ዶመ 22

ይሳቃ ባረዉ ያርሻናዳን ጾሳይ አብራሃማ አዛዜዳ

1ሄዋፐ ስሚደ፥ ጾሳይ አብራሃማ ፓጬዳ፤ እ አ፥ “አብራሃሜ” ያጊደ ጼሴዳ።

እ፥ “አቤ” ያጊደ ኮዬዳ።1

2ጾሳይ፥ “ኔን ሲቅያ ነ መጽ እት ናኣ ይሳቃ አካደ፥ ሞርያ ግያ ጋድያ ባ፤ ያን ታን ነዉ ኦድያ እት ደርያ ቦላን አ ጹግያ ያርሹዋ ኦደ ታዉ ያርሻ” ያጌዳ።2

3ዎንተ ጋላስ አብራሃመ ጉራን ደንዲደ፥ ባረ ሀርያ ጫኔዳ፤ ባረ ቆማቱዋፐ ላኡዋነ ባረ ናኣ ይሳቃ ባረናና አኪደ፥ ጹግያ ያርሹዋ ም ጳልቂ አኪደ፥ ጾሳይ አዉ ኦዴዳ ሳኣ ባናዉ ደንዴዳ። 4ቢደ ሄዘን ጋላስ አብራሃመ ቁ ጊደ፥ ሄ ሳኣ ሃኩዋን በኤዳ። 5አብራሃመ ባረ ቆማቱዋ፥ “ሀ ሀርያና ሀዋን ደእሽተ፤ ታንነ ታ ናአይ ያ ቢደ ጾሳዉ ጎይኒደ፥ ህንተንቱኮ ስማና” ያጌዳ።

6አብራሃመ ያርሹዋ ም ደንደ፥ ባረ ናኣ ይሳቃ ቶሴዳ፤ ታማነ ማሻ እ ባረዉ ኦይቄዳ። ኡንቱንቱ ላኡ እትፐ ቢሽን፥ 7ይሳቅ ባረ አዉዋ አብራሃማ፥ “ታ አዎ” ያጌዳ።

አብራሃመ፥ “አቤ፥ ታ ናአዉ” ያጌዳ።

እ፥ “ታማይነ ምይ ሀዌሽ፤ ሽን ጹጊደ ያርሽያ ዶርሳ ማራይ ሀቃኔ?” ያጌዳ።

8አብራሃመ፥ “ታ ናአዉ፥ ጹጊደ ያርሽያ ዶርሳ ማራ ጾሳይ ጊግሳና” ያጌዳ። ኡንቱንቱ ላኡ እትፐ ቤድኖ።

9ኡንቱንቱ ጾሳይ አዉ ኦዴዳ ሳኣ ጋኬዳ ዎደ፥ አብራሃመ ያርሹዋ ያርሽያ ሳኣ ያን ግምቢደ፥ ም ማር የጌዳ፤ ባረ ናኣ ይሳቃ ቃቺደ፥ ሄ ም ቦላን ግስሴዳ።3 10አብራሃመ ባረ ናኣ ሹካናዉ ባረ ኩሽያ የዲደ ማሻ አኬዳ። 11ሽን መና ጎዳ ኪታንቻይ ሳሉዋፐ አ፥ “አብራሃሜ፥ አብራሃሜ” ያጊደ ጼሴዳ።

እ፥ “አቤ” ጊደ ኮዬዳ።

12አ፥ “ናኣ ቦላን ነ ኩሽያ ዎፓ፤ አ አይነ ኦፓ፤ ኔን ነ መጽ እት ናኣካ ታና ድጋቤና ድራዉ፥ ኔን ጾሳዉ ያይያዋ ግድያዋ ታን ሀእ ኤራይ” ያጌዳ።

13አብራሃመ ቁ ግ ጼሊደ፥ ሄዋን ዶርሳ እቱ ካጪ ቡራን ገል ቃጸት ኡቴዳዋ በኤዳ። አብራሃመ ቢደ ሄ ዶርሳ አኪደ፥ ባረ ናኣ ድራዉ ጹግያ ያርሹዋ ኦደ ያርሽ ባሼዳ። 14ሄዋ ድራዉ አብራሃመ፥ “መና ጎዳይ እማና”4 ያጊደ ሄ ሳኣ ሱንዳ፤ ሀቼ ጋካናስካ፥ “መና ጎዳ ደርያን እመታና” ጌተቴ።

15መና ጎዳ ኪታንቻይ ሳሉዋፐ ላኤንደ አብራሃማ ጼሲደ ያጌዳ፤ 16“መና ጎዳይ፥ ‘ሀዋዳን ያጋደ ነዉ ታን ታ ሁጲያን ጫቃይ፤ ኔን ሀዋ ኦዳ ድራዉነ ነ መጽ እት ናኣካ ታና ድጋቤና ድራዉ፥5 17ታን ኔና ቱሙ አንጃና፤ ነ ዘረካ ታን ሳሉዋ ጾልንትያ ኬናነ አባ ዶና ሻፍያ ኬና ኦደ ጮርሳና። ነ ዘረቱ ባረንቱ ሞርከቱዋ ካታማቱዋ ላታና።6 18ኔን ታዉ አዛዘቴዳ ድራዉ፥ ሀ ሳኣ ካዉተቱ ኡባይ ነ ዘረ ባጋና አንጀታና’ ያጌ” ያጌዳ።7

19ሄዋፐ ጉየ፥ አብራሃመ ባረ ቆማቱዋኮ ስሚደ፥ ኡንቱንቱ ኡባይ እትፐ በርሳበሄ ደንዲደ ቤድኖ። አብራሃመ በርሳበሄን ደኤዳ።

ናኮራ የለታ

20ሄዋፐ ስሚደ አብራሃመዉ፥ “ምልካ ነ እሻ ናኮራዉ ናና የላዱ፤ 21ኡንቱንቱነ ባይራይ ኡጻ፤ ኡጻ እሻቱ ቡዛ፥ 22አራማ አዉዋ ቃሙኤላ፥ ኬሳደ፥ ሃዞ፥ ፕልዳሻ፥ ይድላፋነ ባቱኤላ። 23ሀዋንታ ሀ ሆስፑን ናናካ ምልካ አብራሃመ እሻ ናኮራዉ የላዱ፤ ባቱኤል ርብቆ የሌዳ። 24ራኡማ ግያ አ ቆማታ ቃይ ጸባሀ፥ ጋሃማ፥ ታሃሻነ ማእካ የላዱ” ያጊደ ኦዴድኖ።