Skip to content
BibleKenya

Dawro Full Bible Ethiopic

1 ሳሜላ 9

ሳኦላነ ሳመላ

ቢንያማ ዛርያፐ ቂሳ ግያ እት ብታኒ ደኤ፤ እ አቢኤላ ናኣ፤ አቢኤል ጻሮራ ናኣ፤ ጻሮር ባኮራታ ናኣ፤ ባኮራት ቢንያማ ዛርያ አፊሀ ናኣ፤ ሄ ብታኒ ዎልቃማ አሳ። አዉ ሳኦላ ጌተትያ እት ዎዳላ ሎኦ ናአይ ደኤ፤ እስራኤላቱዋ ግዶን አፐ አ ሎእያ አሳይ ባዋ፤ እ ሀሽያፐ ቆሞ ባጋን አሳ ኡባፐ አዱቄ።

እት ጋላስ ሳኦላ አዉዋ ቂሰ ሀረቱ ባይና ቂስ ባረ ናኣ ሳኦላ፥ “ቆማቱዋፐ እቱዋ አካደ፥ ሀረቱዋ ኮያናዉ ባ” ያጌዳ። ኡንቱንቱ ኤፍሬማ ገዝያናነ ሻሊሻ ቢታና ኮዪደ አድኖ፤ ሽን ሀረቱዋ ደምበይክኖ። ቃይ ሻእሊማ ቢታና አድኖ፤ ሽን ሄዋንካ ሀረቱ ባዋ። ቢንያማ ቢታናካ አድኖ፤ ሽን ያንካ ደምበይክኖ።

ኡንቱንቱ ጹፋ ቢታ ጋኬዳ ዎደ፥ ሳኦል ባረናና ደእያ ቆማ፥ “ሃያ፤ አነ ጉየ ስሞይተ፤ ሄዌ ዮፐ፥ ታ አዉ ሀረቱዋባ ቆፕያዋ አጊደ፥ ኑዉ ህርጋናዋ” ያጌዳ።

ሽን ቆማይ፥ “በአ! ጾሳ አሳ እቱ ሀ ካታማን ደኤ። እ ቦንቼቴዳ አሳ፤ እ ኦድያ ኡባባይ ቱማቴ። አነ ሀእ ኑን ያ ቦይተ፤ ኦን ኤሪ ኑን ባና ኦግያ እ ኑዉ ኦዳነንቶነ” ያጌዳ።

ሳኦል ባረ ቆማ፥ “ኑን ብያዋ ግዶፐ፥ አዉ አይ እማኔ? ኮሮጁዋፐ ቁማይ ዉሬዳ፤ ኑን ጾሳ አሳዉ እምያባይ ባዋ። ኑዉ አያይ ደኢ?” ያጌዳ።

ሄዋፐ ጉየ ቆማይ ሳኦላዉ፥ “በአ፤ ታ ኩሽያን እት ጻጋራ ብራዉ ምሳይ ደኤ፤ ኑን ባና ኦግያ ጾሳ አሳይ ኑዉ ኦዳናዳን ሀ ብራ አዉ እማና” ያጊደ ዛሬዳ።

(በን ዎደ እስራኤልያ ቢታን እት አሳይ ጾሳ ኦቻናዉ ቢደ፥ “ሃይተ፤ አነ ጼልያዋኮ ቦይተ” ያጌ። አያዉ ጎፐ፥ ሀ ዎድያን ትምቢትያ ኦድያዌ በን ዎድያን ጼልያዋ ጌተቴ።) ሳኦል ባረ ቆማ፥ “ሎአ፤ ደንዳ” ያግና፥ ጾሳ አሳይ ደእያ ካታማ ቤድኖ። ካታማ ፑደ ኡንቱንቱ ከስሽን፥ ሃ ትካናዉ ይያ ዎዶራቱዋና ኦግያን ጋከቲደ ሄ ጌላዮቱዋ፥ “ጼልያዌ ሀዋን ደኢ?” ያጊደ ኦቼድኖ።

ኡንቱንቱ፥ “ኤ ደኤ፤ ሄዋ በእተ፤ እ ህንተፐ ስንና ደኤ፤ ኤለካ አኮ ቢተ። አሳይ ሀቼ ጎይንያ ቃ ሳኣን ያርሽያ ድራዉ፥ እ ኑ ካታማ ዬዳ። ካታማ ኡንቱንቱ ገሌዳ ሳና፥ እ ማናዉ ጎይንያ ቃ ሳኣ ከሰናን ደእሽን ደማና። እ ጋከናን ደእሽን፥ አሳይ ሙሳ ዶመና፤ አያዉ ጎፐ፥ ያርሹዋ እ አንጃናዉ ኮሼ። እ አንጄዳዋፐ ጉይያን፥ ሾበቴዳዋንቱ ማና። ፑደ ቢተ፤ ህንተንቱ አ ሀእ ደማና” ያጌድኖ። ሄዋፐ ጉየ ኡንቱንቱ ካታማ ቤድኖ፤ ኡንቱንቱ ካታማ ገልያ ዎደ፥ ሳመል ጎይንያ ቃ ሳኣ ፑደ ቢደ፥ ኡንቱንቱና ጋከታናዉ ይያዋ በኤድኖ።

