Skip to content
BibleKenya

Dawro Full Bible Ethiopic

ከሳ 37

ታቦታ ኦሱዋባ

(25:10-22)

ባጻልኤል ኦዶሩዋ ምፐ ታቦታ ጊግሴዳ። ሄ ታቦታይ አዱሳተይ ላኡ ዋነ ባጋ አዱቄ፤ ጎምፓይ እት ዋነ ባጋ አኬ፤ ጌሳይካ እት ዋነ ባጋ ቄ። ሄ ታቦታ ጊግሲደ፥ ሶያነ ካርያ ዋላካይ ባይና ዎርቃን ሼሼዳ፤ ዩሹዋካ ዎርቃ ትገን ዩሽ አዳ። ቃይ ኦይዱ ዎርቃ ሳጋየቱዋ ትጊደ፥ ታቦታዉ ኦይዱ ገደቱዋን፥ እት ባጋና ላኡ ሳጋየቱዋ፥ ቃይ የንኮ ባጋና ላኡ ሳጋየቱዋ አዳ። ያቲደ ኦዶሮቱዋፐ ካሱዋ ከሲደ ኡንቱንታካ ዎርቃን ሼሼዳ። ታቦታ ቶካናዉ፥ ታቦታ ምይያን ደእያ ሳጋየቱዋን ካሱዋ አዳ።

ዋላካይ ባይና ዎርቃፐ ላኡ ዋነ ባጋ አዱቂያ፥ እት ዋነ ባጋ አክያ አቶ ግያ ሳኣ ቁምእያ መዳ። ቁምእያዉ ዉርሰ ላኡ ባጋ ጋጻን ላኡ ክሩቤላቱዋ ቆጸቴዳ ዎርቃፐ መዳ። እት ክሩብያ እት ባጋ ጋጻን፥ ላኤን ክሩብያ የንኮ ባጋ ጋጻን፥ ላኡዋካ ቁምእያና ጋ ኦይደ መዳ። ክሩበቱ ባረንቱ ቀፍያ ደንደ፥ አቶ ግያ ሳኣ ካምያ ቁምእያ ባረንቱ ቀፍያን ኩዋይ ዎድኖ፤ ቃይ እቱ እቱዋኮ ስም ኡቲደ፥ ቁምእያ ጼሊኖ።

ጻርጴዛ

(25:23-30)

ቃይ አዱሳተይ ላኡ ዋ፥ ጎምፓይ እት ዋ፥ ጌሳይካ እት ዋነ ባጋ ግዴዳ ጻርጴዛ ኦዶሩዋፐ መዳ። ዋላካይ ባይና ዎርቃን ሼሼዳ። ዩሹዋካ ዎርቃ ትገ ዩሽ አዳ። ሄዋዳንካ፥ ጎምፓይ ታካ ግዴዳ ሻሽያ አ ቦላ ዩሽ አዳ። ያቲደ አ ቦላ ዎርቃ ትገ ዩሼዳ። ኦይዱ ዎርቃ ሳጋየቱዋ መደ ኦይዱ ገደቱ መቴዳ ኦይዱ ጋጻቱዋና ኦይዳ። ጻርጴዛ ቶካናዉ ካሱዋ አያ ሳጋየቱ ጻርጴዛዉ ሻሽያ ጋጻን ሺቂደ መቴድኖ። ጻራጴዛ ቶክያ ካሶቱዋካ ኦዶሩዋፐ ከሲደ፥ ዎርቃን ሼሼዳ። ሄዋዳንካ፥ ጻርጴዛ ቦላ ዎያ ዱማ ዱማ ሚሻቱዋ ዋላካይ ባይና ዎርቃፐ መዳ፤ ሄዋንቱካ ሳነቱዋነ ጭልፓቱዋ፥ ቃይ ኡሻ ያርሹዋ ትግያ ከረቱዋነ ጹአቱዋ።

ጾምፕያ ዎያ ባላ

(25:31-40)

