Skip to content
BibleKenya

Dawro Full Bible Ethiopic

2 ኦዱዋ 6

ሶሎሞነ አሳዉ ሃሳዬዳ ሃሳያ

(1 ካታ. 8:12-21)

ሄዋፐ ጉይያን፥ ሶሎሞነ ሀዋዳን ያጌዳ፤ “አቤት መና ጎዳዉ፥ ኔን፥ ‘ታን ማ ሻርያን ደአና’ ያጋ ዎዳ። ሽን ታን ነዉ ሎኦ ጌሻ ጎልያ፥ ኔን አን መናዉ ደአና ሳኣ ኬጻድ” ያጌዳ።

እስራኤልያ ያአይ ኩመንይ ኤቂደእሽን፥ ካቲ ኡንቱንቱኮ ስሚደ፥ ኡንቱንታ ሀዋዳን ያጊደ አንጄዳ፤ “መና ጎዳይ እስራኤልያ ጾሳይ ጋላተቶ! ታ አዉዋ ዳዊታዉ ባረ ዶናን ኦዴዳ ህዶታ ባረ ኩሽያን ፖሌዳ። ሄ እ ኦዴዳ ናሸቻይ፥1 ‘ታን ታ አሳ እስራኤልያ ግብጼፐ ከሳደ አሄዳ ጋላሳፐ ዶምና፥ ታ ሱንይ አን ጼሰታናዋ ማላ፥ ጌሻ ጎልያ ኬጻናዉ እስራኤልያ ዛራቱዋ ግዶን አያ ካታማነ ዶራበይከ፤ ዎይ እ ታ አሳ እስራኤልያ ካለና ማላ፥ ኦናነ ዶራበይከ። ሽን ሀእ ታ ሱንይ የሩሳላመን ጼሰታና ማላ፥ ታን የሩሳላመ ዶራድ፤ ቃይ ታ አሳ እስራኤልያ ካለና ማላ፥ ዳዊታ ዶራድ’ ያጌዳ።

“ታ አዉ ዳዊተ መና ጎዳዉ እስራኤልያ ጾሳ ሱንዉ ጌሻ ጎልያ ኬጻናዉ ባረ ዎዛናን ቆፔዳ። ሽን መና ጎዳይ ታ አዉዋ ዳዊታ፥ ‘ኔን ታ ሱንዉ ጌሻ ጎልያ ኬጻናዉ ነ ዎዛናን ቆፔዳ ድራዉ፥ ሎኦባ ኦዳ። ግዶፐነ፥ ጌሻ ጎልያ ኬጻናዌ ኔና ግዳካ፤ ታ ሱንዉ ጌሻ ጎልያ ኬጻናዌ ነ ጉልባታፐ የለታና ነ ናኣ’ ያጌዳ።

“ሀእካ መና ጎዳይ ባረ ጌዳ ህዶታ ቃላ ፖሌዳ። መና ጎዳይ ካሰ እሜዳ ናሸቻዳንካ፥ ታን ታ አዉዋ ዳዊታ ሳኣን ካተታናዉነ ሀእ እስራኤልያ ካዉተ አራታን ኡታድ። ቃይ መና ጎዳ እስራኤልያ ጾሳ ሱንዉ ጌሻ ጎልያ ኬጻድ። መና ጎዳይ እስራኤልያ አሳና ጫቀቴዳ ጫቁ ጻፈቴዳ ማሰቴዳ ሹቻቱ ደእያ ታቦታካ አ ግዶን ዎድ” ያጌዳ።

ሶሎሞነ ዎሳ

(1 ካታ. 8:22-53)

