Skip to content
BibleKenya

Danu: Danu Bible

ဗျာဒိတ် 9

ပဉ္စမ ခေါန်းခင်တမန်ဟ တံပိုးခရာဟို မှုတ်လိုက်သောအခါ ခေါန်းခင်မှ မြေကြီးပေါ်ဟို ကျလာသော ကြယ်တလုံးဟို ငါမျော်အယ်။ အဲကြယ်အား တွင်းနက်ကြီး1ရဲ့ ထင်ခါးသော့ဟို ပေးအပ်ထားအယ်။ သူဟ တွင်းနက်ကြီးဟို ဖွင့်လိုက်သောအခါ မီးဖိုကြီးမှ မီးခိုးလိုမျိုး အခိုးဟ တွင်းထဲမှ ထွက်လာလေအယ်။ အဲမီးခိုးကျောန့် နေနဲ့ အာကာသခေါန်းခင်ဟ မိုက်ယွေ့ သွားအယ်။ အဲမီးခိုးထဲမှ ပလံမစိမ်းများ မြေကြီးပေါ်ဟို ထွက်လာပင်း သူလို့မှာ ကင်းမြီးကောက်လို့နှိုက်ဆိလဲ့ အစွမ်းလိုမျိုး အစွမ်း ဆိကြအယ်။ သူလို့ဟ မြက်ပင်များ၊ သစ်ပင်များနဲ့ အခြားစိမ်းလန်းလဲ့ အပင်ကြီးငယ်လို့ဟို ဘေးဥပါဒ်ပြုပိုင်ခွင့် မဆိ။ နဖူးတွင် ဘုရားသခင်ရဲ့ တံဆိပ်တော်မပါလဲ့ လူလို့ဟိုသာ ဘေးဥပါဒ်ပြုပိုင်ခွင့် ဆိကြအယ်။ အဲသူလို့အား အသေသတ်ပိုင်ခွင့် မဆိ။ ငါးလမျှသာ ညှဉ်းဆဲပိုင်ခွင့် ဆိအယ်။ အဲပလံမစိမ်း အကိုက်ခံရလဲ့ ဝေဒနာဟ လူဟို ကင်းမြီးကောက် အကိုက်ခံရသောအခါ ခံရလဲ့ ဝေဒနာမျိုးနဲ့ တူအယ်။ အဲနေ့ရက်များနှိုက် လူလို့ဟ သေခြင်းဟို ဆှာကြလိမ့်မယ်။ အဲလိုလဲ တွေ့ကြမယ် မဟုတ်၊ ရမ်းဆာ့ သေချင်သော်လည်း သေခြင်းဟ သူလို့ဆေမှ ထွက်ပြေးလိမ့်မယ်။

အဲပလံမစိမ်းလို့ရဲ့ သဏ္ဌာန်ဟ စစ်ပွဲအတွက် ပြင်ဆင်ထားသော စစ်မြင်းနဲ့ တူအယ်။ သူလို့ရဲ့ ဦးခေါင်းပေါ်နှိုက် ဆွေသရဖူလိုမျိုး ဆိယွေ့ သူလို့ရဲ့ မျက်နှာဟ လူမျက်နှာနဲ့ တူအယ်။ သူလို့နှိုက် မိန်းမ ဆံပင်နဲ့တူသော ဆံပင်ဆိယွေ့ သူလို့ရဲ့ သွားဟ ခြင်္သေ့ သွားလို ဖြစ်အယ်။ သူလို့နှိုက် သံရင်အုပ်တန်ဆာနဲ့တူလဲ့ ရင်အုပ်တန်ဆာ ဆိယွေ့ သူလို့ရဲ့ တောင်ပံခတ်သံဟ စစ်ပွဲဟို ပြေးသွားလဲ့ ရမ်းဆာ့သော မြင်းရထားလို့ရဲ့ အသံနဲ့ တူအယ်။ သူလို့တွင် ကင်းမြီးကောက်လို ဆူးပါသော အမြီး ဆိယွေ့ အဲအမြီးနှိုက် လူလို့ဟို ငါးလတိုင်တိုင် ဘေးဥပါဒ် ရောက်စေနိန်သော အစွမ်း ဆိအယ်။ သူလို့ရဲ့ ဘုရင်ကား တွင်းနက်ကြီးရဲ့ ခေါန်းခင်တမန် ဖြစ်အယ်။ သူရဲ့ နာမယ်မှာ ဟေဗြဲဘာသာစကားဖြင့် “အဗဒ္ဒုန်” ဟူယွေ့ လည်းကောင်း၊ ဟေလသဘာသာအားဖြင့် “အပေါလျုန်” ဟူယွေ့ လည်းကောင်း ဖြစ်အယ်။ အပေါလျုန်ရဲ့ အနက်မှာ “ဖျက်ဆီးသူ” ဟူယွေ့ ဖြစ်အယ်။

