1 ቆሮንቶሳ 13

ቱሙ ሲቁዋ

1ታን አሳ ቃላንነ ኪታንቻ ቃላን ሃሳዮፐካ ታዉ ሲቁ ዮፐ፥ ታ ሃሳያይ ጮ ዋስያ ዳዋላ ማላ፤ ዎይ ቆልጫካትያ ጽናጽልያ ማላ። 2ናበተ እሞታይ ታዉ ደኦፐካ፥ ታን ጌሜዳ የዉዋ ኡባነ ኤራተ ኡባ ኤርንቶካ፥ ቃይ ደርያ ደን ድግያ አማኑ ታዉ ደኦፐካ፥ ሲቁ ዮፐ፥ ታን አያነ ግድከ።1 3ታዉ ደእያዋ ኡባ ህዬሳቱዋ ምዛናዉ እምንቶካ ሀራይ አቶ፥ ታ ቦላ ታማን ጉዳናዉ አ እምንቶካ ሲቁ ዮፐ፥ ታና አይነ ማደና።

4ሲቁ ዳንዳያንቻ። ሲቁ ኬኬ። ሲቁ ቃናተና። ጬቀተና፤ ቃይ ኦቶረተና። 5ሲቁ ባረዉ በሰናዋ ኦና፤ ኡዜተና፤ ይሎተና፤ ሲቁ ናቀቴዳዋካ ፓይደና። 6ሲቁ ቱማተን ናሸትያዋፐ አትን፥ ዎርዱዋን ናሸተና። 7ሲቁ ኡባባ ዳንዳዬ። ኡባባይካ ሀናናዋ ጊደ፥ ናሸቻን ናጌ። ኡባባን ገንጬ።

8ሲቁ ሙለካ የና። ሽን ናበተይካ አታና። ዱማ ዱማ ቃላን ሃሳይያዌካ አታና። ኤራተይካ ያና። 9አያዉ ጎፐ፥ ኑን ኤራተፐ ፓጫ ኤሬቶ፤ ትምቢትያፐካ ፓጫ ኦዴቶ። 10ሽን ኩመን ግዴዳዌ ይያ ዎደ፥ ፓጫይ ያና።

11ታን ናአተን ደእያ ዎደ፥ ናኣዳን ሃሳያይ። ናኣዳን ቆፓይ። ቃይ ናኣዳንካ አኬካይ። ዎዳላ ግዴዳ ዎደ፥ ናአተ ሀኑዋ አጋድ። 12ኑን ሀእ በእያዌ ማስቶትያን በእያ ለምእ ለምእያ ማላ ማላ፤ ሽን ሄ ዎደ ኑን ኑ አይፍያን ቆንጭያን በአና። ሀእ ታን ኤራተፐ ፓጫ ኤራይ፤ ሽን ጾሳይ ታና ዉርሲደ ኤርያዋዳን፥ ሄ ዎደ ታንካ ዉርሳ ኤራና።

13ሽን ሄዋ ግዶፐ፥ አማኑ፥ ሀናናዋ ጊደ ናሸቻን ናግያዌነ ሲቁ፥ ሀዋንቱ ሄዛቱ ምኒደ ደኢኖ። ሀዋንቱፐ አያዌ ሲቁዋ።