2 ዮሃንሳ ኪታ 1

1-2ታን አማንያዋንታ ካለያ ጭማይ፥ ህንተንቶ፥ ዶረቴዳ ገንዉነ እዝ ናናዉ1 ሀ ዳብዳቢያ ጻፋይ፤ ኑ ግዶን ደእያ ቃይ ኑናና መናዉ ደአና ቱማተ ድራዉ፥ ታን ህንተና ቱሙ ሲቃይ። ቃይ ታ ጻላላ ግደናን፥ ቱማተ ኤርያ ኡባቱ ህንተና ሲቂኖ።

3ጾሳ ኑ አዉዋነ አ ናኣ የሱስ ክርስቶሳ አ ኬካተይ፥ ማሮተይነ ሳሮተይ ቱማተንነ ሲቁዋን ኑናና እትፐ ግዶ።

ቱሙዋባነ ሲቁዋባ

4ጾሳ አዉ ኑና አዛዜዳዋዳን፥ ነ ናናቱዋፐ አማሬዳዋንቱ፥ ቱማተን ደእያዋ በኣደ ታን ዳሮ ናሸታድ። 5ሲቆ ገኔ፥ ሀእካ ኑን ኡባይ እቱ እቱዋና ሲቀታና ማላ፥ ታን ኔና ዎሳይ፤ ሀ አዛዙ ካሴደፐ ኑናና ደእያ አዛዙዋፐ አትን፥ ታን ነዉ ኦራ አዛዙዋ ጻፍከ።2 6ሲቁዋ ግያዌ ኑን ጾሳ አዛዙዋ ናጊደ ደእያዋ ግያዋ። ቃይ ኮይሩዋፐ ህንተ ስሴዳዋዳንካ፥ አ አዛዙ አዬ ጎፐ፥ ህንተ ኡባይ ሲቁዋን ደአናዋ።

7አያዉ ጎፐ፥ የሱስ ክርስቶስ አሳ ግዲደ ዬዳዋ አማኖኮ ግያዋንቱ፥ ባለያ ዳሮ አሳቱ፥ ጋደ ግዶ ገሌድኖ። ሄዋ ማላ ኡራይ ኦንነ አሳ ባለያዋነ ክርስቶሳ ኤቀትያዋ። 8ህንተ ኦዳዎ ኩመን ዎይታ አካናፐ አትን፥ ኑን3 ኦዳዋ ባይዘና ማላ፥ ህንተና ናግተ።

9ክርስቶሳ ትምርትያፐ ሃክያ ኡራዉነ ቃይ አ ትምርትያን ደኤና ኡራዉ ጾሳና እትፐተይ ባዋ። ክርስቶሳ ትምርትያን ደእያ ኡራዉ ጾሳ አዉዋናነ አ ናኣና እትፐተይ ደኤ። 10ኦንነ ህንተኮ ዪደ፥ ሀ ትምርትያ አሄናን አጎፐ፥ ህንተ ጎለ አ ገልሶፕተ፤ ሳሮካ ጎፕተ። 11አያዉ ጎፐ፥ አ ሳሮ ግያ ኡራይ አ ኢታ ኦሱዋ አናና ግሸቴ።

ዉርሰ ሳሮታ

12ታን ህንተንቶ ጻፋናዉ ኮዬዳ ዳሮባይ ደኤ፤ ሽን ዋራቃታንነ ቃላምያን ጻፋናዉ ኮያበይከ፤ ሽን ኑ ናሸቻይ ፖለታና ማላ፥ ህንተናና ዶናን ሃሳያናዉ ህንተኮ ባና ጋደ ቆፓይ።

13ሲቆ ገኔ፥ ጾሳይ ዶሬዳ ነ ምቻት ናናይ ኔና ሳሮ ሳሮ ያጊኖ።