2 ኦዱዋ 36

ይሁዳ ካትያ ዮአካዛ

(2 ካታ. 23:30-35)

1ሄዋፐ ጉይያን፥ ሄ ቢታ አሳይ ዮስያሳ ናኣ ዮአካዛ ዶሬድኖ፤ አ አዉዋ ሳኣን የሩሳላመን ካተዬድኖ። 2ዮአካዝ ካተትያ ዎደ፥ ላይይ አዉ ላታማነ ሄዛ፤ እ የሩሳላመን ሄዙ አግና ካተቴዳ። 3ሄዋፐ ጉይያን፥ ግብጼ ካቲ ዮአካዛ የሩሳላመ ካተተፐ ዎዳ፤ ሄዙ ሻአነ ኦይዱ ጼቱ ኪሎ ግራመ ዴጽያ ጻጋራ ብራነ ሀታማነ ኦይዱ ኪሎ ግራመ ዴጽያ ዎርቃ ይሁዳ አሳ ጊርሴዳ። 4ግብጼ ካቲ ዮአካዛ እሻ ኤልያቅማ ይሁዳ ቦላነ የሩሳላመ ቦላ ካተዬዳ፤ አ ሱን ዮኣቄማ ያጊደ ላሜዳ። ያቲደ ዮኣቄማ እሻ ዮአካዛ ግብጼ አፌዳ።1

ይሁዳ ካትያ ዮኣቄማ

(2 ካታ. 23:36—24:7)

5ዮኣቄም ካተትያ ዎደ፥ ላይይ አዉ ላታማነ እቼሻ፤ እ የሩሳላመን ታማነ እት ላይ ካተቴዳ። መና ጎዳ ባረ ጾሳ ስንን ኢታባ ኦዳ።2 6ባብሎነ ካቲ ናቡካዳናጾረ አ ኦለቲደ፥ ባብሎነ አፋናዉ ናሃስያ ሳንሳላታን ቃቼዳ።3 7ናቡካዳናጾረ ቃይ መና ጎዳ ጌሽሳ ጎልያፐ ሻሉዋ አኪደ፥ ባብሎነ አፊደ፥ ባረ ካትያ ጎለን ዎዳ።

8ዮኣቄም ሀኔዳ ሀራባይ፥ እ ኦዳ ቱናባይነ እ ኦዳ ኢታባይ ኡባይ እስራኤልያ ካተቱነ ይሁዳ ካተቱ ታርክያ ማጻፋን ጻፈት ኡቴዳ። እ ሀይቂና፥ አ ኮታን አ ናአይ ዮኣኪነ ካተቴዳ።

ይሁዳ ካትያ ዮኣኪና

(2 ካታ. 24:8-17)

9ዮኣኪነ ካተትያ ዎደ፥ ላይይ አዉ ሆስፑና፤ እ የሩሳላመን ሄዙ አግናነ ታሙ ጋላሳ ካተቴዳ። መና ጎዳ ስንን እ ኢታባ ኦዳ።4 10ላይይ ላመትያ ዎደ ካቲ ናቡካዳናጾረ አሳ ኪቲደ፥ ዮኣኪናነ መና ጎዳ ጌሻ ጎልያን ደእያ አልኦ ሚሻቱዋ አናና እትፐ ባብሎነ አህሴዳ። ያቲደ አ አዉዋ እሻ ሰደቅያሳ ይሁዳ ቦላነ የሩሳላመ ቦላ ካተዬዳ።5

ይሁዳ ካትያ ሰደቅያሳ

(2 ካታ. 24:18-20፤ ኤር. 52:1-3)

11ሰደቅያስ ካተትያ ዎደ፥ ላይይ አዉ ላታማነ እታ፤ እ የሩሳላመን ታማነ እት ላይ ካተቴዳ።6 12መና ጎዳ ባረ ጾሳ ስንን እ ኢታባ ኦዳ፤ ቃይ መና ጎዳ ሱንን ትምቢትያ ኦድያ ኤርማሳ ስንን ባረና ካዉሽቤና።

የሩሳላመ ኩንደነ አሳይ ባብሎነ ኦሞደቱሳ

(36:13-23፤ 2 ካታ. 25:1-21፤ ኤር. 52:3-11)

13ሰደቅያስ አማነታናዳን ባረና ጾሳ ሱንን ጫቀዳ ናቡካዳናጾራ ቦላ ማካሌዳ። መና ጎዳኮ እስራኤልያ ጾሳኮ ስምያዋ አጊደ፥ ባረ ሞርግያ ዞዝሴዳ፤ ባረ ዎዛናካ ሙምሴዳ።7 14ቃይ ይሁዳ አሳይነ ኡንቱንታ ካለያ ቄሳቱ፥ ኡባካ አማነተናዋንታ ግዴድኖ። ኡንቱንቱ ሀራ ካዉተ አሳይ ኦያ ሸነይያ ኦሳቱዋ ቁሊደ፥ መና ጎዳይ የሩሳላመን ጌሼዳ አ ጌሻ ጎልያካ ቱንሴድኖ።

