1 ዮሃንሳ ኪታ 1

ደኡዋ ቃላ

1ኑን ኮይሩዋፐ ዶሚደ ደእያ፥ ኑ አይፍያን በኢደ፥ ኑ ኩሽያን አ ቦች በኤዳ ደኡዋ ቃላባ ህንተንቶ ጻፌቶ። ኑን አ በኤዶ፤ ኑ ኩሺካ አ ቦች በኤዳ።1 2ሄ ደኡ ቆንጭና፥ ኑን አ በኢደ፥ አባ ህንተንቶ ማርካቴቶ፤ ቃይ ጾሳ አዉዋ ማታን ደእያ ኑዉ ቆንጬዳ መና ደኡዋባ ህንተንቶ ኦዴቶ።2 3ቃይ ኑናና ህንተንቶ እትፐተይ ደአና ማላ፥ ኑን በኤዳዋነ ስሴዳዋ ህንተንቶ ኦዴቶ፤ ኑዉ አዉዋናነ አ ናኣ የሱስ ክርስቶሳና እትፐተይ ደኤ። 4ኑን ኑ ናሸቻይ ፖለታና ማላ፥ ሀዋ ህንተንቶ ጻፌቶ።

ጾሳይ ፖኡዋ

5ኑን ጾሳ ናኣፐ ስሲደ፥ ህንተንቶ ኦድያ ኪታይ፥ “ጾሳይ ፖኡዋ፤ አን ማይ ሙለካ ባዋ” ያግያዋ። 6ኑን ኑዉ አናና እትፐተይ ደኤ ጊደ ማን ደኦፐ፥ ኑ ሃሳያንነ ኑ ኦሱዋን ዎርዶቴቶ። 7ሽን ፖኡዋን እ ደእያዋዳን፥ ኑንካ ፖኡዋን ደኦፐ፥ ኑዉ እቶ እቱዋና እትፐተይ ደኤ፤ ቃይ አ ናኣ፥ የሱስ ክርስቶሳ ሱይ ናጋራ ኡባፐ ኑና ጌሼ።

8ኑን ናጋራ ኦበይኮ ጎፐ፥ ኑረካ ኑና ጭሜቶ፤ ኑናን ቱማተይካ ባዋ። 9ሽን ኑን ጾሳዉ ኑ ናጋራ ፓጾፐ፥ እ ኑ ናጋራ አቶ ጋናዉነ ኑ ባይዞ ኦሱዋ ኡባፐ ኑና ጌሻናዉ፥ አማነትያዋነ ቱሙዋ ኦያዋ። 10ኑን ናጋራ ኦበይኮ ጎፐ፥ ጾሳ ዎርዱዋ ጌቶ፤ አ ቃላይካ ኑ ዎዛናን ደኤና።