Skip to content
BibleKenya

Dawro Full Bible Ethiopic

ከሳ 27

ጹግያ ያርሹዋ ያርሽያ ሳኣ

(38:1-7)

“ኦዶሩዋፐ ያርሽያ ሳኣ ኬጻ። ሄ ያርሽያ ሳአዉ ጌሳይ እቼሹ ዋ ግዶ፤ ጎምፓይነ እት ልከ፥ እቼሹ እቼሹ ዋ፤ ቃተይ ሄዙ ዋ፥ ኦይዱ ጋጻና ደኦ። ዉርሰ ጋጻን ጋጻን እት እት ካጭያ መ፤ ካጨቱ ያርሽያ ሳኣና እትፐ ኦይቀቲደ መትኖ። ያታደ ያርሽያ ሳኣ ናሃስያ ብራታን ሼሻ። አን ጎኤትያ ሚሻቱዋ፥ ብድን ከስያ ባልደቱዋ፥ አካፋቱዋ፥ ሱ ትግያ ኩይጻሮቱዋ፥ ቃጲያ፥ ሴልያባ ኦይቂያ ሚሻ ናሃስያ ብራታፐ መ። ያታደ ናሃስያ ብራታፐ ዛዝርያ መ፤ ቃይ አ ኦይዱ ጋጻን ኦይዱ ሳጋየቱዋ መ። ያታደ ያርሽያ ሳአዉ ግዶ ባጋን ኦይደ ዎ ኦዶሩዋፐ ያርሽያ ሳአዉ ካሶቱዋ ከሳደ፥ ናሃስያ ብራታን ሼሻ። ያርሽያ ሳኣ ቶክያ ዎደ ማዳና ማላ፥ ሄ ካሱዋ ላኡ ምይያና ደእያ ሳጋየቱዋን አ። ታን ኔና ደርያ ቦላን በሴዳዋዳን፥ ያርሽያ ሳኣ ጻዉላፐ መደ፥ ጎምፓ መላ ከስኖ።

ጾሳ ዱንካንያዉ ዳባባ ዩሹዋ

(38:9-20)

“ጾሳ ዱንካንያዉ አሳይ ሺቅያ ዳባባ ጊግሳ። ዳባባይ ገድሳ ባጋና ጼቱ ዋ አዱቆ፤ ሄ ዳባባዉ ሊቆ ሊኑዋፐ ዳደቴዳ ጋርዳቱዋ ጊግሳ። አዉ ናሃስያ ብራታፐ ላታሙ ቱሳቱዋነ ቱሳቱ ኤቂያ ላታሙ ፖይ ገልያ ሉኩዋ ኦ፤ ኡንቱንቱ ሁጲያን ቃይ ብራፐ ካቂያዋንታነ ቱሳቱዋ ሁጲያን ቃችያዋንታ ኦ። ሄዋዳንካ፥ ዳባባዉ ሁጲሳ ባጋና ጼቱ ዋ አዱቆ፤ ቃይ ላታሙ ቱሳቱዋናነ ሄ ቱሳቶ ላታሙ ናሃስያ ፖይ ገልያ ሉኮቱዋና ደእያ ጋርዱ ደኦ። ያቲደ ብራፐ ኦሰቴዳ ካቂያዋንቱነ ቱሳቱዋ ሁጲያን ቃችያዋንቱ ዳባባዉ ደእኖ።

“ዳባባዉ አዋይ ዉልያ ባጋ ጎምፓይ እሻታሙ ዋ አኮ፤ ታሙ ቱሳቱነ፥ ቱሳቶ ታሙ ፖይ ገልያ ሉካቱ ደእያ ጋርዶቱ አዉ ደእኖ። ቃይ አዋይ ዶልያ ባጋ ዳባባ ጎምፓይካ እሻታሙ ዋ ግዶ። ዳባባ ገልያ ሳኣፐ አዋይ ዶልያ ባጋና ታማነ እቼሹ ዋ አዱቂያ ጋርዶቱ ደእኖ፤ ኡንቱንቶ ሄዙ ቱሳቱነ ሄዙ ፖይ ገልያ ሉኮቱ ደእኖ። ሄዋዳንካ፥ ህንኮ ባጋና ጋርዶቱ ታማነ እቼሹ ዋ አዱቂያ ጋርዶቱ ደእኖ፤ ኡንቱንቶ ሄዙ ቱሳቱነ ቱሳቶ ሄዙ ፖይ ገልያ ሉኮቱ ደእኖ።

“ዳባባ ገልያ ሳአዉ ላታሙ ዋ አዱቂያ ጋርዱዋ ጊግሳ፤ ሄዌካ ሳሉዋ ማላትያ፥ ኦቻ ቴራ ማላትያነ፥ ሾሎላ ዞኦ ቃጭናፐነ ሊቆ ሊኑዋፐ ዳደቴዳዋ፥ ጽልፕያን አሌቅስያዋን ጊግሳ። ኦይዱ ቱሳቱዋነ ቱሳቶ ኦይዱ ፖይ ገልያ ሉኮቱዋ ጊግሳ። ዳባባ ዩሹዋን ደእያ ቱሳቱዋ ኡባዉ ብራፐ ኦሰቴዳ ቃችያዋንቱነ ካቂያዋንቱ፥ ናሃስያፐ ኦሰቴዳ ፖይ ገልያ ሉኮቱ ደእኖ። ዳባባይ አዱሳተይ ጼቱ ዋ፥ ጎምፓይ እሻታሙ ዋ ግዶ፤ ፑድያ እቼሹ ዋ ቂያ ሊቁዋን ዳደቴዳ ሊኑዋፐ ኦሰቴዳ ጋርዶቱ ደእኖ፤ ያቲደ ቱሳቱዋ ናሃስያፐ ኦሰቴዳ ፖይ ገልያ ሉኮቱ ግድኖ።

“ጾሳ ዱንካንያን ኦያ ኦሶ ጎኤትያ ሚሻ ኡባይ፥ ኡንቱንቱ ጎአይ አያ ግዶፐነ፥ ጾሳ ዱንካንያ ገቱ ኡባናነ ዳባባ ገቱ ኡባናካ ጉጅና፥ ናሃስያ ብራታፐ መቲኖ።

ጾምፕያ ዛይትያ

(ዎጋ 24:1-4)

“ጾምፒ ቶኤናን ኤጺደ ደአና ማላ፥ አዉ ኮሽያ ጽሎ ዛይትያ ዎጋራ ቴራ ጫዲደ ጉምእና ከሴዳዋ ነዉ አሀና ማላ፥ እስራኤላቱዋ አዛዛ። አሮነነ አ ናናይ፥ ጾምፒ ጾሳ ስንን ቃሜዳ ሳአይ ዎንታና ጋካናዉ ፖአና ማላ፥ መና ጎዳ ዱንካንያ ግዶን፥ ማርካተ ታቦታ ስንን ደእያ ጋርዱዋፐ ካረና ኤኖ። ሀዌ እስራኤልያ አሳዉ መናዉ ዎ ዎጋ ግዲደ ደኦ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.