ሄዋፐ ጉይያን እ ጾምፕያ ዎያ ባላ ቆጸቴዳ ዋላካይ ባይና ዎርቃፐ መዳ፤ ሄ ባላ ኤስያ ገድያካ፥ ግዶ ቶማካ ቆጼዳ ዎርቃፐ መዳ። አ ኩኩሞቱዋ፥ አ ልጮቱዋን አ ጪሻቱዋ ኡባ አናና እትፐ ጾምፒደ መዳ። ምይያና ኡሱፑን ማራቱዋ መዳ፤ ማራቱዋ ሄዛቱዋ እት ባጋና፥ ቃይ ሄዛቱዋ የንኮ ባጋና ከሴዳ። ኡሱፑን ማራቶካ ሁጲያን ሁጲያን ሄዙ ሄዙ ኩኩሙነ ጪሻቱ ደእያ ላዉዝያ ጪሻ ማላትያ ዋንጫ መዳ፤ ጾምፕያ ዎያ ባላዉ ግዶ ቶማይ፥ ኩኩሞቱዋ ጪሻቱ ደእያ ጪሻ ማላትያ ኦይዱ ዋንጫን አሌቀት ኡቴዳ። ላኡ ላኡ እትፐ ዋን ደእያ ሄዙ ማራቱዋፐ ጋርሳና እት እት ኩኩማይ መት ኡቴዳ ኡባይካ ኡሱፑን ኩኩሞ። ኩኩማቱነ ማራቱ ኡባይ ጾምፕያ ዎያ ባላና እትፐ ኦይቀት እቱዋ ግዲደ፥ ዋላካይ ባይና ዎርቃፐ ቆጸቲደ መቴድኖ።

እ ቃይ ጾምፕያ ዎያ ባላዉ ላፑን ጾምፐቱዋ፥ ጾምፕያ ቶይስያ ቃጰቱዋነ ኡንቱንታ ዎያዋንታ ዋላካይ ባይና ዎርቃፐ መዳ። ጾምፕያ ዎያ ባላነ አን ጎኤትያ ሚሻ ኡባ መናዉ ሀታማነ እቼሹ ኪሎ ግራመ ግዴዳ ዋላካይ ባይና ዎርቃ ዉርሴዳ።

እጻና ጩዊስያ ሳጽንያ

(30:1-5)

ቃይ እጻና ጩውስያ ሳኣ ኦዶሩዋፐ መዳ። አዉ ኦይዱ ጋጻይ ደኤ፤ አዱሳተይ እት ዋ፤ ጎምፓይ እት ዋ፥ ጌሳይ ላኡ ዋ። አ ካጨቱካ አናና እቱዋ ግዲደ ኦይቀት መቴዳዋንታ። አዉ ቦላ ዶና፥ ኦይዱ ባጋ ኡባነ አ ካጨቱዋ ዋላካይ ባይና ዎርቃን ሼሺደ፥ አ ዩሹዋካ ዎርቃ ትገ ዩሽ አዳ። ሄ ዎርቃ ትገፐ ጋርሳና እጻና ጩውስያ ሳጽንያ ዎርቃፐ ላኡ ሳጋየቱዋ መዳ፤ ያቲደ ያ ባጋናነ ሀ ባጋና ላኡዋ ላኡዋ ኦይዳ። ሄዋንቱ ቶክያ ዎደ ካሱዋ አናዉ ማዳናዳና። ካሶቱዋ ኦዶሩዋፐ ከሲደ፥ ኡንቱንታ ዎርቃን ሼሼዳ።

ዛይትያነ እጻና

(30:22-38)

ቃይ ጌሻ ኦከትያ ዛይትያነ ሳዉዋ ቶሽኩ ግያ ሎኦ እጻና ሽቱዋ ኦያ ኤራን ጊግሴዳ።1

Source notes (1)
  1. Cross-reference ከሳ 30:22-38

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.