Dawro Full Bible Ethiopic
ዛረዋ 22
“እስራኤልያ አሳ ቦራይ ዎይ ዶርሳይ ባዪደ ዎራ ቢሺና በኦፐ፥ ሸነኮ ጋደ አጋ አጎፓ፤ አ ጎዳዉ ላጋ አሃደ እማ።1 ሄ መህያ ጎዳይ ነ ሄራ ግዳና ዮፐ፥ ዎይ አ ጎዳይ ኦነንቶ ኔን ኤራና ዮፐ፥ አ ጎዳይ ኮዪደ ያና ጋካናዉ፥ ነ ጎለ አካደ አፋ፤ እ ዪደ፥ ደምያ ዎደ፥ አዉ እማ። ሄዋዳን ሀርያ ግድና፥ ማዩዋ ዎይ አያነ ባዬዳዋ ደሞፐ፥ አ ጎዳዉ ዛራፐ አትና፥ ሸነኮ ጎፓ።
“እስራኤልያ አሳ ሀሪ ዎይ ቦራይ ኦግያን ኩንዴዳዋ በኦፐ፥ ማዳደ ደንፐ አትና፥ ሸነኮ ጋደ አጋ አጎፓ።
“ማጫ አሳይ አቱማ አሳ ማዩዋ ማዮፕኖ፤ አቱማ አሳይካ ማጫ አሳ ማዩዋ ማዮፕኖ። አያዉ ጎፐ፥ ሄዋ ማላባ ኦያ ኦናነ መና ጎዳይ ህንተ ጾሳይ ሻቴ።
“ኦግያን ነ ቢሺና፥ ምን ግድና፥ ሳኣን ባረ ማራ ዎይ ቁቁልያ ሀጳ ኡቴዳ ካፋቶ ደሞፐ፥ እዞ እ ማራና ጋ ኦይቃደ ነ ጎለ አፎፓ። ማራቱዋ አካ አፋናዉ ዳንዳያሳ፤ ሽን ዳዮ ባናዳን የዳ አጋ። ሄዋዳን ኦፐ፥ ኔን ዱረታደ አዱሳ ላይ ደአና።
“ኦራ ጎልያ ኬጽያ ዎደ፥ ቃ ካራፐ አሳይ ኩንድ ሀይቂና ነ ኦሸተናዳን፥ ዘምፒደ አትያዋ ጊግሳ።
“ነ ዎይንያ ሾይቃን ላኡ ቆሞ ካ ዘሮፓ፤ ሄዋዳን ኦፐ፥ ነ ዘሬዳ ካይነ ዎይኒ ላኡካ ባያና።2
“ቦራነ ሀርያ እትፐ ዋጻደ ጎሾፓ።
“ሱፍያፐነ ሊኑዋፐ ዋላካን ዳደቴዳ ማዩዋ ማዮፓ።
“ነ ማዬዳ ማዮ ኦይዱ ባጋናካ ማጫራይ ደኦ።3
ገሉዋ አኩዋ ጌሻተን ናግያዋ
“እት አሳይ ማቻቶ አኪደ፥ እዝና አቅ ስሚደ፥ እዞ ዶሳና ዮፐ፥ ‘ሀኖ ታ አካደ እዝና አቅያ ዎደ፥ ህጊ እዝዉ ባዋ’ ያጊደ እዞ ባይዚደ ሃሳዮፐ፥ ሄ ናት አዉነ ዳያ እ ህግያ ማላታ አክ አፊደ፥ ካታማ ፐንግያን ደእያ ጭማቱዋ በስኖ። ናት አዉ ጭማቶ ሀዋዳን ያጊደ ኦዶ፥ ‘ታን ታ ናቶ ሀዎ ማቼ ኦደ እማድ፤ ሽን እ እዞ እጼዳ። እ፥ “ነ ናትን ህጊ ባዋ” ያጊደ እዞ ባይዚደ ሃሳየ፤ ሽን ታ ናት ህግያ ማላታ ሀዋ በእተ’ ያጊደ፥ እዝ ህግያ ኤርስያ ጫርቂያ በሶ። ያትና ሄ ካታማ ጭማቱ አ ሙርኖ። እ እስራኤልያ ዎዶራት ሱን ባይዜዳ ድራዉ፥ ጭማቱ አ ጼቱ ጻጋራ ብራ ሙሪደ፥ ሄዋ ናት አዎ እምኖ። ናታካ አዉ ማቼ ግዳደ ደኡ፤ ባረ ደኦ ላይ ኡባን እ እዞ የዳናዉ በሰና።
