Skip to content
BibleKenya

Danu: Danu Bible

လုကာ 16

လိမ္မာပါးနပ်သော ငွေကြေးဥစ္စာထိန်းလဲ့သူ

ယေရှုဟ သူ့တဘဲ့တော်လို့အား၊ “တခါဟ သူဌေးတယောက်မှာ သူ့ဥစ္စာလို့ဟို ထိန်းသိမ်းလဲ့ အစေခံတယောက် ဆိအယ်။ အေးလူဟ သူဌေးရဲ့ ငွေကြေးဥစ္စာများဟို ဖြုန်းတီးနေကျောန်းဟို သူများလို့ဟ သူဌေးဆေ ဝိုင်းတိုင်ကြအယ်။ သူဌေးဟ သူ့ဟို ခေါ်ယွေ့ ‘နင့်အကျောန်း ငါကြားနေရပုံဟ ပစာလိုရီးနှင်း။ လုပ်ငန်းနဲ့ ပတ်သက်သော ငွေစာရင်းများဟို တင်ပြပါ။ နင်ဟ ငါ့ရဲ့ ငွေကြေးဥစ္စာထိန်းသိမ်းလဲ့သူ ဟုတ်တော့ဝူး’ ဟု ပြောအယ်။ အေးချိန်တွင် အစေခံဟ ‘ငါပစာလို လုပ်မို့၊ ငါ့သခင်ဟ ငွေကြေးဥစ္စာထိန်းသိမ်းလဲ့ ရာထူးဟို ဖြုတ်လိုက်ပီ။ ငါ့မှာ မြေတူးဆွနိန်သော ခွန်အား မဆိ၊ ကျောန့်နန်လုပ်ဖို့ ငါဆှက်အယ်။ ငွေကြေးဥစ္စာထိန်းသိမ်းလဲ့ ရာထူးမှ ပြုတ်ပင်းနောက် သူများလို့ဟ သူလို့နေအိုင်မှာ ငါ့ဟို လက်ခံအောန် ပစာလိုလုပ်ရမယ် ငါသိပီ’ ဟု စိတ်ထဲနှိုက် ကြံစည်ယွေ့၊ အဲပင်းရင် သူဌေးအား ငွေပေးဆပ်ရန်ဆိသော လူပေါင်းလို့ဟို ခေါ်အယ်။ အဲပင်းရင် ပထမလူအား ‘ငါ့သခင်ဟို ပေးဖို့ အကြွေးပစာလောက်ဆိလုန်း’ ဟု မေးအယ်။ အေးသူဟ ‘ဆီဂါလံ ၈၀၀ ပေးဖို့ ဆိပါအယ်’ ဟု ပြန်ပြောအယ်။ အဲအခါ ငွေကြေးဥစ္စာထိန်းသိမ်းလဲ့သူဟ ‘နင့်စာရင်းဟို ယူယွေ့၊ ထိန်ပင်း ဂါလံ ၄၀၀ လို့ ရေးမှတ်လိုက်’ ဟု ဆိုအယ်။ အဲပင်းရင် တခြားသူတယောက်ဟို ‘နင်ရော ပေးစရာအကြွေး ပစာလောက်ဆိလဲ’ ဟု မေးအယ်။ အေးသူဟ ‘ဂျုံစပါး တင်း ၁,၀၀၀ ဆိပါအယ်’ ဟု ဖြေအယ်။ ငွေကြေးဥစ္စာထိန်းသိမ်းလဲ့သူဟ ‘နင့်စာရင်းဟို ယူပင်း အတင်း ၈၀၀ လို့ ရေးမှတ်လိုက်’ ဟု ဆိုအယ်။ အေးလို့ လိမ္မာပါးနပ်စွာ လုပ်တတ်သော မရိုးဖြောင့်သော ငွေကြေးဥစ္စာထိန်းသိမ်းလဲ့သူဟို သူဌေးဟ ချီးမွန်းယွေ့၊ ပစာကို့ လောကီသားလို့ဟ မိမိလို့ရဲ့အမှုဟို ဆောင်ရွက်ရာတွင် အလင်းဟို ရောက်သော သူလို့ထက် သာယွေ့ လိမ္မာကြအယ်။

“နောက်တခု နင်လို့ဟို ငါပြောတာဟ လောကီစည်းစိမ်ချမ်းသာအားဖြင့် မိတ်ဆွေများ ရအောန်ပြုကြလော့၊ အေးလို့မှသာ နင်လို့ သေလွန်သောအခါ ထာဝရတည်သော အိုင်တော်တွင် နင်လို့ဟို လက်ခံပေးလိမ့်မယ်။ အမှုငယ်တွင် သစ္စာဆိသူဟ အမှုကြီးတွင်လည်း သစ္စာဆိလိမ့်မယ်။ အမှုငယ်တွင် မရိုးသားသူဟ အမှုကြီးတွင်လည်း ရိုးသားလိမ့်မယ် မဟုတ်။

