ኪታ

የሱስ ኪቴዳዋንቱ ኦሱዋ

ገሉዋ

የሱስ ኪቴዳዋንቱ ኦሱዋ ጌተትያ ማጻፋይ፥ ሉቃሳ ምሽራቹዋ ካሊደ ጻፈቴዳ ማጻፋ። አዉ ደእያ ሁጰ ቆፋይ ኮይሮ የሱሳ ካሌዳ አሳቱ ጌሻ አያናን ካለሰቲደ፥ አባ ኦድያ ምሽራቹዋ ቃላ “የሩሳላመን፥ ይሁዳ ጋድያ ኡባን፥ ሳማርያን፥ ሳኣ ጋጻ ጋካናዉ” ምሽራቹዋ ቃላ ዎት ጋድያ ኡባ ጋደንቶ ኦዳናሳ (ኪታ 1:8)። ማጻፋይ ክርስትና አማኑ አይሁዳ አሳቱዋ ግዶን ዶመቲደ፥ ኩመን አላምያን ደእያ አሳ ኡባ አማኑዋ ግዳና ጋካናዉ ዋን አኬደንቶ ኦድያ ታርክያ። ጻፊ፥ አማንያ አሳቱ ሮማ ካዉተ ኦላናዉ ጋርሳና ማቀትያ አሳ ግደናዋነ ክርስትና አማኑ አይሁዳቱዋ አማኑዋ ኩመን ኦያዋ ግድያዋ ኤርሳናዉ ዳርስ ዳቡሪደ ኦዳ።

የሱስ ኪቴዳዋንቱ ኦሱ የሱሳባ ኦድያ ምሽራቹዋ ቃላይ ጋክያ ሳአይ ዎድያን ዎድያን አክ አክ ብያዋነ ዎሳ ጎሊ ኤቄዳዋ ቆንጭስያዋ ሄዙ ሁጰ ሳን ሻካናዉ ዳንዳየቴ:

1. ክርስትና አማኑ የሱስ ሳሉዋ ፑደ ብ ስምና ዶመቴዳባ፤

2. እስራኤልያ ጋድያ ኡባ ጋኬዳባነ፤

3. ሮመ ጉጂደ ሜድትራንያ አባ ዩሹዋን ደእያ ጋድያን አኬዳዋ ኦዴ።

የሱስ ኪቴዳዋንቱ ኦሱዋ ማጻፋን ዳሮፐ ኤረቶዌ ጌሻ አያና ኦሱዋ ግድሽን፥ ጰንጸቆስተ ጋላስ የሩሳላመን ደእያ አማንያዋንቱ ቦላ ዎልቃፐ እ ዎዳዋ፥ ሀዋዳንካ ማጻፋ ግዶን ኦደቴዳ ኦሳቱዋ ኡባን ቤቴዳዋዳን፥ ጌሻ አያናይ ዎሳ ጎልያነ ዎሳ ጎልያ ካለያዋንታ ካለዳዋነ ምንሴዳዋ ጉጂደ ኦዴ። በን ዎደ ኦሰትያ ክርስትና ኪታይ ዱማ ዱማ ኦዴዳ ቃላ ግዶፐ ማጽ ከስና፥ ቃንን ሺቄዳ። የሱስ ኪቴዳዋንቱ ኦሱዋ ግዶን ፖለቴዳ ኪታቱካ ሄ ኦሱ አማንያ አሳ ደኡዋንነ አማንያዋንቱ እትፐተን ደእያ ዎልቃይ አይ ኬና ዳረንቶ ኦዴ።

ሸምፓቱዋ ኡባቶ እመቴዳ ቃን ቆፋቱዋ

ማርካተዉ ጊጉዋ

ዉርሰን የሱስ እሜዳ አዛዙዋነ ህዶታ

ይሁዳ ኮታ ገሌዳዋ

የሩሳላመን ኦሰቴዳ ማርካተ

ይሁዳንነ ሳማርያን ኦሰቴዳ ማርካተ

ጳዉሎስ ኪተቴዳ ኦሱዋባ

ጳዉሎስ ኪተቴዳ ኦሶ ኮይሮ ሀመታ

የሩሳላመ ሺቁዋ

ጳዉሎስ ኪተቴዳ ኦሶ ላኤን ሀመታ

ጳዉሎስ ኪተቴዳ ኦሶ ሄዘን ሀመታ

የሩሳላመን፥ ቄሳርያንነ ሮመን ሀኔዳ ጳዉሎሳ ቃሹዋ