ሶሎሞነ አኮተይ እቼሹ ዋ፥ ጎምፓይ እቼሹ ዋነ ቃይ ጌሳይ ሄዙ ዋ ግዴዳ ማድራክያ ናሃስያ ብራታፐ ጊግሲደ፥ ካረ ዳባባ ግዶን ኤስ ዎዳ። ሄዋፐ ጉይያን፥ ሶሎሞነ መና ጎዳዉ ያርሽያ ሳኣ ስንን፥ እስራኤልያ ያአይ ኩመንይ ደእያ ሳኣን ኤቂደ፥ ባረ ኩሽያ ሳሉዋ ዛሪደ ምጬዳ፤ እስራኤልያ ሽቁዋ ኩመን ስንን ጉልባቴዳ። ያቲደ ሀዋዳን ያጊደ ዎሴዳ፤ “አቤት መና ጎዳዉ፥ እስራኤልያ ጾሳዉ፥ ሳሉዋን ዎይ ሳኣን ነ ማላ ጾስ ባዋ። ኔን ነ ቃላ ጫቁዋ ናጋሳ፤ ባረንቱ ኩመን ዎዛናፐ ነ ስንን ሀመቴዳ ነ ቆማቱዋ አገና ሲቁዋን ሲቃሳ። ነ ቆማዉ፥ ታ አዉዋ ዳዊታዉ ኔን ኦና ጋደ ሃሳዬዳ ቃላ ናጋዳ፤ ኔን ካሰ ነ ዶናን ሃሳዬዳዋ ነ ኩሽያን ሀቼ ፖላዳ።

“ሀእካ አቤት መና ጎዳዉ፥ እስራኤልያ ጾሳዉ፥ ኔን ነ ቆማዉ፥ ታ አዉዋ ዳዊታዉ፥ ‘ኔን ታ ስንን ሀመቴዳዋዳን ነ ናናይካ ታ ህግያን ሀመታናዉ ባረንቱ ኦግያ ናጎፐ፥ እስራኤልያ ካዉተ አራታን ኡትያ አሳ ኔን ኡባካ ያካ’ ያጌዳ ቃላ ፖላ።2 አቤት መና ጎዳዉ፥ እስራኤልያ ጾሳዉ፥ ኔን ነ ቆማ ዳዊታዉ ሃሳዬዳ ነ ቃላይ ሀእካ ፖለቶ።

“ሽን ጾሳይ ቱሙ፥ አሳና እትፐ ሀ ሳኣን ደአኔየ? በአ፥ ሳሎቱ፥ ኡባፐ ቃን ደእያ ሳሎቱካ ነዉ ግዳናዉ ዳንዳይክኖ። ያትና፥ ሀ ታን ኬጼዳ ጌሻ ጎሊ ነዉ አያ ኬሻ ጉጻንዴሻ!3 ግዶፐነ፥ አቤት መና ጎዳዉ፥ ታ ጾሳዉ፥ ታ ዎሳ፥ ነ ቆማ ዎሳነ ዋትዋቱዋ ኔን ሀይዛ። ታን ነ ቆማይ ነ ስንን ዎስያ ዎሳነ ዋሱዋ ኔን ስሳ። ኔን ‘ታ ሱንይ ሄ ሳኣን ጼሰታና’ ጌዳ ሀ ጌሻ ጎልያኮ፥ ነ አይፊ ቃማነ ጋላስ ጼሎ። ታን ነ ቆማይ ሀ ጌሻ ጎልያኮ ስማደ፥ ዎስያ ዎሳ ኔን ስሳ።4 ታን ነ ቆማይነ ነ አሳይ እስራኤሊ ሀ ጌሻ ጎልያኮ ስሚደ፥ ዎትዋትያ ዋትዋቱዋ ኔን ስሳ። ኔን ደእያ ሳኣን ሳሉዋን ስሳደ፥ ኑዉ አቶ ያጋ።

“እት አሳይ ባረ ሾሩዋ የዲደ ጰ ጊና፥ አ ጫቀናዉ ሀ ጌሻ ጎልያ አህና፥ አ ግዶን ደእያ ያርሽያ ሳኣ ስንን እ ጫቆፐ፥ ኔን ሳሉዋን ስሳደ ኪተታ። ነ ቆማቱዋ ግዱዋን ፕርዳ። ባይዛንችቱዋ ቦላ ፕርዳደ፥ እ ኦዳዋ አ ቦላ ዛራ፤ ጽሉዋ ሻትንደ፥ አዉ አ ጽሎተዳን ዛራ።