ሳኦል ያናፐ ካሰ ጋላስ፥ ሳመላዉ መና ጎዳይ ሀዋዳን ያጊደ ቆንጭስ ዎዳ፤ “ዎንታ ሀኖደ ቢንያማ ጋድያፐ እት ብታንያ ታን ኔኮ የዳና፤ እ ታ አሳ እስራኤልያ ካለና ማላ አ ኦካ፤ ታ አሳ ፕልስጼማ አሳቱዋ ኩሽያፐ እ አሻናዋ፤ አያዉ ጎፐ፥ ታ አሳ ዋሱ ታኮ ጋክና፥ ታን ኡንቱንታ ጼላድ” ያጌዳ።

ሳመል ሳኦላ በኤዳ ዎደ፥ መና ጎዳይ ሳመላ፥ “በአ! ታን ነዉ ኦዴዳ ብታኒ ሀዋ፤ እ ታ አሳ ሞዳናዋ” ያጌዳ።

ሳኦል ፐንግያ ማታን ደእያ ሳመላኮ ሺቂደ፥ “ጼልያዋ ጎሊ ሀቃነንቶ ሀይ ታዉ ኦዳርኪ?” ያጌዳ።

ሳመል ሳኦላዉ፥ “ጼልያዌ ታና። ሀቼ ህንተንቱ ታናና ምያ ድራዉ፥ ታፐ ስንቲደ፥ ፑደ ጎይንያ ቃ ሳኣ ቢተ። ታን ኔና ዎንት ጉራና የዳና፤ ነ ዎዛናን ደእያ ኡባባ ታን ኦዳና። ሄዙ ጋላሳፐ ካሰ ባዬዳ ነ ሀረቱዋ ግዶፐ፥ ኡንቱንቱ ቤቴዳ ድራዉ፥ ህርጎፓ። እስራኤልያ አሳይ ኡባይ አሞትያዌ ኦኔ? ኔናነ ነ አዉዋ ሶይ አሳ ግደኔ?” ያጌዳ።

ሳኦል ዛሪደ፥ “ሽን ታን እስራኤልያ ዛርያ ኡባፐ ላፍያ ቢንያማ ዛርያ ግድክታ? ታ ሶይ አሳይካ ቢንያማ ዛርያ ግዶን ጉጽያዋ ግደኔ? ኔን አያዉ ታዉ ሀዋ ማላ ሃሳያይ?” ያጌዳ።

ሄዋፐ ጉይያን፥ ሳመል ሳኦላነ አ ቆማ አፊደ፥ አኮ ዉይግያ ገልሲደ ሄ ሳኣን ሾበቴዳ ሀታሙ ግድያ አሳፐ ቆሞ ባጋና አራታን ኡትሴዳ። ሳመል ቁማ ካያዋ፥ “ነ ማታን ዎሻ ጋደ ታን ነዉ እሜዳ አሹዋ ሀማ” ያጌዳ።

ሄዋፐ ጉየ ካያዌ ሎኡዋነ አ ቦላን ደእያዋ አክ አሂደ፥ ሳኦላ ስንን ዎዳ። ሳመል ሳኦላ፥ “ነዉ አሼዳዌ ሀዋ፤ አካደ ማ። አያዉ ጎፐ፥ ታን እማቱዋ ሾቦደፐ ዶማደ፥ ሀዋ ነዉ አሻድ” ያጌዳ። ሄ ጋላስ ሳኦል ሳመላና ሜዳ። ኡንቱንቱ ጎይንያ ቃ ሳፐ ዱገ ካታማ ዎና፥ ሳመል ሳኦላዉ ጎልያ ቦላን ደምባዪደ ኦዳ ሳኣን ግሱዋ ሂጽና ግሴዳ።

ሳመል ሳኦላ ኦኪደ ካተዬዳ

ኡንቱንቱ ጉራና ደንዴድኖ፤ ሳአይ ዎንትና፥ ሳመል ሳኦላ ሄ ጎልያ ቦላፐ ጼሲደ፥ “ጊጋ፤ ታን ኔና ሞይዛና” ያጌዳ። ሳኦል ጊግና፥ እነ ሳመልነ ላኡ እትፐ ኦግያ ከሴድኖ። ኡንቱንቱ ካታማ ጋጻ ዎሽን፥ ሳመል ሳኦላ፥ “ቆማይ ኑፐ ስንዉ አና ማላ ኦዳ” ያጌዳ፤ ቆማይ ስንዉ አዳ። ሳመል ሳኦላ፥ “ታን ነዉ ጾሳይ ጌዳዋ ኦዳና ማላ፥ ሀዋን ላፋ ታካሻ” ያጌዳ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.