Skip to content
BibleKenya

Dawro Full Bible Ethiopic

1 ሳሜላ 24

ዳዊተ ሳኦላ ሸምፑዋ አሼዳ

ሳኦል ፕልስጼማ አሳቱዋ የደርስያ ሳፐ ስምና፥ “ዳዊተ ኤንጋዳ ካታማ ማታን ደእያ ዎራን ደኤ” ጊደ አዉ ኦዴድኖ። እስራኤልያ ኡባ ግዶፐ ዶረቴዳ ሄዙ ሻአ አሳ ሳኦል አኪደ፥ ዳዊታነ አ አሳ ኮያናዉ፥ “ዎራ ዴሻቱ ጌስያ ዛላ” ግያ ሳኣ ማታ ቤዳ።

ሳኦል ኦግያ ዶናን ዶርሳ አቁዋ ማታን ደእያ ጎንጎሉዋኮ ዬዳ፤ ሼሻዉ ኡታናዉ ጎንጎሉዋ ግዶ ገሌዳ። ዳዊተነ አ አሳይ ጎንጎሎ ግዱዋኮ ሺቂደ ኡቴድኖ።1 ዳዊታ አሳይ አ፥ “ሄኮ ታን ነ ሞርክያ ነ ኩሽያን አ እማና፤ ኔን አ ነ ኮዬዳዋዳን ኦና ያጊደ መና ጎዳይ ነዉ ኦዴዳ ጋላሳይ ሀቻ” ያጌድኖ። ዳዊተ ሳኦላ ኤርሰናን ሺቂደ፥ ሳኦላ ማዩዋ ጼራፐ ቃንጽ አኬዳ።

ቃንጼዳዋፐ ጉይያን፥ ዳዊተ ባረ ዎዛናን ካዮቴዳ። ዳዊተ ባረ አሳቱዋ፥ “መና ጎዳይ ኦኪደ ካተዬዳ ታ ጎዳዉ ታን ሄዋ ኦናዋ ዎይ አ ቦላ ታ ኩሽያ ደንናዋ ጾሳይ ታፐ ሃሶ፤ አያዉ ጎፐ፥ ጾሳይ ኦኪደ ካተዬዳዌ አ” ያጌዳ።2 ዳዊተ ሀዋዳን ሴሪደ፥ ሳኦላ ባረ አሳን ቦሽሰናን ድጌዳ። ሳኦል ጎንጎሉዋ ግዶፐ ከሲደ፥ ባረ ኦግያን ገሌዳ።

ሳኦል ቤዳዋፐ ጉይያን፥ ዳዊተ ጎንጎሉዋ ግዶፐ ከሲደ፥ ሳኦላ፥ “ታ ጎዳዉ፥ ካትያዉ!” ያጊደ ጼሴዳ፤ ሳኦል ጉየ ዛሪደ ጼሌዳ፤ ዳዊተ ቢታን ዱገ ጉፋኒደ፥ ሳኦላዉ ጎይኔዳ። ያቲደ ዳዊተ ሳኦላ፥ “ዳዊተ ኔና ቆሀናዉ ኮዬ ግያ አሳቱዋ ቃላ ኔን አያዉ ስሳይ? ሀ ጎንጎሉዋ ግዶን መና ጎዳይ ኔና ሀቼ ታዉ አ እሜዳዋ ኔን ነ አይፍያን በኣዳ፤ ታን ኔና ዎናዳን አማሬዳዋንቱ ታና ደንድኖ፤ ሽን ታን፥ መና ጎዳይ ኦኪደ ካተዬዳዋ እ ግድያ ድራዉ፥ ታን ታ ጎዳ ቦላ ታ ኩሽያ ደንከ ያጋደ ኔና አሻድ። ታ አዎ፥ በአ፤ ታ ኩሽያን ደእያ ነ ማዩዋ ጼራ ሀዋ ጼላ! ነ ማዩዋ ጼራፐ ቃንጻ አካድ፤ ሽን ኔና ዎበይከ፤ ታን ኔና ቆሀቤናዋነ ማካላቤናዋ አኬካደ ኤራ፤ ታን ኔና ቆሀበይከ፤ ሽን ኔን ታና ዎናዉ ሻንካታሳ። ነዋነ ታዋ መና ጎዳይ ፕርዶ፤ መና ጎዳይ ኔን ታና ቆሄዳዋ ሀሉዋ ከሶ፤ ሽን ታን ነ ቦላ ታ ኩሽያ ደንከ። በን ዎደ፥ ኢታ ኦያዋንቱፐ ኢታባይ ከሴ ያግያ ሌምሱ ደኤ፤ ሄዋ ድራዉ፥ ታን ኔና ኩሽያንነ ቦችከ። እስራኤልያ ካቲ ኦ ቦላ ከሴዴ? ኔን ኦና ኦይቃናዉ ኮያይ? ሀይቄዳ ካና ዎይ ካቶልያ ኮያይ?3 መና ጎዳይ ኑ ግዶን ዳናቶ፤ ነዋነ ታዋ እ ፕርዶ፤ ታ የዉዋ ጼሊደ፥ ታ ድራዉ እ ሞተቶ፤ ነ ኩሽያፐ ታና እ አሾ” ያጌዳ።

ዳዊተ ሳኦላዉ ሃሳይያዋ ዉርሴዳ ዎደ፥ ሳኦል ዳዊታ፥ “ታ ናአዉ ዳዊታ፥ ሄዌ ነ ቃሌ?” ያጌዳ፤ ሳኦል ባረ ቃላ ቂሲደ ዬኬዳ። ቃይካ ዳዊታ፥ “ኔን ታፐ አዳ ጽሉዋ፤ አያዉ ጎፐ፥ ታን ነዉ ኢታባ ኦና፥ ኔና ታዉ ሎኦባ ኦዳ። መና ጎዳይ ታና ሀቼ ነዉ አ እምናካ ኔን ታና ዎቤና ድራዉ፥ ታዉ ኔን ኦዳ ሎኦባ ታና በሳዳ። አሳይ ባረ ሞርክያ ደሚደ ቆሄናን የዲየ? ኔን ታዉ ሀቼ ኦዳ ኬካተ ድራዉ፥ መና ጎዳይ ኔና አንጆ። ሀእካ ኔን እስራኤልያዉ ካትያ ግዳናዋነ እስራኤልያ ካዉተይ ነ ማታ ጋርሳን ኤቃናዋ ታን ኤራይ። ሀእ ስም ታፐ ጉይያን፥ ታ ዘረ ኔን ዱናዳንነ ታ ሱንካ ታ አዉዋ ጎልያፐ ቁጨናዳን መና ጎዳ ሱንን ታዉ ጫቃ” ያጌዳ።

ዳዊተ ሳኦላዉ ጫቄዳ። ሄዋፐ ጉይያን፥ ሳኦል ባረ ሶ ስሚደ ቤዳ፤ ዳዊተነ አ አሳይ ፑደ ጌሱዋ ቤድኖ።

Source notes (3)
  1. Cross-reference ማዝ. 57 (ሁጲያ)፤ ማዝ. 142 (ሁጲያ)
  2. Cross-reference 1 ሳሜላ 26:11
  3. Cross-reference 1 ሳሜላ 26:20

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.