အဲလိုမို့ နင်လို့မှာ ဟေလောကစည်းစိမ်နဲ့ ပတ်သက်ပင်း သစ္စာမဆိရင်၊ နင်လို့အား စစ်မန်လဲ့ချမ်းသာမှုဟို စလို ပေးအပ်နိန်မာလဲ။ နင်လို့ဟ သများပိုင်ဆိုင်လဲ့ ပစ္စည်းအပေါ်မှာ သစ္စာမဆိရင် စသူဟ နင်လို့ ပိုင်ဆိုင်ရန် ဥစ္စာဟို ပေးအပ်မလုန်း။ 1

“စလို အစေခံမှ သခင်နေဦးရဲ့ အစေဟို မခံနိန်၊ တဦးဟို မုန်းယွေ့ တဦးဟို ချစ်မယ်။ တဦးမှာ သစ္စာဆိယွေ့ တဦးဟို မလေးမခန့်ပြုမယ်။ နင်လို့ဟ ဘုရားသခင်ရဲ့ အစေနဲ့ လောကစည်းစိမ်ရဲ့ အစေဟို မခံနိန်ကြ” ဟု သွန်သင်အယ်။

ယေရှုရဲ့ နှုတ်တော်ထွက်စကားအချို့

(မဿဲ ၁၁.၁၂,၁၃; ၅.၃၁,၃၂; မာကု ၁၀.၁၁,၁၂)

ပိတ်ဆန်ဟို တပ်မက်သော ဖာရိရှဲလို့ဟ အေးစကားများဟို ကြားသောအခါ ကိုယ်တော်ဟို ကဲ့ရဲ့လှောင်ပြောင်ကြအယ်။ ယေရှုဟ အေးသူလို့အား၊ “နင်လို့ဟ လူလို့ဆေ့မှာ မိမိတတ်တိုင်း ဖြောင့်မတ်ကျောန်း ဖော်ပြတတ်သူများ ဖြစ်ကြအယ်၊ အဲလိုလဲ ဘုရားသခင်ဟ နင်လို့ရဲ့ စိတ်နေလုံးဟို သိဆိအယ်။ လူလို့ အမြတ်တနိုးထားသောအရာဟ ဘုရားသခင်ရဲ့ ဆေ့နှိုက် စက်ဆုပ်ဖွယ် ဖြစ်အယ်။ 2

“နှစ်ခြင်း ယောဟန် ပေါ်လာလဲ့အချိန်အထိ မောရှေရဲ့ ပညတ္တိကျမ်းနဲ့ ပရောဖက်ကျမ်းများ အာဏာတည်လျက်ဆိအယ်။ ယောဟန်ပေါ်ပင်းချိန်မှစယွေ့ ဘုရားသခင်ရဲ့ နိုင်ငံတော်အကျောန်း သတင်းကောင်းဟို ဟောလျက်ဆိယွေ့ လူများလို့ဟလည်း နိုင်ငံတော်ဟို အနိုင်အထက်နဲ့ ဝင်ကြအယ်။ 3အဲလိုလဲ ပညတ္တိကျမ်းမှ ကတစ်ချေးဆုံး အက္ခရာ စာလုံးတလုံး ပျက်စီးဖို့ထက် ခေါန်းခင်နဲ့ မြေကြီးဟ ပိုပင်းပျက်စီးလွယ်အယ်။ 4

“သူ့ပေါင်အိုမဟို ကွာဆှင်းယွေ့ အခြားသောမိန်းမနဲ့ ထိမ်းမြားစုံဖက်သောသူတိုင်းဟ အိုင်ထောင်ရေး ဖောက်ပြန်မှုဟို ကျူးလွန်အယ်။ ခင်ပွန်းဟ ကွာဆှင်းထားသော မိန်းမနဲ့ ထိမ်းမြားစုံဖက်သော ယောက်ျားဟလည်း အိုင်ထောင်ရေး ဖောက်ပြန်မှုဟို ကျူးလွန်အယ်။

