Dawro Full Bible Ethiopic
ዶመ 1
መታ ዶመባ
(1:1—2:3)
ጾሳይ ሳሎቱዋነ ሳኣ ኮይሮ መዳ። ሄ ዎደ ሳአይ ጊግቤናነ አያይነ ባይና መላ፤ ጪሙዋ ቦላን ማይ ደኤ፤ ጾሳ አያናይ1 ሃፐ ቦላና ማይ ኡቴዳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ፖኡ ሀኖ” ያጌዳ፤ ፖኡካ ሀኔዳ።2 ፖኡ ሎአ ግዴዳዋ ጾሳይ በኤዳ፤ ያቲደ ፖኡዋ ማፐ ሻኬዳ። ጾሳይ ፖኡዋ “ጋላሳ” ጊደ ሱንዳ፤ ማ “ቃማ” ጊደ ሱንዳ። ሳአይ ቃሜዳነ ዎንቴዳ፤ ሄዌነ ኮይሮ ጋላሳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ቦላና ደእያ ሃ ጋርሳና ደእያ ሃፐ ሻክያ ሳሉዋ ጉፋን ሀኖ” ያጌዳ፤ ጌተቶዋዳንካ ሀኔዳ። ጾሳይ ሳሉዋ ጉፋንዋ ጊግሲደ፥ ሳሉዋ ጉፋንዋፐ ቦላና ደእያ ሃ ጋርሳና ደእያ ሃፐ ሻኬዳ።3 ጾሳይ ሄ ጉፋንዋ “ሳሉዋ” ጊደ ሱንዳ። ሳአይ ቃሜዳነ ዎንቴዳ፤ ሄዌነ ላኤን ጋላሳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ሳሉዋፐ ጋርሳና ደእያ ሃይ እትሳን ኤሎ፤ መላ ሳአይ ቆንጮ” ያጌዳ፤ ሄዋፐ ጉይያን ሀኔዳ። ጾሳይ ሄ መላ ሳኣ “ቢታ” ጊደ ሱንዳ፤ ቃይ እት ሳኣን ኤሌዳ ሃ “አባ” ጊደ ሱንዳ። ያቲደ ጾሳይ ሄዌ ሎአ ግዴዳዋ በኤዳ። ሄዋፐ ስሚደ ጾሳይ፥ “ቢታይ ም ማታ ዶልሶ፤ ዘረ አይፊ ደእያ ካነ ዘረ አይፍያና ደእያ ቴርያ ም ዶልሶ” ያጌዳ፤ ሄዌካ ሀኔዳ። ቢታይ፥ ም ማታ አ ቆሙዋን ቆሙዋን ዶሌዳ። ጾሳይ ሄዌ ሎአ ግዴዳዋ በኤዳ። ሳአይ ቃሜዳነ ዎንቴዳ፤ ሄዌነ ሄዘን ጋላሳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ጋላሳ ቃማፐ ሻካናዉ ፖኦቱ ሳሉዋ ጉፋንዋን ሀንኖ፤ ኡንቱቱ ጋላሳ፥ ዎድያነ ላይ ኤርሳናዉ ማላ ግድኖ፤ ሳኣ ቦላን ፖእሳና ማላ ኡንቱቱ ሳሉዋ ጉፋንዋን ፖእኖ” ያጌዳ፤ ሄዋፐ ጉይያን ሀኔዳ። ጾሳይ ላኡ ዎልቃማ ፖኦቱዋ፥ ዳርያዌ ጋላሳ ሞዳናዳንነ ቄራእያዌ ቃማ ሞዳናዳን መዳ፤ ጾልንተቱዋካ እ መዳ። ጾሳይ ኡንቱቱ ሀ ሳኣ ቦላን ፖእሳና ማላ፥ ጋላሳነ ቃማ ሞዳና ማላነ ፖኡዋ ማፐ ሻካና ማላ፥ ሳሉዋ ጉፋንዋን ኡንቱንታ ዎዳ። ያቲደ ጾሳይ ሄዌ ሎአ ግዴዳዋ በኤዳ። ሳአይ ቃሜዳነ ዎንቴዳ፤ ሄዌነ ኦይደን ጋላሳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ደኡዋን