እዝራ 9

እዝር አይሁዳ ግደና አሳቱዋና ፖለቴዳ አካነ ገሉዋ ሴሬዳ

1ሀ ኡባባይ ሀኔዳዋፐ ጉይያን፥ አሳ ካለያዋንቱ ታኮ ዪደ፥ ሀዋዳን ያጌድኖ፤ “እስራኤልያ አሳይ፥ ሀራይ አቶ ቄሳቱ ካ ሌዋቱካ፥ ባረንቱ ሄራን ደእያ አይሁዳ ግደና አሳቱዋፐ ባረንታ ሻክበይክኖ። ኡንቱንቱካ ካናነቱ፥ ሂተቱ፥ ፓርዛዋናቱ፥ ያቡሳዋናቱ፥ አሞናቱ፥ ሞኣባቱ፥ ግብጼቱነ አሞራዋናቱ ኦያዋዳን ቱና ኦሱዋ ኦኖ። 2ቃይ ባረንቶነ ባረንቱ ናናዉ አይሁዳ ግደና ማጫ ናናቱዋፐ ማቻቶ ኦደ አኬድኖ፤ ሄዋፐ ደንዴዳዋን ጌሻ ዘረቱ አይሁዳ ግደናዋንቱና ዋላከቴድኖ። ካለያዋንቱነ ካፓቱ አማነተናዋንታ ግዲደ፥ ሀዋ ማላ ኦናዉ ስን ጼራ ግደድኖ”።

3ታን ሀ የዉዋ ስሴዳ ዎደ፥ ታ ማዩዋነ ታ ቁማዩዋ ፔድ፤ ታ ሁጲያ ብናናነ ታ ቡቻካ ሾዳድ፤ ቃይ ዳሮ ዳጋማደ ኡታ አጋድ። 4ኦሞዱዋፐ ስሜዳ አሳይ ኦዳ ናጋራ ድራዉ፥ እስራኤልያ ጾሳይ ኦዴዳ ቃላዉ ያዪደ አሳይ ኡባይ ታን ደእያ ሳኣ ታኮ ሺቄዳ። ኦማርሳ ያርሹዋ ያርሽያ ዎዲ ጋካናስካ ዳጋማደ ኡቶ ሳኣፐ ታን ደንዳበይከ።

5ሽን ኦማርስ ያርሹዋ ያርሽያ ዎዲ ጋክያ ዎደ፥ ታ ማዩነ ታ ቁማዩ ፖሸት ኡት ደእሽን፥ ታን ካዉሻደ ኡቶ ሳኣፐ ደንዳድ። ቃይ ጉልባታደ መና ጎዳ፥ ታ ጾሳኮ፥ ታ ኩሽያ ደንደ፥ ሀዋዳን ያጋደ ዎሳድ፤ 6“አቤት ታ ጾሳዉ፥ ታን ታ ስን ኔኮ ፑደ ደንናዉካ ያያይነ ዬላታይ፤ አያዉ ጎፐ፥ ኑ ናጋራይ ዶረቲደ፥ ኑ ሁጲያፐ ፑደ አዳ፤ ኑ ናቁካ ሳሉዋ ጋኬዳ። 7ኑን ኑ ማይዛ አዎቱዋ ዎድያፐ ዶሚደ፥ ሀቼ ጋካናዉ፥ ኔና ሎይ ናቄዶ። ኑ ናጋራፐ ደንደዳዋን ኑን፥ ኑ ካተቱነ ኑ ቄሳቱ ሀእዋዳንካ አላጋ ካተቱዋ ኩሽያን ማሻዉ፥ ኦሞዶ፥ ቦንቂያዋነ ዉርሰ ዬላዉ አደ እመቴዶ።

8“ሽን ሀእ ኑዉ ጉ ማሮተ ዎዲ እመቴዳ፤ አያዉ ጎፐ፥ መና ጎዳይ ኑ ጾሳይ ኑፐ አማሬዳ ዘረቱ አታና ማላ ኦዳ፤ ሀ ጌሻ ሳኣን እ ኑና ሳሮተን ዎዳ። ኑ ጾሳይ ኑ አይፍያ ዶዬዳ፤ ቃይ ኑ አይለተፐካ ኑዉ ጉ ኦራ ደኡዋ እሜዳ። 9ኑን አይልያ ግዶፐነ፥ ኑ ጾሳይ ኑና አይለተን አግቤና፤ ኑ ደኡዋ ኦራዳ። ቃይ ኑ ጾሳ ጎልያ ኬጻና ማላ፥ ኮለቴዳዋ ኦራና ማላነ ይሁዳንነ የሩሳላመን ኑን ሳሮተን ደአና ማላ፥ ፓርሰ ቢታ ካተቱዋ ስንን ኑዉ ባረ አገና ሲቁዋ በሴዳ።

10“ሽን ኑ ጾሳዉ፥ ሀእ ያትና፥ ኑን ዋጋናዉ ዳንዳዬቶ? አያዉ ጎፐ፥ ኑን ሀእካ ነ አዛዙዋ አግ አጌዶ። 11ትምቢትያ ኦድያ ነ ቆማቱዋ ባጋና ኔን ሀዋዳን ያጋዳ፤ ‘ህንተ ላታናዉ ገልያ ጋዲ ሄ ጋድያን ደእያ አሳ ቱናተፐ ደንዴዳዋን ቱኔዳ፤ ሀ ጋጻፐ ቢደ፥ ህን ጋጻ ጋካናዉ፥ ኡንቱንቱ አ ባረንቱ ቱና ኪታን ኩንድኖ። 12ሄዋ ድራዉ፥ ህንተንቱ ምኖ ግዳና ማላ፥ ሄ ጋድያ አይፍያ ማና ማላነ መናዉ ህንተንቱ ናናቶ ላትሳና ማላ፥ ህንተንቱ ማጫ ናና ኡንቱንቱ አቱማ ናናዉ እሞፕተ፤ ኡንቱንቱ ማጫ ናናካ ህንተንቱ አቱማ ናናዉ አኮፕተ። ኡንቱንቱ ሳሮተንነ ዱረተን ደአና ማላካ አሞቶፕተ’።1

13“ኑ ቦላ ጋኬዳ ኢታባይ ኡባይ ኑ ኢታ ኦሱዋፐነ ኑ ዎልቃማ ናቁዋፐ ደንዴዳዋና። ግዶፐነ፥ ኔን ኑ ጾሳይ ኑ ናጋራ ዳሩዋ ኬሻ ኑና ፕርዳበይካ፤ ሽን ኑፐ አማሬዳዋንታ ዘረዉ አሻዳ። 14ያትና፥ ኑን ሀእካ ዛረደ፥ ሀዋ ማላ ቱናባ ኦያ አሳቱዋና እሙዋንነ አኩዋን ዋላከቲደ፥ ነ አዛዙዋ እጼዶ ጋኔ? ቃይ ሀ አቴዳ ጉ ዘረቱካ ያና ጋካናዉ፥ ነ ሀንቁ ኑ ቦላን ዳረኔየ? 15መና ጎዳዉ፥ እስራኤልያ ጾሳዉ፥ ኔን ጽሉዋ። ኑ ናቁዋፐ ደንዴዳዋን ኑፐ እቱነ ነ ስንን ኤቃናዉ ዳንዳየናዋ ግዶፐነ፥ ኑን ዘረዉ አቴዳዋንቱ ሀቼ ሀዋን ነ ስንን ደኤቶ” ያጋድ።