15መና ጎዳይ፥ ኡንቱንቱ ማይዛ አዎቱዋ ጾሳይ ባረ አሳዉነ ባረ ጌሻ ጎልያዉ ቃረትያ ድራዉ፥ ባረ ትምቢትያ ኦድያዋንታ ኡንቱንቶ ዛር ዛሪደ ኪቴዳ። 16ሽን መና ጎዳ ሀንቁ ኡንቱንቱ ቦላ ዎናዋ ጋካናዉነ ኡንቱንቶ ከስ አክያ ሳአይ ያና ጋካናዉ፥ ኡንቱንቱ ጾሳይ ኪቴዳዋንቱ ቦላ ቅሊጬድኖ፥ አ ቃላ ካድኖነ ትምቢትያ ኦድያዋንቱ ቦላ ሚጬድኖ።

17ሄዋ ድራዉ፥ ጾሳይ ባብሎነ ካትያ ኡንቱንቱ ቦላ ደንደ አሄዳ። ያትና ኡንቱንቱ ያላጋ አቱማ አሳ ጌሻ ጎልያ ግዶን ማሻን ዎዳ፤ ያላጋ አቱማ አሳቶ፥ ዎይ ጌላዮቶ፥ ዎይ ጭማቶ፥ ቃረተናን፥ ጾሳይ ኡንቱንታ ኡባ ናቡካዳናጾራ ኩሽያን አደ እሜዳ።8 18ባብሎነ ካቲ ጾሳ ጌሻ ጎልያን ደእያ ሚሻቱዋ ኡባ፥ ዳሩዋነ ላፋ፥ መና ጎዳ ጌሻ ጎልያን ደእያ ሚሻ፥ ካትያ ሚሻነ አ ኦሳንቻቱ ሚሻ ኡባ አኪደ፥ ባብሎነ አፌዳ። 19ሄዋፐ ጉይያን፥ ባብሎነ ኦላንቻቱ ጾሳ ጌሻ ጎልያ ታማን ጹጊደ፥ የሩሳላመ ድርሳ ግምቢያካ ላሌድኖ። ካትያ ጎልያ ኡባ ታማን ጹጊደ፥ ያን ደእያ አልኦ ሻሉዋ ኡባ ይሴድኖ።

20ካቲ ማሻፐ ፓላሂደ አቴዳዋንታ ኦሞዲደ ባብሎነ አፌዳ። ፓርሰ ካዉተይ ዎልቃማና ጋካናዉ፥ ኡንቱንቱ አዉነ አ ናናዉ ቆማ ግዴድኖ። 21ሄዋን መና ጎዳይ ትምቢትያ ኦድያ ኤርማሳ ባጋና ኦዴዳ ቃላይ ፖለቴዳ። ዉርሰን ቢታይ ላፑን ታሙ ላይ ኩመን አሳይ ባይና ሳኣ ግዲደ ሸምፔዳ፤ ሄዌነ፥ ላፑን ላፑን ላይ ሳምባታ ኦደ፥ ጋድያ ሸምፕስያዋ አሳይ አጌዳ ግሻሳ።9

ቅሮሰ አይሁዳቱ ስማናዳን አዛዜዳ

(እዝራ 1:1-4)

22ፓርሰ ካቲ ቂሮስ ካተቴዳ ኮይሮ ላይን፥ ትምቢትያ ኦድያ ኤርማሳ ባጋና መና ጎዳይ ሃሳዬዳዋ ፖሌዳ። ፓርሰ ካቲ ቂሮስ ባረ ካዉተ ግዶን ኡባ ሳን ሀዋዳን ያጊደ አዋያናዳንነ ጻፊደ ዎናዳን መና ጎዳይ አ አያና ደንዳ፤ 23“ፓርሰ ካቲ ቂሮስ ሀዋዳን ያጌ፤ ‘መና ጎዳይ፥ ሳሉዋ ጾሳይ ሀ ሳኣ ካዉተቱዋ ኡባ ታዉ እሜዳ፤ ቃይ ይሁዳን ደእያ የሩሳላመን ታን አዉ ጌሻ ጎልያ ኬጻናዳን ታና ሱንዳ። መና ጎዳ አሳ ግዴዳ ኦንነ ያ ቦ። መና ጎዳይ አ ጾሳይ አናና ግዶ!’ ያጌ” ያጌዳ።10