ပထမ အမင်္ဂလာဟ လွန်သွားလေပီ။ အဲအရာများရဲ့ နောက်တွင် အမင်္ဂလာ နေမျိုး လာဦးမယ်။

ဆဋ္ဌမ ခေါန်းခင်တမန်ဟ တံပိုးခရာဟို မှုတ်လိုက်သောအခါ ဘုရားသခင်ရဲ့ ဆေ့နှိုက် ဆိသော ဆွေယဇ်ပလ္လင်ရဲ့ ဦးချိုလေးချောင်းဆေမှ ထွက်လာသော အသံဟို ငါကြားအယ်။ အဲတံပိုးခရာဆိသော ဆဋ္ဌမ ခေါန်းခင်တမန်အား “ဥဖရတ်မြစ်ကြီး အနီးမှာ တုတ်ချေထားသော ခေါန်းခင်တမန်လေးပါးဟို ဖြေလွှတ်လော့” ဟု ဆိုတာဟို ငါကြားအယ်။ အဲခေါန်းခင်တမန် လေးပါးလို့ဟ အနှောင်အဖွဲ့မှ လွတ်မြောက်ယွေ့ သွားကြအယ်။ သူလို့ဟ အေးနှစ်၊ အေးလ၊ အေးနေ့ရက်၊ အေးအချိန်နာရီနှိုက် လူသားသုံးပုံတပုံဟို သတ်ဖြတ်ရန်အတွက် အသင့်ဆိသူများ ဖြစ်ကြအယ်။ မြင်းစီးသူရဲလို့ရဲ့ အရေအတွက်မှာ ကုဋေပေါင်းနေဆယ် ဖြစ်အယ်။ သူလို့ရဲ့ အရေအတွက်ဟို ငါကြားရအယ်။ ဗျာဒိတ်ရူပါရုံနှိုက် ငါမျော်သော မြင်းလို့နဲ့ မြင်းစီးသူရဲလို့မှာ ဟေလို ဖြစ်အယ်။ မြင်းစီးသူရဲလို့နှိုက် မီးလျှံရောင်၊ နက်ပြာရောင်၊ ကန့်လို ဝါသော ရင်အုပ်တန်ဆာများ ဆိကြအယ်။ မြင်းလို့ရဲ့ ဦးခေါင်းဟ ခြင်္သေ့ရဲ့ ဦးခေါင်းနဲ့ တူယွေ့ သူလို့ရဲ့ ခံတွင်းထဲမှ မီးလျှံ၊ မီးခိုးနဲ့ ကန့်များ ထွက်နေကြအယ်။ သူလို့ရဲ့ ခံတွင်းမှ ထွက်လဲ့ မီးလျှံ၊ မီးခိုးနဲ့ ကန့် တည်းဟူသော ဟေဘေးဒဏ်သုံးပါးလို့ကျောန့် လူသားသုံးပုံတပုံ သေကြအယ်။ အကျောန်းမှာ မြင်းလို့ရဲ့ အစွမ်းဟ သူလို့ရဲ့ ခံတွင်းနဲ့ အမြီးလို့နှိုက် ဆိအယ်။ သူလို့ရဲ့ အမြီးဟ မြွေနဲ့တူပင်း ဦးခေါင်း ဆိယွေ့ အဲဦးခေါင်းအားဖြင့် လူလို့အား ဘေးသင့်စေအယ်။

အဲဘေးဒဏ်များဖြင့် မသေဘဲ ကျန်ခဲ့သော သူလို့ဟ နတ်ဆိုးများဟို လည်းကောင်း၊ ဆွေ၊ ငွေ၊ ကြေးနီ၊ ကျောက်၊ သစ်သားလို့ဖြင့် ပြုလုပ်ထားလဲ့ မမျော်နိန်၊ မကြားနိန်၊ လမ်းမဆှောက်နိန်လဲ့ ရုပ်တုများဟို လည်းကောင်း၊ မကိုးကွယ်ဘဲ နေရန် မိမိလို့လက်ဖြင့် ပြုလုပ်သောအရာများအတွက် နောင်တမရကြ။ မိမိလို့ ပြုခဲ့သော လူအသက်ဟို သတ်ခြင်း၊ သူတပါးဟို ပြုစားခြင်း၊ မတရားသော မေထုန်နှိုက် မှီဝဲခြင်း၊ သူ့ဥစ္စာဟို ခိုးခြင်းလို့အတွက်လည်း နောင်တမရဘဲ နေကြအယ်။

Source notes (1)
  1. Footnote တွင်းနက်ကြီး၊ နတ်ဆိုးများ နောက်ဆုံးပစ်ဒဏ်အထိ ထောင်ချခံရသော မြေကြီးရဲ့ နက်နဲရာအရပ်။

Danu: Danu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.