Dawro Full Bible Ethiopic
2 ኦዱዋ 13
ይሁዳ ካትያ አቢያ
(1 ካታ. 15:1-8)
ካቲ እዮርባም ካተቴዳ ታማነ ሆስፑን ላይን አቢይ ይሁዳን ካተቴዳ። አቢይ የሩሳላመን ሄዙ ላይ ካተቴዳ። አ ዳይ ሱንይ ምካዮ፤1 ምካያ ግብአፐ ዬዳ ኡርኤላ ናቶ።
አቢይነ እዮርባም ኦለቲደ ደኤድኖ። አቢይ ዶረቴዳ 400,000 ምኖ ኦላንቻቱዋ አኪደ፥ ኦላናዉ ከሴዳ፤ እዮርባምካ ዶረቴዳ 800,000 ምኖ ኦላንቻቱዋ አኪደ፥ አቢያና ኦለታናዉ ከሴዳ።
ሄዋፐ ጉይያን፥ አቢይ ኤፍሬማ ገዝያን ደእያ ጻማራይማ ጌተትያ ደርያ ሁጲያን ኤቂደ፥ ሀዋዳን ያጌዳ፤ “ህንተንቶ፥ እዮርባማነ እስራኤልያ አሳቶ፥ ኡባይካ ታን ግያዋ ስስተ! መና ጎዳይ እስራኤልያ ጾሳይ ዳዊተነ አ ዘረይ እስራኤልያ ቦላ መናዉ ካተታናዳን፥ ዳዊታና እ ላመተና ቃላ ጫቁዋ ጫቀቴዳዋ ህንተንቱ ኤርክቴየ? ሽን ዳዊታ ናኣ ሶሎሞነ ቆማይ፥ ናባጻ ናአይ እዮርባም ደንዲደ፥ ባረ ጎዳ ቦላ ማካሌዳ። ሮብኣመ ያላጋነ ዳቡራንቻ ግዲደ፥ ኡንቱንቱና ኤቀታናዉ ዳንዳየና ዎደ፥ ፓና ሹፉሮ አሳቱ እዮርባመኮ ሺቂደ፥ ሶሎሞነ ናኣ ሮብኣማ ቦላ ምኔድኖ።
“ሀእካ መና ጎዳይ ዳዊታ ዘረቶ እሜዳ ካዉተና ህንተንቱ ጋዳታናዉ ቆፒታ። ህንተንቱ ሄዋ ቆፔዳዌ ህንተንቱ ሎይ ጮራ አሳ ግድያ ድራሳነ ህንተንቶ ጾሳቱዋ ግዳና ማላ፥ እዮርባም ዎርቃፐ መሴዳ ማራቱ ህንተናና ደእያ ድራሳ። አሮና ዛርያ ግዲደ፥ መና ጎዳዉ ኦያ ቄሳቱ ዋነ ሌዋቱዋ ህንተንቱ የደርሴድታ። ያትና ሀራ ጋድያ አሳይ ኦያዋዳን ህንተንቶ ሀራ ቄሳቱ ዋ ሱንድታ። ባረና ዱማያናዉ እት ኮሩማ ላፑን ዶርሳ ኦርገቱዋ አኪደ ይያ ኦንነ ዎርዱዋ ጾሳቶ ቄሰ ግዳና።
“ሽን ኑና ግዶፐ፥ መና ጎዳይ ኑ ጾሳ፤ ኑን አ አግበይኮ። አሮና ዛርያ ግዲደ መና ጎዳዉ ኦያ ቄሳቱ ኑዉ ደኢኖ፤ ቃይ ሌዋቱ ኡንቱንታ ማድኖ። ኡንቱንቱ ኡባ ጋላስ ዎንታነ ኦማርስ መና ጎዳዉ ጹግያ ያርሹዋ ያርሺኖነ ሳዊያ እጻና ጩዋዪኖ። መና ጎዳ ስንን ዎያ ኡክ ጌሻ ጻርጴዛን ዎኖ። ኦማርስ ኦማርስ ፖእሳናዳን ዎርቃፐ ኦዳ ጾምፐቱዋ ዎያ ባላን ዎደ ጊግሲኖ። አያዉ ጎፐ፥ ኑን ጾሳ ኑ ጾሳ አዛዙዋ ናጌቶ፤ ሽን ህንተንቱ አ አጌድታ። በእተ፥ ጾሳይ ኑናና ደኤ፤ እ ኑና ካለያዋ። ኦላ ጹሩምባ ፑንያ አ ቄሳቱ ካ ኑናና ደኢኖ፤ ኑን ህንተናና ኦላ ዶማናዉ ጹሩምባካ ኡንቱንቱ ፑናና። እስራኤልያ አሳዉ፥ መና ጎዳና ህንተንቱ አዎቱዋ ጾሳና ኦለቶፕተ! አያዉ ጎፐ፥ ህንተንቱ አ ጾናናዉ ዳንዳይክታ” ያጌዳ።
እ ሃሳይሽን፥ እዮርባም ባረ ኦላንቻቱዋፐ እት ጩጉዋ ህንቱቱፐ ጉየና ዙጊደ ናጋና ማላ የዴዳ። እስራኤልያ ኦላንቻቱ ይሁዳ ኦላንቻቱ ስንን ደእያ ዎደ፥ ዙጊደ ናግያ ኦላንቻቱ ህንቱቱፐ ጉየና ደኢኖ። ይሁዳ ኦላንቻቱ ጉየ ስም ጼልያ ዎደ፥ ኡንቱንታ ኦላናዉ ዬዳዋንቱ ጉየናነ ስንና ደእያዋ በኤድኖ። መና ጎዳዉ ዋሴድኖ፤ ቄሳቱ ካ ጹሩምባ ፑኔድኖ። ሄዋፐ ጉይያን፥ ይሁዳ ኦላንቻቱ ኦላ ዋሱዋ ዋሴድኖ። ኡንቱንቱ ኦላ ዋሱዋ ዋሴዳ ዎደ፥ ጾሳይ እዮርባማነ እስራኤልያ አሳ ኡባ አቢያ ስንንነ ይሁዳ ስንን ጾኔዳ። እስራኤልያ ኦላንቻቱ ይሁዳ ኦላንቻቱ ስንፐ ባቃትና፥ ጾሳይ ኡንቱንቱ ይሁዳ ኦላንቻቱ ኩሽያን አደ እሜዳ። አቢይነ አ ኦላንቻቱ ኡንቱንታ ሱፑ ኦደ ዉርሴድኖ፤ ያትና፥ እቼሹ ጼቱ ሻአ ዶረቴዳ እስራኤልያ ኦላንቻቱ ሀይቄድኖ። እስራኤልያ አሳይ ሄ ዎደ ጾነቴዳ፤ ይሁዳ አሳይ መና ጎዳን፥ ባረንቱ አዎቱዋ ጾሳን አማነቴዳ ድራዉ፥ ኡንቱንታ ጾኔድኖ።
አቢይ እዮርባማ የደርሲደ፥ አፐ ቤቴለ ካታማ፥ ይሻና ካታማነ ኤፍሮና ካታማ ኡንቱንቱ ሞቱዋና ኦይቄዳ። አቢይ ደኤዳ ላይን ኡባን እዮርባም ስሚደ ምንቤና። መና ጎዳይ እዮርባማ ደችና ሀይቄዳ።
ሽን አቢይ ምን ምን ቤዳ። አቢይ ታማነ ኦይዱ ማጫ አሳ አኪደ፥ ላታማነ ላኡ አቱማ ናናነ ታማነ ኡሱፑን ማጫ ናና የሌዳ። አቢይ ኦዳ ሀራባይ፥ እ ሀኔዳባይነ እ ጌዳዌ ኡባይ ትምቢትያ ኦድያ እዶ ታርክያ ማጻፋን ጻፈት ኡቴዳ።
Source notes (1)
- Footnote ምካዮ፦ ምካዮ ዎይ ማእኮ ጌተታዉ። 2 ኦድ። 11:20 ጼላ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.