“ነ አሳይ እስራኤሊ ነ ቦላ ናጋራ ኦዳ ጋሱዋን ሞርክያን ጾነቲደ፥ ኡንቱንቱ ኔኮ ስሚደ፥ ነ ሱን ጼሲደ፥ ሀ ጌሻ ጎልያን ኔና ዎሶፐነ ነዉ ዋትዋቶፐ፥ ኔን ሳሉዋን ስሳ። ስሳደ ነ አሳ እስራኤልያ ናጋራ አቶ ያጋ፤ ያታደ ኔን ካሰ ኡንቱንቱዉነ ኡንቱንቱ ማይዛ አዋቶ እሜዳ ቢታዉ ኡንቱንቱ ጉየ ዛራ።

“ነ አሳይ ነ ቦላ ናጋራ ኦዳ ጋሱዋን ሳሉ ጎርደትናነ እራይ ቡከናን እጽና፥ ኡንቱንቱ ሀ ሳኣ ስሚደ፥ ዎሶፐነ ኔን ኡንቱንቱ ዎሳን ኡንኤዳ ድራዉ፥ ነ ሱን ጼሲደ፥ ባረንቱ ናጋራፐ ስሞፐ፥ ኔን ሳሉዋን ስሳ። ነ ቆማቱዋ ናጋራ፥ ነ አሳ እስራኤልያ ናጋራ አቶ ያጋ። ኡንቱንቱ ሀመታናዉ በስያ ሎኦ ኦግያ ኡንቱንታ ታማርሳ፤ ያታደ ኔን ነ አሳ ላትሴዳ ጋድያን እራ ቡክሳ።

“ቢታ ቦላን ኮሻይ ዎይ ኢታ ሀርጊ ዪና፥ ዎይ ካ ሌጊ፥ ዎይ ሌሹ፥ ዎይ ቦሊ፥ ዎይ ቡምቡረይ ባይዝና፥ ዎይ ሞርኪ ኡንቱንቱ ካታማቱዋ ዶድና፥ ዎይ አያ ማላ ባሻይ ዎይ ሀርጊ ዪና፥ ነ አሳ እስራኤልያፐ ኦንነ ዎይ ነ አሳይ ኡባይ ኔና ዎሶፐነ ነዉ ዋትዋቶፐ፥ ቃይ አያ አሳይነ ባረ ዎዛናን ኡንኤትያባነ ካዮትያባ ኤሪደ፥ ሀ ጌሻ ጎልያኮ ስሚደ፥ ባረ ኩሽያ ምጮፐ፥ ኔን ደእያ ሳኣን ሳሉዋን ስሳ። ኡንቱንቱ ናጋራ አቶ ያጋ፤ ያታደ ኡንቱንቶ ኪተታ። ኔን አሳ ዎዛና ኤርያዋዳንካ አሳ ኡባዉ አ ኦሱዋዳን ኦሱዋዳን እማ። አያዉ ጎፐ፥ አሳ ኡባ ዎዛና ኤርያዌ ነ ጻላላ። ያቶፐ፥ ኔን ኑ ማይዛ አዋቶ እሜዳ ጋድያን ባረንቱ ደእያ ዎደ ኡባን፥ ኡንቱንቱ ነዉ ያዪደ፥ ነ ኦግያን ሀመታና።

“ሄዋዳንካ፥ ነ አሳ እስራኤልያ ግደና ካረ ቢታ አሳይ ነ ዎልቃማ ሱን ድራዉነ ኔን ነ አሳዉ ኦዳ ማላልስያ ኦሶቱ ድራዉ፥ ሃኮ ጋድያፐ ዪደ፥ ሀ ጌሻ ጎልያኮ ስሚደ ዎሶፐ፥ ኔን ደእያ ሳኣን ሳሉዋን ስሳ። ሄ ካረ ጋድያ አሳይ ኦችያዋ ኡባ ኪተታ። ሀ ሳኣ አሳይ ኡባይ ነ ሱን ኤራናዳን፥ ነ አሳ እስራኤልያዳን ነዉ ያያናዳንነ ታን ኬጼዳ ሀ ጌሻ ጎሊ ነዉ ጎይንያ ሳኣ ግድያዋ ኡንቱንቱ ኤራናዳን ካረ ጋድያ አሳይ ኔና ዎስያዋ ኡባ ፖላ።

