Dawro Full Bible Ethiopic
ከሳ 40
ጾሳ ዱንካንያ ቶከ
ሄዋፐ ጉይያን መና ጎዳይ ሙሳ፥ “ኮይሮ አግናዉ ኮይሮ ጋላስ፥ ኔን መና ጎዳ ዱንካንያ ቶካ። ቃላ ጫቁዋ ታቦታ አ ግዶን ዎ፤ ሄ ታቦታ ጋርዱዋን ካማ። ጻርጴዛ ገልሳደ፥ አ ቦላ ዎናዉ ኮሽያባ ኡባ ጊግሳደ አ ቦላ ዎ። ያታደ ጾምፐቱዋ ዎያ ባላ ሶ ገልሳደ፥ አ ቦላ ጾምፐቱዋ ኤ። እጻና ጩዋይያ ዎርቃ ሳጽንያ ቃላ ጫቁዋ ታቦታፐ ስንና ዎደ፥ ጾሳ ዱንካንያ ገልያ ጋርዱዋ ሶታ።
“ጹግያ ያርሹዋ ያርሽያ ሳኣ ጾሳ ዱንካንያፐ ስንና ዎ። ሜቻ ከርያ ጾሳ ዱንካንያፐነ ያርሽያ ሳኣፐ ግዱዋን ዎደ፥ አን ሃ ትጋ። ጾሳ ዱንካንያፐ ካረና ዩሻ አደ ዳባባ ጊግሳደ ዳባባ ገልያ ሳኣን ጋርዱዋ ሶታ።
“ኦክያ ዛይትያ አካደ፥ ጾሳ ዱንካንያነ አ ግዶን ደእያ ኡባባ ኦካ፤ አነ አ ግዶን ጎኤትያ ሚሻ ኡባ ዱማያ፤ ያቶፐ እ ጌሻ ግዳናዋ። ሄዋፐ ጉይያን ጹግያ ያርሹዋ ያርሽያ ሳኣነ አዉ ጎኤትያ ሚሻ ኡባ ኦካ፤ ያርሽያ ሳኣ ዱማያ፤ ያቶፐ እ ኡባፐ አያ ጌሻ ግዳናዋ። ሜቻ ከርያነ አ ኡትስያ ሚሻ ኦካደ ኡንቱንታ ዱማያ።
“ኔን አሮናነ አ ናና ጾሳ ዱንካንያ ገልያ ፐንገ አሃደ፥ ሃን ኡንቱንታ ሜጫ። ሄዋፐ ጉይያን ቄሰተ ጌሻ ማዩዋ አሮና ማይዛደ፥ እ ታዉ ቄሰተን ኦናዳን፥ አ ኦካደ ዱማያ። አ አቱማ ናናካ አሃደ ሻምጭያ ማይዛ። ኡንቱንቱ ታዉ ቄሰተን ኦናዳን፥ ኡንቱንቱ አዉዋ ኦኬዳዋዳን፥ ኡንቱንታካ ኦካ። ኡንቱንቱ ኦካይ ኡንቱንታካ ኡንቱንቱ ስን የለታ ኡባ ቄሳቱዋ ኦያዋ” ያጌዳ።
ሙሴ ኡባባካ ጾሳይ ባረና አዛዜዳዋዳን ኦዳ።
ሄዋ ድራዉ፥ ግብጼፐ ኡንቱንቱ ከሴዳ ላኤን ላይን፥ ኮይሮ አግናዉ ኮይሮ ጋላሳን ጾሳ ዱንካኒ ቶኬቴዳ። ሙሴ ጾሳ ዱንካንያ ኤስያ ዎደ፥ ሳጽነቱዋ ኡንቱንቱ ሳኣን ሳኣን ዎዳ፤ ጻጋገቱዋነ ቱሳ አዳ፤ ሽካላቱዋካ ገልሴዳ። ሄዋፐ ጉየ ሙሴ መና ጎዳይ አዛዜዳዋዳን፥ ሀ ኤሴዳዋ ቦላን ዱንካንያ ጌዳ፤ ሄ ኤሱዋ ቦላን ካሙዋ ካሜዳ።
ያቲደ ታሙ አዛዛቱ ጻፈቴዳ ማርካተ ቃላ አፊደ፥ ታቦታ ግዶን ዎዳ፤ ቶክያ ካሱዋ ታቦታን አዳ፤ አቶ ግያ ሳኣ ቁምእያ ታቦታ ቦላ ዎዳ። ሄዋፐ ጉይያን ታቦታ ጾሳ ዱንካንያ ገልሴዳ፤ ገንያ ጋርዱዋ ሶቲደ፥ መና ጎዳይ አዛዜዳዋዳን ቃላ ጫቁዋ ታቦታ ካሜዳ።
