ዶመ 15

መና ጎዳይ አብራመና ጫቀቴዳ

1ሄዋፐ ጉየ፥ መና ጎዳ ቃላይ ሳጻን አብራመኮ ዪደ፥ “አብራማ፥ ያዮፓ! ታን ነዉ ጎንዳለ፤ ነ ጋቲ ሎይ ዳራ” ያጌዳ።

2አብራመ፥ “አቤት ኡባ ሞድያ መና ጎዳዉ፥ ታዉ ኡባካ ናእ ባይና ድራዉ፥ ኔን እምያ ጋቲ ታዉ አይሴ? ደማስቆ ኤልኤዛር ታና ላታና ሽን”1 ያጌዳ። 3ቃይካ አብራመ፥ “ኔን ታዉ ናኣ እማባካ፤ ሄዋ ድራዉ ታ ሶን ደእያ ቆማይ ታና ላትያዋ” ያጌዳ።

4መና ጎዳ ቃላይ አኮ ዪደ፥ “ሀ ቆማይ ኔና ላተና፤ ሽን ነ ጉልባታፐ ከስያዌ ኔና ላታና” ያጌዳ። 5ስሚደ ካረ አ ከሲደ፥ “ሳሉዋ ፑደ ጼላ፤ ኔን ጾልንተቱዋ ፓይዳናዉ ዳንዳዮፐ ፓይዳ፤ ነ ዘረይካ ሀዋ ኬሻ ግዳና” ያጌዳ።2

6አብራሞ መና ጎዳ አማኔዳ፤ መና ጎዳይ ሄዋ አዉ ጽሎተዳን ፓይዴዳ።3

7መና ጎዳይ ቃይካ አ፥ “ታን ኔን ሀ ቢታ ላታና ማላ ነዉ እማናዉ ኡር ግያ ካላዳዌቱዋ ካታማፐ ኔና ከሳ አሄዳ መና ጎዳቴ” ያጌዳ።

8ሽን አብራሞ አ፥ “አቤት ኡባ ሞድያ መና ጎዳዉ፥ ታን ሀ ቢታ ላታናዋ አያን ኤሮ?” ያጌዳ።

9መና ጎዳይ አ፥ “ሄዙ ላይ ኡሳ፥ ሄዙ ላይ ዴሻ፥ ሄዙ ላይ ዶርሳነ ላኡ ቆሞ ሀራጰቱዋ ታዉ አካደ ያ” ያጌዳ። 10እ ሀዋንታ ኡባ አዉ አፌዳ፤ ኡንቱንታ ጳልቂደ ላኡ ከሴዳ፤ ላኡዋ ከሴዳዋ እቱዋ እቱዋ ባጋን ዎዳ፤ ሽን ካፎቱዋ ላኡ ከስ ጳልቂቤና። 11ሄ ዎደ አንኮቱ ሄ አሹዋ ቦላ ዎድኖ፤ ሽን አብራመ ኡንቱንታ የደርሴዳ።

12አዋይ ዉልያ ዎደ አብራማ ዎልቃማ ገምእሹ ኦይቄዳ፤ ጵ ጌዳ ማይ አ ቦላ ዎዳ።4 13ያትና መና ጎዳይ አ፥ “ነ ዘረይ ሀራ ጋድያን በተ ግዲደ ደአናዋ ኔን ቱሙፐ ኤራ፤ ኡንቱንቱ አይለቲደ ኦይዱ ጼቱ ላይ ናቀታና።5 14ሽን አይለዪደ ኡንቱንታ ሞድያ ካዉተ ታን ሙራና፤ ሄዋፐ ጉየ፥ ኡንቱንቱ ዳሮ አቁዋና ሄ ቢታፐ ከሳና።6 15ኔና ግዶፐ፥ ኔን ነ ማይዛ አዎቱዋኮ ሳሮተን ባና፤ ኔን ሎይ ጭማደ ሀይቃናነ ሞገታና። 16ሽን ኦይደን የለታን ነ ዘረይ ሀ ጋድያ ስማና፤ አያዉ ጎፐ፥ አሞረቱ ናጋራይ ብሮ ልክያ ጋክቤና” ያጌዳ።

17አዋይ ዉልና ሳአይ ሜዳ፤ ጮጭያ ጩዋይነ ታማ ላጩ አኬከናን ቤቲደ፥ ሄ ላኡ ከስ ጳልቀቴዳዋንቱፐ ግዱዋና አዳ። 18ሄ ጋላስ መና ጎዳይ አብራመና ሀዋዳን ያጊደ ጫቁዋ ጫቀቴዳ፤ “ግብጼ ሻፋፐ ዶሚደ ኤፍራጺሳ ግያ ዎልቃማ ሻፋ ጋካናዉ፥ ሀ ቢታ ታን ነ ዘረዉ እማድ፤7 19-21ሀ ቢታይ ቄናቱዋ፥ ቀኒዘቱዋ፥ ቃድሞነቱዋ፥ ሂተቱዋ፥ ፓርዘቱዋ፥ ራፋየቱዋ፥ አሞረቱዋ፥ ካናነቱዋ፥ ገርጌሰቱዋነ ያቡሳቱዋ ቢታ” ያጌዳ።