1 ሳሜላ 31

ሳኦላነ አ ናናቱዋ ሀይቁዋ

(31:1-13)

ሳኦል ባረና ዎዳ

(1 ኦዱዋ 10:1-12)

1ፕልስጼማ አሳቱ እስራኤልያ አሳቱዋና ኦለቴድኖ፤ እስራኤልያ አሳቱ ፕልስጼማ አሳቱዋ ስንፐ ባቃቴድኖ፤ ዳሮ እስራኤላቱ ግልቦአ ደርያን ሀይቄድኖ። 2ፕልስጼማ አሳቱ ሳኦላነ አ አቱማዋ ናና የደርስ ጋኪደ፥ ሳኦላ ናና ዮናታና፥ አብናዳባነ ማልክሹአ ዎድኖ። 3ኦላይ ሳኦላ ዩይ አደ ኡንኤዳ፤ ዎንዳፍያ አሳቱ አ ደሜዳ ዎደ፥ ዙቢያን አ ጫዲደ፥ ሎይ ማይትሴድኖ።

4ሳኦል ባረ ኦላ ሚሻ ቶክያዋ፥ “ሀ ቃጻረትቤናዋንቱ ዪደ፥ ታና ጫዲደ ካኤናዳን፥ ነ ማሻን ጫዳደ፥ ታና ኔን ዎ” ያጌዳ።

ሽን አ ኦላ ሚሻ ቶክያዌ ሎይ ያዬዳ ድራዉ እጼዳ፤ ሳኦል ባረ ማሻ ሳኣን ኤሲደ፥ አ ቦላ ኩንዴዳ። 5አ ኦላ ሚሻ ቶክያዌ ሳኦል ሀይቄዳዋ በኢደ፥ እካ ባረ ማሻ ሳኣን ኤሲደ፥ አ ቦላ ኩንዲደ፥ ሳኦላና ሀይቂ አጌዳ። 6ሀዋዳን ሀኒደ፥ ሳኦልነ አ ናናይ ሄዛቱ፥ አ ኦላ ሚሻ ቶክያዌነ አ አሳቱ ኡባይ ሄ ጋላሳ እትፐ ሀዬድኖ።

7ዎምባፐነ ዮርዳኖሳ ሻፋፐ ሄፍን ባጋና ደእያ እስራኤልያ አሳቱ እስራኤልያ ኦላንቻቱ ባቃቴዳዋነ ሳኦልነ አ ናናይ ሀይቄዳዋ በኢደ፥ ኡንቱንቱካ ባረንቱ ካታማ አጊደ ባቃቴድኖ። ፕልስጼማ አሳቱ ዪደ፥ ሄ ካታማቱዋ ኦይቄድኖ።

8ዎንተ ጋላስ ፕልስጼማቱ አሃቱዋ ቦላፐ ኦላ ሚሻቱዋ ቃር አካናዉ ዪደ፥ ሳኦልነ አ ናናይ ሄዛቱ ግልቦአ ደርያን ሀይቂደ ግሴዳዋንታ ደሜድኖ። 9ኡንቱንቱ ሳኦላ ቆያ ሙጬድኖነ አ ኦላ ሚሻ ቃር አኬድኖ። ያቲደ ባረንቱ ማሻቱዋ ጎለንነ ባረንቱ አሳ ግዶን ጾኑዋ አዋያና ማላ፥ ፕልስጼማ ቢታ ኡባዉ ኪታ የዴድኖ። 10ሳኦላ ኦላ ሚሻ አስታሮታ ጌተትያ ኡንቱንቱ ጾሳት ጎልያ ግዶን ዎድኖ፤ ሳኦላ አሃ ቤትሻና ጌተትያ ካታማ ግምቢያን ምስማርያን ሺደ ሶቴድኖ።

11ፕልስጼማ አሳቱ ሳኦላ ኦዳዋ ጋላኣደን ደእያ ያቤሻ አሳቱ ስሴዳ ዎደ፥ 12ኡንቱንቱ ምኖ አሳቱ ኡባይ ቃማን ደንድ ቢደ፥ ሳኦላ አሃነ አ ናናቱዋ አሃ ቤትሻና ካታማ ግምቢያፐ ዎ አኪደ፥ ያቤሻ ካታማ አሂደ ያን ጹጌድኖ። 13ሄዋፐ ጉይያን፥ ኡንቱንቱ መቀ ማጽ አኪደ፥ ያቤሻን ደእያ ታማርስካ ጌተትያ ም ጋርሳን ሞጌድኖ፤ ያቲደ ላፑን ጋላሳ ጾሜድኖ።