2 ጰጽሮሳ ኪታ 2

ዎርዶ አስታማራቱዋ

1ሽን ትምቢትያ ኦድያ ዎርዳቱ አሳ ግዶን ካሰ ደእያዋዳን፥ ህንተ ግዶንካ ዎርዱዋ ታማርስያዋንቱ ደአና። ኡንቱንቱ ባረና ዎዜዳ፥ ጎዳ ካዲደ፥ ባይዝያ ዎርዶ ትምርትያ አሀና፤ ቃይ ኡንቱንቱ አኬከና ባሻ ባረንቱ ቦላ አሀና። 2ቃይ ዳሮ አሳይ ዬላይያ ኡንቱንቱ ኢታ ኦግያ ካላና፤ ኡንቱንቱ ጋሱዋን ቱሙዋ ኦጊ ቦረታና። 3ዎርዱዋ ታማርስያ ሄዋንቱ ሻሎ ያረትያዋን ባረንቱ መ አኬዳ ቶሳን ህንተና ቦንቃና፤ በንፐ ዶሚደ፥ ኡንቱንቱ ፕርዳይ ጊግ ኡቴዳ፤ ኡንቱንታ ይስያዌ ቤጎቲደ ናጌ።

4ናጋራ ኦዳ ኪታንቻቶ ጾሳይ ቃረተናን፥ ፕርዳ ጋላሳይ ጋካናዉ ማ ኦላን ኡንቱንቱ ቃሸት ኡቴዳ ጋናምያን የጌዳ። 5ጾሳይ ናጋራንቻቱዋ ቦላ ባሻ ሃ የዴዳፐ አትን፥ በን አሳዉ ኬክቤና፤ ሽን ጽሎተባ ኦዴዳ ኖሀነ ሀራ ላፑ አሳቱዋ አሼዳ።1 6ጾሳይ ሶዶማነ ጋሞራ ግያ ካታማቱዋ ቢታ ብድን ኦደ፥ ጉድ ይሲደ፥ ናጋራንቻ ግድያዋንታ ጋካናባዉ ሌምሱዋ ኦዳ።2 7ህገዉ አዛዘተና ቱናተ ኦያ አሳቱዋ ግዶን ቱጋቲደ ደእያ ጽሉዋ ሎጻ ጾሳይ አሼዳ።3 8ሄ ሎኦ ብታኒ ኡንቱንቱ ግዶን ደኢደ፥ ኡንቱንቱ ኦያ ኢታ ኦሱዋ ጋላስ ጋላስ በኤዳ ዎደነ ስሴዳ ዎደ አ ሎኦ ዎዛናይ ኡንኤቴዳ። 9-10ሄዋ ግዶፐ፥ ጎዳይ ጾሳዉ ጎይንያ አሳቱዋ ፓጭያፐ ዎት አሻነንቶ ኤሬ፤ ናጋራንቻቱዋ ቃይ ኡባፐ አደ፥ ቱና አሙዋን አሹዋ አሙዋ ካልያዋንታነ ቃይ ጾሳ ዎልቃ ካያዋንታ፥ ፕርዳ ጋላሳይ ጋካናዉ ጎዳይ ሙሪደ ዎናዋካ ኤሬ።

ዎርዱዋ ታማርስያ ሄዋንቱ ጻላነ ኦቶራንቻ ግዴዳዋን፥ ቦላን ደእያ ቦንቾ መታ ቦሪኖፐ አትን፥ ቦንችክኖ። 11ሄ ዎርዱዋ ታማርስያ አሳቱዋፐ ዳሮ ምኖነ ዎልቃማ ግድያ ኪታንቻቱካ ኡንቱንታ ጎዳ ስንን ቦርያን ሞታናዉ ኮይክኖ። 12ሽን ሄ አሳቱ ኦይቀቲደ ያናዉ የለቴዳ ባረንቱ መታን ዎዛናይ ባይና ዎራ ዶአቱዋዳን ሀኒኖ፤ ኡንቱንቱ ኤረናባ ቦሪኖ፤ ቃይ ባረንቱ ባይዙዋን፥ ኡንቱንቱ ጮ ያና። 13ኡንቱንቱ ባረንቱ መዳ መቱዋን መቶታና፤ ጋላስ የጺደ ዱርያዋ ናሸችያባ ጊደ ቆፒኖ፤ ኡንቱንቱ ካዉሽስያዋንታነ ቱናቱዋ ግድ ኡቲደ፥ ህንተናና ምያ ቁማ ሙሳን ናሸቲኖ። 14ጫራትያ ማጫ አሳ ጼልያዋ አገና አይፊ ኡንቱንቶ ደኤ፤ ቃይ ናጋራ ኦያዋካ አግክኖ። አማኑዋን ምንቤና አሳ ጭሚኖ። አሙዋ ዶዬዳ ዎዛናይ ኡንቱንቶ ደኤ፤ ኡንቱንቱ ሸቀቴዳዋንታ። 15ሱረ ኦግያ አጊደ ባሌድኖ። ብኦራ ናኣ ባላማ ኦግያና ቤድኖ፤ ባላም ማካላን ሚሻ አካናዉ ኮዬዳ።4 16እ ትምቢትያ ኦድያዋ፤ ሽን አ ናጋራ ድራዉ፥ አ ሀሪ አሳዳን ሃሳያን ሴሪደ፥ ጎሻ ማላ ሀኑዋፐ አ ተኤዳ።

17ሄ አሳቱ መል ድጌዳ ፑልቱዋ ማላ፤ ቃይ ጎቱ ቶኪደ አፍያ ሻርያ ማላ፤ ጾሳይ ኡንቱንቶ ሳካና ማ ጊግስ ዎዳ። 18አያዉ ጎፐ፥ ኡንቱንቱ መላነ ኦቶሮ ሃሳያ ሃሳዪኖ፤ ባሊደ ደእያ አሳፐ ከስ ዬዳዋንታ ዎልቃማ አሹዋ አሙዋን ጭሚኖ። 19ኡንቱንቱ ባረዉ ባሻ አሙዋና ደኢደ ኡንቱንታ፥ “ህንተ አይለተፐ ከሳና” ያጊኖ፤ አያዉ ጎፐ፥ እት አሳይ ባረና ጾኔዳባዉ አያዉነ አይልያ። 20ኡንቱንቱ ኑ ጎዳነ ኑና አሽያ የሱስ ክርስቶሳ ኤራተን ሀ ሳኣ ቱናተፐ ከስ አኬዳዋፐ ጉይያን፥ ጉየ ስሚደ፥ አን በቲደ ጾነትያዋ ግዶፐ፥ ካሰ ደእያ ደኡዋፐ ጉየዌ ኡንቱንቶ ኢታና። 21አያዉ ጎፐ፥ ኡንቱንቶ እመቴዳ ጌሻ አዛዙዋ ኤሪደ አግያዋፐ ኡንቱንቱ ጽሎተ ኦግያ ኤረናን አግንቶ ሎአ ሽን። 22“ካናይ ባረ ጮሻኮ ጉየ ስሜ” ግያ ሌምሱነ ቃይ፥ “ሜጨቴዳ ጉዱንይ ጉየ ስሚደ፥ ኡርቃን ጎንዶረቴ” ግያ ሌምሱ ቱማ ግድያዋ ኡንቱንታ ጋኬዳዌ በሴ።5