“ነ አሳቱ ባረንቱ ሞርከቱዋ ኦላና ማላ፥ ኔን ኪቴዳ ሳኣ ሀቃነ ቢደ፥ ኡንቱንቱ ኔን ዶሬዳ ሀ ካታማኮነ ታን ነ ሱንዉ ኬጼዳ ጌሻ ጎልያኮ ስሚደ፥ ኔና ዎሶፐ፥ ኡንቱንቱ ዎሳነ ዋትዋቱዋ ሳሉዋን ኔን ስሳ፤ ኡንቱንቶ ጾኑዋ እማ።

“ናጋራ ኦና አሳይ ባይናዋዳንካ፥ ኡንቱንቱ ነ ቦላ ናጋራ ኦና፥ ኔን ኡንቱንቶ ሀንቀታደ ሞርከቶ አ እምና፥ ሞርከቱካ ኡንቱንታ ኦሞዲደ፥ ሃክና ማትናካ ባረንቱ ጋድያ አኪደ አፍና፥ ኡንቱንቱ ሄ ኦሞደቴዳ ቢታን ደኢደ፥ ባረንቱ ዎዛናን ናጋራፐ ስሞፐ፥ ቃይ ሄ ኦሞደቴዳ ጋድያን ደኢደ፥ ‘ኑን ናጋራ ኦዳ፤ ኑን ባይዜዶ፤ ኑን ኢታባ ሀኔዶ’ ያጊደ ነዉ ዋትዋቶፐ፥ ባረንታ ኦሞዲደ አፌዳ ሞርከቱዋ ቢታን ደኢደ፥ ኡንቱንቱ ባረንቱ ኩመን ዎዛናፐነ ባረንቱ ኩመን ቆፋፐ ኔኮ ስሞፐ፥ ኔን ኡንቱንቱ ማይዛ አዋቶ እሜዳ ኡንቱንቱ ቢታኮ፥ ኔን ዶሬዳ ካታማኮነ ታን ነ ሱንዉ ኬጼዳ ጌሻ ጎልያኮ ስሚደ፥ ኔና ዎሶፐ፥ ያቶፐ፥ ኡንቱንቱ ዎሳነ ዋትዋቱዋ ኔን ደእያ ሳኣን ሳሉዋን ስሳ። ስሳደ ኡንቱንቶ ፕርዳ፤ ነ ቦላ ናጋራ ኦዳ ነ አሳዉ አቶ ያጋ።

“ሀእካ አቤት ታ ጾሳዉ፥ ሀ ሳኣን ዎስያ ዎሳ ነ አይፊ ጼሎ፤ ነ ሀይይካ ስሶ። ሄዋ ድራዉ፥ አቤት መና ጎዳዉ፥ ጾሳዉ፥ ደንዳ! ነ ዎልቃዉ ማላታ ግዴዳ ነ ታቦታና ነ ሸምፕያ ሳኣ ገላ። አቤት መና ጎዳዉ፥ ጾሳዉ፥ ነ ቄሳቱ አቶተ ማዪኖ፤ ነ ጌሻ አሳቱካ ነ ኬካተን ናሸትኖ።5 አቤት መና ጎዳዉ፥ ጾሳዉ፥ ኔን ኦኬዳ ካትያ አጎፓ። ነ ቆማ ዳዊታዉ አገና ነ ሲቁዋ ሀሳያ” ያጌዳ።

Source notes (5)
  1. Cross-reference 2 ሳሜላ 7:1-13፤ 1 ኦዱዋ 17:1-12
  2. Cross-reference 1 ካታ. 2:4
  3. Cross-reference 2 ኦዱዋ 2:6
  4. Cross-reference ዛረ. 12:11
  5. Cross-reference ማዝ. 132:8-10

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.