መና ጎዳይ ሙሳ አዛዜዳዋዳን፥ ሙሴ ጻርጴዛ መና ጎዳ ዱንካንያን ገልሲደ፥ ጋርዱዋፐ ካረና ሁጲሳ ባጋና ዎዳ። አ ቦላ መና ጎዳ ስንን ዎያ ጌሻ ኡክ ጊግሴዳ።
መና ጎዳይ ሙሳ አዛዜዳዋዳን፥ ጾምፕያ ዎያ ባላ ጾሳ ዱንካንያ ግዶ ገልሲደ፥ ጻርጴዛ ሄፍንና፥ ጾሳ ዱንካንያዉ ገድሳ ባጋና ዎዳ፤ ቃይ ጾምፐቱዋ መና ጎዳ ስንን ኦይዳ።
መና ጎዳይ አዛዜዳዋዳን፥ እጻና ጩዋይያ ዎርቃ ሳጽንያ ጾሳ ዱንካንያ ግዶን ጋርዱዋ ስን ባጋና ዎዳ፤ አ ቦላ ሳዊያ እጻና ጩዋዬዳ። ሄዋፐ ጉይያን ጾሳ ዱንካንያ ፐንግያን ጋርዱዋ ሶቴዳ።
ጹግያ ያርሹዋ ያርሽያ ሳኣ ጾሳ ዱንካንያ ገልያ ፐንግያ ምይያን ዎዳ፤ አ ቦላ ጹግያ ያርሹዋነ ካ ያርሹዋ መና ጎዳይ አዛዜዳዋዳን ያርሼዳ።
ጾሳይ ሙሳ አዛዜዳዋዳን፥ ሜቻ ከርያ ጾሳ ዱንካንያፐነ ያርሽያ ሳኣፐ ግዱዋን ዎዳ። ያቲደ ሜጨታናዉ ሃ አን ትጌዳ። ሙሴ፥ አሮነነ አ ናናይ ባረንቱ ኩሽያነ ገድያ አን ሜጨቲኖ። መና ጎዳይ ሙሳ አዛዜዳዋዳን፥ ኡንቱንቱ ጾሳ ዱንካንያ ገሌዳ ዎደ ዎይ ያርሽያ ሳኣኮ ሺቄዳ ዎደ አዉደነ ሜጨቲኖ።
ጾሳ ዱንካንያነ ያርሽያ ሳኣ ዩሽ አደ ዳባባ ከሴዳ፤ ሄ ዳባባ ፐንግያን ጋርዱዋ ሶቴዳ። ሄዋዳን ኦደ፥ ሙሴ ኦሱዋ ፖሌዳ።
ጾሳ ቦንቹ ጾሳ ዱንካንያ ኩሜዳ
(ፓይ. 9:15-23)
ሄዋፐ ጉይያን ሻሪ ጾሳ ዱንካንያ ካሜዳ፤ መና ጎዳ ቦንቹካ አ ኩሜዳ።1 ሻሪ ጾሳ ዱንካንያ ቦላ ኡቴዳ ድራዉነ መና ጎዳ ቦንቹ አ ግዶን ኩሜዳ ድራዉ፥ ሙሴ አ ግዶ ገላናዉ ዳንዳይቤና።
እስራኤላቱ ባረንቱ ኦግያ ኡባን፥ ሄ ሻሪ ጾሳ ዱንካንያፐ ደንድያ ዎደ አዉደነ አ ካሊደ ሀመታ ዶምኖ። ሽን ሄ ሻሪ ደንዳና ዮፐ፥ እ ደንድያ ጋላሳይ ጋካናዉ ኡንቱንቱካ ቃጽክኖ። ኡንቱንቱ ኦግያ ኡባን መና ጎዳ ሻሪ እስራኤልያ አሳይ ኡባይ በእሽን፥ ጋላስ ጋላስ ጾሳ ዱንካንያ ካሜነ ቃማ ቃማ ቃይ ታማይ ሄ ሻርያ ግዶን ኤጼ።
Source notes (1)
- Cross-reference 1 ካታ. 8:10-11፤ ኢሳ. 6:4፤ ህዝ. 43:4-5፤ ሳፃ 15:8
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.