ደእያ ዱማ ዱማ መታቱ ሃን ዳርኖ፤ ካፉካ ሳኣፐ ቦላናነ ሳሉዋ ጉፋንዋፐ ጋርሳና ፓሎ” ያጌዳ። ያቲደ ጾሳይ አባን ደእያ ዎልቃማ ዶአቱዋ፥ ሃ ግዶን ዎጽ ቃጽያ መታ ኡባነ ቀፍያና ደእያ ካፉዋ ኡባ አ ቆሙዋን ቆሙዋን መዳ። ጾሳይ ሄዌ ሎአ ግዴዳዋ በኤዳ። ጾሳይ ኡንቱንታ፥ “የለትተ፤ ጮርተ፤ አባ ሃ ኩምተ፤ ካፉካ ቢታ ቦላን ጮራቶ” ያጊደ አንጄዳ። ሳአይ ቃሜዳነ ዎንቴዳ፤ ሄዌነ እቼሸን ጋላሳ።
ጾሳይ ሄዋፐ ጉየ ሀዋዳን ያጊደ ሃሳዬዳ፤ “ደኡዋን ደእያ መታቱ ባረንቱ ቆሙዋን ቆሙዋን: መሄቱ፥ ቢታና ጎሸትያ መታቱነ ዶአቱ ባረንቱ ቆሙዋን ቆሙዋን ቢታ ቦላን ከስኖ” ያጌዳ፤ ሀኔዳ። ጾሳይ ዶአቱዋ ኡንቱንቱ ቆሙዋን ቆሙዋን፥ መሄቱካ ኡንቱንቱ ቆሙዋን ቆሙዋን፥ ቢታና ጎሸትያ መታቱዋካ ኡባ ኡንቱንቱ ቆሙዋን ቆሙዋን መዳ። ጾሳይ ሄዌ ሎአ ግድያዋ በኤዳ።
ሄዋፐ ስሚደ ጾሳይ፥ “አሳ ኑ ሌምሱዋን ኑና ማላትሲደ አነ መይተ፤ ኡንቱንቱ አባ ሞልያ፥ ሳሉዋ ካፉዋ፥ ቢታ ቦላ ዎጽ ቃጽያ መታ ኡባ ሞድኖ” ያጌዳ። ሀዋዳን ጾሳይ አሳ ባረ ሌምሱዋን መዳ፤ እ አሳ ጾሳ ሌምሱዋን መዳ፤ እ ኡንቱንታ አቱማ አሳነ ማጫ አሳ ኦደ መዳ።45
ጾሳይ ኡንቱንታ ሀዋዳን ያጊደ አንጄዳ፤ “የለትተ፤ ጮርተ፤ ሀ ሳኣ ኩምተነ ሞድተ፤ አባ ሞልያ፥ ሳሉዋ ካፉዋነ ቢታ ቦላ ዎጽ ቃጽያ፥ ደኡዋን ደእያ መታ ኡባ ሞድተ” ያጌዳ።
ሄዋፐ ስሚደ ጾሳይ፥ “በእተ! ታን ሀ ቢታ ኡባ ቦላን ዘረ አይፊያና ደእያ ካ ኡባነ ዘረ አይፊያና ደእያ ቴርያ ም ኡባ ህንተንቶ እማድ፤ ኡንቱንቱ ህንተንቶ ቁማ ግዳና። ቃይካ ሀ ሳኣን ደእያ መህያዉነ ዶኣ ኡባዉ፥ ሳሉዋ ካፉዋ ኡባዉ፥ ቢታና ጎሸትያ መታ ኡባዉነ ሸምፑዋና ደእያ መታ ኡባዉ ምያዋ ግዳናዳን፥ እርጻ ምነ ማታ እማድ” ያጌዳ፤ ሀኔዳ። ጾሳይ ባረ መዳ ኡባባካ ጼሌዳ፤ ዳሮ ሎአ ግዴዳዋ በኤዳ። ሳአይ ቃሜዳነ ዎንቴዳ፤ ሄዌነ ኡሱፑን ጋላሳ።
Source notes (5)
- Footnote ጾሳ አያናይ፦ ጾሳ ዎልቃ፤ ጾሳፐ ግዴዳ ጫርኩዋ።
- Cross-reference 2 ቆሮ. 4:6
- Cross-reference 2 ጰጽ. 3:5
- Cross-reference ማቶሳ 19:4፤ ማር. 10:6
- Cross-reference ዶመ 5:1-2
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.