ ኡሉዋን ቢታና ጎሸታና፤ ነ ደኡዋ ላይ ኡባን ባና ላጫና። ታን ኔናነ ምሽራቶ፥ ነ ዘረነ እዝ ዘረ4 ሞርከ ከሳና፤ እ ነ ሁጲያ ቆጻና፤ ኔንካ አ ግንድያ ዱካናሳ” ያጌዳ።5
ምሽራቶካ መና ጎዳይ ጾሳይ፥ “ነ ሻሃሮ ዎደ ዳሮ ቱጋታና፤ ቃይ ኔን ዎልቃማ ኦይን ናና የላና። ግዶፐነ ኔን ነ አስናና ደአናዉ አሞታና፤ እ ኔና ሞዳና” ያጌዳ።
ብታንያካ መና ጎዳይ ጾሳይ ሀዋዳን ያጌዳ፤ “ኔን ነ ማቻት ኦዱዋ ስሴዳ ድራዉነ ታን ኔና፥ ‘ሄ ም ቴራ ሞፓ’ ጋደ አዛዜዳ ም አይፍያ ኔን ሜዳ ድራዉ፥ ቢታይ ነ ጋሱዋን ሸቀቴዳዋ ግዶ! ኔን ነ ደኡዋ ላይ ኡባን ዎልቃማ ዳቡራን ቢታ ጎሻደ ማና።6 ቢታይ ነዉ አጉንነ ካሽያ ዶላና፤ ኔን ዎራን ዶሌዳዋ ማና። ኔን ቢታዉ ስማና ጋካናዉ፥ ዳቡራን ነ ሶምእ ጫዋትና ኦዳ ነ ቁማ ማና፤ አያዉ ጎፐ፥ ኔን ቢታፐ አከታዳ፤ ኔን ባና፤ ኔን ባናዉ ስማና” ያጌዳ።
አዳመ ባረ ማቻቶ ሄዋኖ7 ጊደ ሱንዳ፤ አያዉ ጎፐ፥ እዛ ደኡዋን ደእያ አሳ ኡባዉ አቶ።
መና ጎዳይ ጾሳይ አዳማዉነ አ ማቻትዉ ጫላ ጊግሲደ ኡንቱንታ ማይዜዳ።
ሄዋፐ ጉየ መና ጎዳይ ጾሳይ፥ “ስም አሳይ ኑፐ እቱዋዳን ሎኡዋነ ኢታ ኤርያዋ ግዴዳ። እ ባረ ኩሽያ የዲደ፥ ደኡዋ ምፐ አኪደ፥ ቃይ ሜና ማላነ መናዉ ደኡዋን ደኤና ማላ ተኤታናዉ ኮሼ” ያጌዳ። ሄዋ ድራዉ፥ እ ባረ አከቴዳ ቢታ ኦና ማላ፥ መና ጎዳይ ጾሳይ ኤደነ ገነትያፐ አ ከሴዳ። አ ከስ ድጊደ፥ ደኡዋ ምኮ አፍያ ኦግያ ናጋና ማላ፥ ክሩቤላ ግያ ኪታንቻቱዋነ አ አ ዎያ ታማ ላጩዋ ማሻ ኤደነ ገነትያፐ አዋይ ዶልያ ባጋና ዎዳ።
Source notes (7)
- Cross-reference ሳፃ 12:9፤ 20:2
- Footnote ጾሳዳን፦ ጾሳቱዋዳን።
- Cross-reference 2 ቆሮ. 11:3፤ 1 ጽሞ. 2:14
- Footnote እዝ ዘረ፦ ኡንቱንቱ ዘረ።
- Cross-reference ሳፃ 12:17
- Cross-reference እብራ. 6:8
- Footnote ሄዋኖ: ሀ ሱን ብለይ “ደእያኖ” ግያዋ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.