သူဌေးနဲ့ လာဇရု

“တခါဟ သူဌေးတဦးဟ ဆေးအလွန်ကြီးသော ပိတ်ချောထည်များဟို ဝတ်ပင်း နေ့တိုင်း ဇိမ်ခံပင်း နေထိန်အယ်။ သူဌေးအိုင်ရဲ့ ထင်ခါးပေါက်တွင် လာဇရု နာမယ်ဆိသော ဆင်းရဲသားတယောက်ဟ အနာစိမ်းများပေါက်ယွေ့ တုံးလုံးလဲနေအယ်။ သူဟ သူဌေးရဲ့ စားပွဲမှကျသော စားကြွင်းစားကျန်များဟို စားချင်ယွေ့ စောင့်မျော်နေတတ်အယ်။ ခွေးလို့ဟ လာယွေ့ သူရဲ့ အနာစိမ်းများဟို ယက်ကြအယ်။ အေးဆင်းရဲသား သေဆုံးသွားသောအခါ ခေါန်းခင်တမန်လို့ဟ သူ့အား အာဗြဟံရဲ့ နဘေးတွင် ထိန်စေရန် သယ်ဆောင်သွားကြအယ်။ သူဌေးဟလည်း သေလွန်ယွေ့ သင်္ဂြိုဟ်ခြင်းဟို ခံရအယ်၊ မရဏာနိုင်ငံတွင် နာကျင်မှုဝေဒနာဟို ရမ်းဆာ့ခံရသဖြင့် မျော်ကျေ့လိုက်သောအခါ အာဗြဟံနဲ့အတူ သူ့ရဲ့ နဘေးတွင် လာဇရုဟို မျော်အယ်။5 သူဌေးဟ ခေါ်ယွေ့ ‘တို့ဖ အာဗြဟံ၊ ငါ့ဟို သနားပါအုံး။ ငါဟ ဟေမီးလျှံထဲတွင် ရမ်းဆာ့ ဝေဒနာခံစားရသောကျောန့်၊ လာဇရုဟ သူ့လက်ဖျားဟို ယေထဲနစ်ပင်း ငါ့လျှာဟို အေးစေဖို့ သူ့ဟို ငါ့ဆေဟို စေလွှတ်ပေးပါ’ ဟု အော်ယွေ့ ပြောလေအယ်။ အဲလိုလဲ အာဗြဟံဟ ‘ငါ့သား၊ နင်ဟ အသက်ဆှင်တုန်းခါဟ ကောင်းသောအရာများဟို ရဆိခဲ့ယွေ့ လာဇရုဟ မကောင်းသောအရာများဟို ရဆိခဲ့ကျောန်း သတိရလော့။ အဲလိုလဲ အခုမှာ သူဟ စိတ်သက်သာဟို ခံစားရယွေ့ နင်ဟ ရမ်းဆာ့ဝေဒနာဟို ခံစားနေရအယ်။ အဲပင်းရင် နင်နဲ့ ငါလို့စပ်ကြားတွင် ရမ်းဆာ့ နက်သောချောက်ကြီး တည်ဆိနေအယ်။ အေးလိုမို့ ဟေအရပ်မှ နင်လို့ဆိရာသို့ ကူးချင်သောသူ မကူးနိန်၊ နင်လို့ဆိရာအရပ်မှ အဲအရပ်ဟို ကူးချင်သောသူလည်း မကူးနိန်’ ဟု ဆိုအယ်။ သူဌေးဟ ‘တို့ဖ အေးလို့ဖြစ်ရင် လာဇရုဟို ငါလို့ အဖအိုင်ဟို စေလွှတ်ပေးရန် တောင်းပန်အယ်၊ ငါ့မှာ ညီ ငါးယောက်ဆိပါအယ်။ သူလို့ဟ ဟေလိုမျိုး ရမ်းဆာ့ ဝေဒနာခံစားရလဲ့ နေရာမျိုးဟို မရောက်လာဖို့တွက် သူလို့အား သတိပေးရန် လာဇရုဟို တို့ဖအိုင်ဟို စေလွှတ်ပေးမန့်’ ဟု တောင်းပန်အယ်။ အာဗြဟံဟ ‘နင့်ညီတွေဟို သတိပေးဖို့ မောရှေနဲ့ ပရောဖက်များ ဆိနေဝဲ့။ သူလို့ရဲ့ စကားဟို နားထောင်ကြမန့်စေ’ ဟု ပြောအယ်။ သူဌေးဟ အေးလောက်နဲ့ မရလောက်ဝူး။ ‘တို့ဖ အာဗြဟံ၊ အကယ်ယွေ့ သေဆုံးသွားပီးလဲ့ တစုံတယောက်ဟ ထမြောက်ပင်း သူလို့ဆေ သွားပြောရင် သူလို့ဟ နောင်တရကြမှာရီး’ ဟု ပြန်ပြောအယ်။ အာဗြဟံဟ ‘သူလို့ဟ မောရှေနဲ့ ပရောဖက်တွေရဲ့ စကားဟို နားမထောင်ရင် တစုံတယောက်ဟ သေခြင်းဟနေ ထမြောက်လာရင်လည်း ယုံကြည်နိန်မှာ ဟုတ်ဝူး’ ” ဟု ပြောအယ်။

Source notes (5)
  1. Cross-reference မ ၆.၂၄
  2. Cross-reference မ ၁၁.၁၂,၁၃
  3. Cross-reference မ ၅.၁၈
  4. Cross-reference မ ၅.၃၂; ၁ ကော ၇.၁၀,၁၁
  5. Footnote မရဏာနိုင်ငံ၊ သေလွန်သူများရဲ့ ကမ္ဘာ။

Danu: Danu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.