Dawro Full Bible Ethiopic
2 ሳሜላ 9
ዳዊታነ ማንፍቦሼታ
እት ጋላስ ዳዊተ፥ “ዮናታና ድራዉ፥ ታን አዉ ኬካናዳን ሀኖ ጋካናዉ ሳኦላ ቃንፐ አቴዳ አሳይ ደኢሻ?” ያጊደ ኦቼዳ።1
ሄ ዎደ ጺባ ግያ እት ቆማይ ሳኦላ ሶን ደኤ፤ እ ዳዊታ ስን ያናዳን ጼሴድኖ፤ ዪና ካቲ አ፥ “ኔን ጺቤ?” ያጊደ ኦቼዳ።
እካ፥ “ኤ ታን ጺባ፥ ነ ቆማ” ያጌዳ።
ሄዋፐ ጉየ ካቲ አ፥ “ጾሳ ኬካተ ታን ኬካናዳን፥ ሳኦላ ቃንፐ ፓላሄዳ እት አሳይነ ባዌ?” ያጌዳ።2
ጺብ ካትያ፥ “ዮናታና ናናቱዋፐ እቱ ሀኖ ጋካናዉ ደኤ፤ ሄ ናአዉ ላኡ ገደቱካ ስላ” ያጌዳ።
ካቲ፥ “እ ሀቃን ደኢ?” ያጌዳ።
ጺብ፥ “ሎዳባራ ግያ ሳኣን አምኤላ ናኣ ማክራ ሶን ደኤ” ያጌዳ።
ሄዋፐ ጉየ ካትያ ዳዊተ ኪቲደ፥ ሎዳባራፐ አምኤላ ናኣ ማክራ ሶፐ አህሴዳ።
ሳኦላ ናኣ ዮናታና ናአይ ማንፍቦሼተ ዳዊታኮ ዬዳ፤ ይ ጋኪደ፥ ዳዊታ ስንን ጾነታድ ጊደ ግሴዳ።
ያትና፥ ዳዊተ አ፥ “ማንፍቦሼታ!” ያጊደ ጼሴዳ።
እ፥ “አቤ ታ ጎዳዉ፥ ታን ነ ቆማ” ያጌዳ።
ዳዊተ አ፥ “ያዮፓ፤ ነ አዉዋ ዮናታና ድራዉ፥ ታን ነዉ ኬካና። ነ አዉዋ አዉዋ ሳኦላ ጋድያ ኡባ ታን ነዉ ዛራና፤ ቃይ ኔን ኡባ ዎደ ታ ማሶፍያፐ ማና” ያጌዳ።
ሄዋፐ ጉየ ማንፍቦሼተ ላኤንዋ ግሲደ፥ “ሀይቄዳ ካና ማላ ታና ኔን ዶሳደ ጼላናዉ፥ ነ ቆማይ ታን ኦኔ?” ያጌዳ።
ካቲ፥ ሳኦላ ቆማ ጺባ ጼሲደ፥ “ሳኦለዋነ ሳኦላ ሶ አሳዋ ግዴዳዋ ኡባ ታን ነ ጎዳ ናኣ ናአዉ እማድ። ነ ጎዳ ናኣ ናአይ ማናዳን ኔን፥ ነ ናናይነ ነ ቆማቱ አዉ ጋድያ ጎሽተ፤ ዶልያ ካ አዉ አህተ። ግዶፐካ፥ ነ ጎዳ ናኣ ናአይ ማንፍቦሼተ ኡባ ዎደ ታ ማሶፍያፐ ማና” ያጌዳ። ጺባዉ ታማነ እቼሹ አቱማ ናናይነ ላታሙ ቆማቱ ደኢኖ።
ጺብ ካትያ፥ “ኔን ታ ጎዳይ ካቲ ነ ቆማ አዛዜዳ ኡባባ ታን ነ ቆማይ ፖላና” ያጌዳ። ሄዋ ድራዉ፥ ማንፍቦሼተ ካትያ ናናቱዋፐ እቱዋዳን ካትያ ማሶፍያፐ ሜዳ።
ማንፍቦሼታዉ ሚካ ግያ ጉ ናአይ ደኤ። ጺባ ሶን ደእያ አሳቱ ኡባቱ ማንፍቦሼታዉ ቆማ ግዴድኖ። ማንፍቦሼተ ኡባ ዎደ ካትያ ማሶፍያፐ ምያ ድራዉ፥ እ የሩሳላመን ደኤ። አ ገዲ ላአቱካ ስላ።
Source notes (2)
- Cross-reference 1 ሳሜላ 20:15-17
- Cross-reference 2 ሳሜላ 4:4
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.