Dawro Full Bible Ethiopic
ዶመ 20
አብራሃመነ አብመሌካ
አብራሃመ ማምረፐ ደንዲደ፥ ነጌባ ግያ ጋድያ ቤዳ፤ ቃዴሳነ ሹራ ግያ ካታማቱዋፐ ግዱዋን ደኤዳ፤ ጋራራንካ አማሬዳ ዎድያ ታኬዳ። ያን አብራሃመ ባረ ማቻቶ ሳሮ፥ “አ ታ ምቻቶ” ያጌዳ። ጋራራ ካቲ አብመሌክ ኪቲደ ሳሮ አፌዳ።1 ሽን ጾሳይ እት ቃማን አኩሙዋን አብመሌከኮ ዪደ፥ አ ሀዋዳን ያጌዳ፤ “ኔን አሄዳ ማቻት ጋሱዋን ሀይቃሳ፤ አያዉ ጎፐ፥ እዛ አሳ ማቻቶ” ያጌዳ።
ሽን አብመሌክ ኢኮ ሺቅቤና። ያቴዳዌ፥ “ጎዳዉ፥ ኔን ጽሎ ካዉተ ይሳኒየ? እ፥ ‘እዛ ታ ምቻቶ’ ግቤነየ? ቃይ እዛ፥ ‘እ ታ እሻ’ ጋበይኬ? ታን ታ ዎዛና ሱረተንነ ታ ኩሽያ ጌሻተን ሀዋ ኦድ” ያጌዳ።
ሄዋፐ ጉየ፥ ጾሳይ አኩሙዋን አ ያጌዳ፤ “ኤ፥ ኔን ነ ዎዛና ጌሻተን ኦዳዋ ታን ኤራድ፤ ሄዋ ድራዉ፥ ኔን እዞ ቦቼና ማላነ ታ ስንን ናጋራ ኦና ማላ ኔና ታን ተኣድ። ሀእ ሀ ብታንያ ማቻቶ ዛራ፤ አያዉ ጎፐ፥ እ ትምቢትያ ኦድያዋ፤ እ ነዉ ጾሳ ዎሳና፤ ኔን ፓጻ ደአና። ሽን እዞ ዛራና ዮፐ፥ ኔንነ ነዉ ደእያባይ ኡባይ ሀይቂያዋ ቱሙፐ ኤራ” ያጌዳ።
አብመሌክ ዎንተ ጋላስ ዎንታ ባረ ካዉተ ካፓቱዋ ኡባ ጼሴዳ፤ ሀ የዉዋ ኡባ ኡንቱንቶ ኦድና፥ ኡንቱንቱ ሎይ ዳሮ ያዬድኖ። ያትና አብመሌክ አብራሃማ ጼሲደ፥ “ኔን አያ ኑ ቦላ ኦዲ? ኔን ታ ቦላነ ታ ካዉተ ቦላ ዎልቃማ ናጋራ አሀናዉ ታን ነዉ አይ ኢታባ ኦድታ? ኔን ታ ቦላ ኦሰታናዉ በሰናባ ኦዳ” ያጌዳ። ቃይካ አብመሌክ አብራሃማ፥ “ኔና ሀዋ ኦስሴዳዌ አዬ?” ያጊደ ኦቼዳ።
አብራሃመ ያጌዳ፤ “ ‘ጾሳዉ ያይያ እት አሳይነ ሀ ሳኣን ባዋ’ ጋደ ቆፔዳ ድራሳነ፥ ‘ታ ማቻት ጋሱዋን ኡንቱንቱ ታና ዎና’ ጋደ ቆፔዳ ድራሳ። ሄዋ ቦላ እዛ ቱሙካ ታ ምቻቶ፤ ታ አት ናቶ ግዱኩፐ አትን፥ ታ አቡ ናቶ፤ ቃይ እዛ ታ ማቻቶ ግዳዱ። ጾሳይ ታና ታ አዉዋ ጎልያፐ ከሴዳ ዎደ ታን እዝዉ፥ ‘ኑን ቤዳ ጋድያን ኡባን ኔን ታዉ ኦና ኬካተይ ሀዋ፤ “እ ታ እሻ” ጋደ ታባ ሃሳያ’ ያጋድ” ያጌዳ።
ሄዋፐ ጉየ አብመሌክ ዶርሳ፥ መህያ፥ ማጫ አይለቱዋነ አቱማ አይለቱዋ አሂደ፥ አብራሃመዉ እሜዳ፤ ቃይ አ ማቻቶ ሳሮ አዉ ዛሬዳ። አብመሌክ፥ “ስም ታ ቢታይ ነ ስንና፤ ኔና ሎኦሳን ደአ” ያጌዳ። ሳሮካ፥ “ታን ነ እሻዉ እት ሻአ ጻጋራ ብራ2 እማይ፤ ሀዌ ስም ኔናና ደእያ ኡባ ስንን ኔን ጽላቶ ግድያዋነ ኔን ሻትሜዳዋ ኤርስያዋ ግዶ” ያጌዳ።
መና ጎዳይ አብራሃመ ማቻት ሳር ጋሱዋን አብመሌካ ጎለ አሳ ኡባ ቃን ማይንስ ዎዳ ድራዉ፥ አብራሃመ ጾሳ ዎስና፥ አብመሌክ፥ አ ማቻታነ አ ማጫ ቆማቱዋ ናኣ የላና ማላ ጾሳይ ኡንቱንታ ፓዳ።
Source notes (2)
- Cross-reference ዶመ 12:13፤ 26:7
- Footnote እት ሻአ ጻጋራ ብራ፦ ሀዌ ታማነ እታነ ባካ ኪሎ ግራመ ዴጼ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.