Dawro Full Bible Ethiopic
ዶመ 12
አብራማ፥ ይሳቃነ ያቆባ ታርክያ
(12:1—35:29)
አብራሞ ጼሳ
መና ጎዳይ አብራማ ያጌዳ፤ “ኔን ነ ጋድያፐ፥ ነ ዳቦቱዋፐነ ነ አዉዋ ጎለ አሳፐ ሻከታደ፥ ታን ኔና በስያ ጋድያ ባ።1 ታን ኔና ዎልቃማ ካዉተ ኦና፤ ቃይ ታን ኔና አንጃና፤ ታን ነ ሱን ግታያና፤ ያትና ኔን አንጆ ግዳና፤ ታን ኔና አንጅያዋንታ አንጃና፤2 ቃይ ኔና ሸቂያዋንታ ታን ሸቃና፤ ሀ ሳኣ ቦላን ደእያ አሳይ ኡባይ ነ ባጋና አንጀታና”3 ያጌዳ።
አብራመ መና ጎዳይ አዉ ኦዴዳዋዳን ደንዲደ ቤዳ፤ ሎጸካ አናና ቤዳ፤ አብራመ ካራነፐ ቤዳ ዎደ፥ አዉ ላይይ ላፑን ታማነ እቼሻ። አብራመ ባረ ማቻቶ ሳሮ፥ ባረ እሻ ናኣ ሎጻ፥ ያን ሺሼዳ ባረንቱ ማጹዋ ኡባነ፥ ካራነን ኡንቱንቱ ደሜዳ ቆማቱዋ አኪደ፥ ካናነ ጋድያ ባናዉ ደንዴዳ፤ ቢደ ኡንቱንቱ ካናነ ጋድያ ጋኬድኖ።
አብራመ ሄ ጋድያን ሰኬማ ግያ ሳኣን ደእያ ሞረ ግያ ዎልቃማ ዎላ ጋካናዉ ሀመቲደ ቤዳ። ሄ ዎደ ካናነ አሳቱ ሄ ጋድያን ደእኖ። ሽን መና ጎዳይ አብራማዉ ቆንጪደ አ፥ “ሀ ጋድያ ታን ነ ዘረዉ እማና” ያጌዳ። እ ባረዉ ቆንጬዳ መና ጎዳዉ ሄ ሳኣን ያርሽያ ሳኣ ኬጺደ ጎይኔዳ።4 ሄዋፐ ደንዲደ፥ ቤቴለፐ አዋይ ዶልያ ባጋና ደእያ ደረትያ ሳኣ ቢደ፥ ሄዋን ቤቴለ አዋይ ዉልያ ባጋ አጊደ፥ ቃይ አይ አዋይ ዶልያ ባጋ አጊደ፥ ግዱዋን ባረ ዱንካንያ ጌዳ፤ ሄዋን መና ጎዳዉ ያርሽያ ሳኣ ኬጺደ፥ መና ጎዳ ሱን ጼሴዳ። ሄዋፐ ጉየ፥ አብራመ ያፐ ደንድ ቢደ ኔጌባ ባዙዋ ጋኬዳ።
አብራመ ግብጼ ቤዳ
ሄ ዎደ ሄ ጋዲ ኮሻቴዳ፤ ኮሻይ ጺጽ ደእያ ድራዉ፥ አብራመ አማሬዳ ዎድያ ደአናዉ ዱገ ግብጼ ዎዳ። ግብጼ ገላና ሀንሽን፥ አብራመ ባረ ማቻቶ ሳሮ ሀዋዳን ያጌዳ፤ “ስሳ፤ ኔን ሎይ ማላ ሎኦ ማጫ አሳ ግድያዋ ታን ኤራይ። ግብጼ አሳቱ ኔና በእያ ዎደ ኡንቱንቱ፥ ‘ሀና አ ማቻቶ’ ያጊደ ኡንቱንቱ ታና ዎና፤ ሽን ኔና ፓጻ አጋና። ስም ኡንቱንቱ ታዉ ነ ጋሱዋን ኬካና ማላነ፥ ቃይ ታን ሀይቀናን ነ ጋሱዋን አታና ማላ ኔን፥ ‘ታን አ ምቻቶ’ ያጋ”5 ያጌዳ።
አብራመ ግብጼ ቢታ ገሌዳ ዎደ፥ ግብጼ አሳቱ ሄ ምሽራታ ዳሮ ማላ ሎኦ ማጫ አሳ ግድያዋ በኤድኖ። ቃይ ግብጼ ካትያዉ ኦያ ካፓቱካ እዞ በኤዳ ዎደ፥ ካትያ ስንን እዞ ናሼድኖ፤ ያቲደ እዞ ካትያ ጎለ አፌድኖ። ያትና እዝ ጋሱዋን ካቲ አብራማ ሎኦ አይፍያን ጼሌዳ፤ አብራማዉ ዶርሳቱዋነ ቦራቱዋ፥ አቱማ ሀረቱዋነ ማጫ ሀረቱዋ፥ አቱማ ቆማቱዋነ ማጫ ቆማቱዋ፥ ጋሉዋ እሜዳ።
ሽን መና ጎዳይ አብራሞ ማቻት ሳር ጋሱዋን ግብጼ ካትያ ቦላነ አ ሶ አሳ ቦላ ዳሮ ካእያ ሀርግያ የዴዳ። ያትና ካቲ አብራማ ጼሲደ፥ “ኔን ሀዋ አያዉ ታ ቦላ ኦድ? እዛ ነ ማቻቶ ግዴዳዋ አያዉ ታዉ ኦዳበይኪ? ኔን እዞ፥ ‘እዛ ታ ምቻቶ’ ጋደ ታዉ አያዉ ኦዳዲ? ታን እዞ ታዉ ማቼ ኦናዉ አኬዳዌ ሄዋ ድራሳ። ስም ሀእ ነ ማቻቶ ሀኖ በአ፤ እዞ አካደ ባ” ያጌዳ። ባረ አሳ አዛዝና፥ ኡንቱንቱ አብራማ አ ማቻትናነ አዉ ደእያ ኡባባና ከሲደ የዴድኖ።
Source notes (5)
- Cross-reference ኪታ 7:2-3፤ እብራ. 11:8
- Cross-reference ጋላ. 3:8
- Footnote ነ ባጋና አንጀታና፦ ኔና አንጆዋዳ አንጃና ማላ ኡባይ ዎሳና።
- Cross-reference ኪታ 7:5፤ ጋላ. 3:16
- Cross-reference ዶመ 20:2፤ 26:7
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.