“አ ሞቱ ቱማ ግዲደ፥ ናትን ዎዶሮተይ ዮፐ፥ ናቶ እዝ አዉዋ ካረ አሂደ፥ ሄ ካታማ አቱማ አሳይ እዞ ሹቻን ጫዲደ ዎ። አያዉ ጎፐ፥ አ ባረ አዉዋ ሶን ደኣደ ሻርሙጻ ግዳደ፥ እስራኤልያ ግዶን ሀ ፖኮባ ኦዱ፤ ሄዋዳን ኦደ ህንተ ግዶፐ ኢታ ድግተ።
“አይ አሳይነ ሀራ አሳ ማጫ አሳና ሻርሙጺደ ኦይቀቶፐ፥ እካ አናና ሻርሙጼዳ ማጫ ምሽራታካ ሀይቂኖ። ሄዋዳን ኦደ፥ ህንተ ግዶፐ ኢታ ድግተ።
“አይ አሳይነ ሀራዉ ጊጌዳ ዎዶራቶ ካታማ ግዶን ደሚደ እዝና ሻርሙጾፐ፥ ኡንቱንታ ላኡዋካ ካታማፐ ጋጻ ከሲደ፥ ሹቻን ጫዲደ ዎተ። አያዉ ጎፐ፥ ናታ ካታማን ደኣደ፥ አሳይ አሻናዳን ዋሳበይኩ። እ ሀይቂያዌ ቃይ ሀራ አሳዉ ጊጋ ኡቴዳ ዎዶራቶ ባይዜዳ ግሻሳ። ሄዋዳን ኦያዋን ህንተ ግዶፐ ኢታ ድግተ።
“እት አሳይ አሳዉ ጊጌዳ ዎዶራቶ አሳይ ባይና ሳኣን ዎልቃን ኦይቂደ፥ እዝና ግሶፐ፥ አ ጻላላይ ሀይቆ። ናቶ አይነ ኦፕተ፤ እዞ ዎናዉ በስያ ናጋራ ኦበይኩ። ሀዌ እት አሳይ ጮ ባረ ሾሩዋ ቦላ ደንዲደ፥ ዎያ አሳ ፕርዳ ማላ ፕርዳ። አያዉ ጎፐ፥ እ እዞ አሳይ ባይና ሳኣን ደሚደ ኦይቂና፥ ሄ ዎዶሮ ናታ ዋሳዱ፤ ሽን እዞ አሽያ አሳይ ደእቤና።
“አይ አሳይነ አሳዉ ጊጋቤና ዎዶራቶ ኦይቂደ፥ እ ህግያ አክ ድጊደ ኦይቀቶፐ፥4 ናት አዎ እሻታሙ ጻጋራ ብራ ጭጎ። ያቲደ ናቶ ባረዉ ማቼ ኦ። ባረ ደኦ ላይ ኡባን እዞ የዶፖ።
“አይ አሳይነ ባረ አዉዋ ማቻቶ አኪደ፥ ባረ አዉዋ ካዉሾፖ።5
Source notes (5)
- Cross-reference ከሳ 23:4-5
- Cross-reference ዎጋ 19:19
- Cross-reference ፓይ. 15:37-41
- Cross-reference ከሳ 22:16-17
- Cross-reference ዎጋ 18:8፤ 20:11፤ ዛረ. 27:20
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.