Skip to content
BibleKenya

Danu: Danu Bible

၁ ပေတရု 3

ဖိုးအိုများနဲ့ ပေါင်အိုမများ

1

အေးနည်းတူ ပေါင်အိုမလို့၊ နင်လို့ရဲ့ ဖိုးအိုများရဲ့ အုပ်စိုးခြင်းဟို နာခံကြလော့။ အေးလို့လုပ်ရင် တချို့ဖိုးအိုလို့ဟ နှုတ်ကပတ်တရားဟို မယုံကြည်ကြရင်တောင် နင်လို့ရဲ့ ကြောက်ရွံ့ရိုသေမှုနဲ့ သန့်ဆှင်းစင်ကြယ်သော အသက်ဆှင် နေထိန်မှုကို မျော်လျက် ပေါင်အိုမရဲ့ စကားအားဖြင့် မဟုတ်ဘဲ၊ အသက်ဆှင် နေထိန်မှုအားဖြင့် ပြောင်းလဲလာကြလိမ့်မယ်။ 2နင်လို့ရဲ့ တန်ဆာဆင်ခြင်းဟ ဆံပင်ကျစ်ခြင်း၊ ဆွေတန်ဆာဆင်ခြင်း၊ အဝတ်အစားများဖြင့် ဆင်ယင်ခြင်း ဟူသော အပြင်ပန်း တန်ဆာဆင်ခြင်း မဖြစ်စေဘဲ၊ နူးညံ့သိမ်မွေ့ယွေ့ တည်ငြိမ်လဲ့ စိတ်သဘောတည်းဟူသော ယိုယွင်းပျက်စီးခြင်းနဲ့ ကင်းလဲ့ စိတ်နေလုံးနဲ့ဆိုင်လဲ့ အတွင်းဝိညာဉ်လူရဲ့ တန်ဆာဆင်ခြင်း ဖြစ်စေကြလော့။ ဟေစာဟ ဘုရားသခင်ဆေ့နှိုက် ရမ်းဆာ့ အဖိုးထိုက်သောအရာ ဖြစ်အယ်။ မခင်ဟ ဘုရားသခင်ဟို မျော်လင့်အားထားသော သန့်ဆှင်းလဲ့ မိန်းမလို့ဟ မိမိလို့ရဲ့ ဖိုးအိုများရဲ့ စကားဟို နားထောင်ခြင်းဖြင့် လှပအောန် တန်ဆာဆင်ကြအယ်။ စာရာဟ အာဗြဟံဟို နာခံယွေ့ သူ့ဟို သခင်ဟု ခေါ်အယ်။ နင်လို့ဟလည်း ပစာဟိုမှ မကြောက်တော့ဘဲ ကောင်းသောအမှုများဟိုသာ လုပ်ရင် သူ့ရဲ့ လူပဲ့သငယ်များ ဖြစ်ကြအယ်။ 3

အေးနည်းတူ ဖိုးအိုလို့၊ ပေါင်အိုမလို့ဟ မိန်းမသားဖြစ်ပင်း နင်လို့ထက် အားနည်းသောသူ ဖြစ်ကျောန်း သိဆိနားလည်ယွေ့ အသက်နဲ့ဆိုင်သော ကျေးဇူးတော်ဟို အတူတကွ အမွေဆက်ခံသူအဖြစ် တန်ဖိုးထားလျက် အတူတကွ ပေါင်းသင်းနေထိန်ကြလော့။ ဟေဟာဟ နင်လို့ ဆုတောင်းချက်များဟို တားဆီးမခံရမဲ့အကျောန်း ဖြစ်အယ်။

မန်ရာဟိုလုပ်လဲ့အတွက် ခံရလဲ့ ဆင်းရဲဒုက္ခ

နောက်ဆုံးမှာ နင်လို့အားလုံး တစိတ်တသဘောတည်းဆိလျက် ကြင်နာတတ်သော သဘော၊ ညီအကိုချင်း ချစ်တတ်သော သဘော၊ သနားစုံမက်တတ်သော သဘောနဲ့ စိတ်နှိမ့်ချသော သဘော ဆိကြလော့။ နင်လို့ဟ ကောင်းချီးမင်္ဂလာဟို အမွေဆက်ခံရမဲ့အကျောန်း ခေါ်ယူခြင်းဟို ခံရတာ ဖြစ်ယွေ့ အဆိုးဟို အဆိုးဖြင့် လည်းကောင်း၊ ကဲ့ရဲ့ပစ်တင်ခြင်းဟို ကဲ့ရဲ့ပစ်တင်ခြင်းဖြင့် လည်းကောင်း မတုန့်ပြန်ဘဲ ကောင်းချီးဟိုသာ ပေးကြလော့။ အကျောန်းမှာ ကျမ်းစာနှိုက်

“အသက်ဆှင်ခြင်းဟို နှစ်သက်ယွေ့၊

ကောင်းသော နေ့ရက်လို့ဟို တွေ့မျော်လိုသောသူဟ

မိမိလျှာဟို ချုပ်တည်းယွေ့ မကောင်းသော စကားနဲ့ ကင်းလွတ်စေ၊

မိမိစလောင်ဟိုလည်း ချုပ်တည်းယွေ့ ဝါမပြောမိစေနဲ့။

မကောင်းသောအမှုဟို ဆှောင်ဆှားလျက် ကောင်းသောအမှုဟို လုပ်စေ၊

ငြိမ်သက်ခြင်းဟို ဆှာယွေ့ ၎င်းဟို ရဆိစေရန် ကြိုးစားစေ။

အကျောန်းမှာ သခင်ဘုရားဟ ဖြောင့်မတ်သောသူလို့ဟို ကျေ့ရှုယွေ့၊

သူလို့ရဲ့ ဆုတောင်းသံဟို နားထောင်အယ်။

အဲလိုလဲ မကောင်းသောအမှုဟို လုပ်သောသူဆေမှ သခင်ဘုရားဟ မျက်နှာလွဲအယ်” ဟု ဆိုအယ်။

နင်လို့ဟ ကောင်းသောအမှုနှိုက် စိတ်အားထက်သန်ရင် စသူဟ နင်လို့ဟို အန္တရာယ် ပြုမလုန်း။ 4အဲလိုလဲ ဖြောင့်မတ်ခြင်းကျောန့် ဆင်းရဲဒုက္ခ ခံရရင်တောင် နင်လို့ဟ မင်္ဂလာ ဆိအယ်။ သူလို့ရဲ့ ခြိမ်းခြောက်ခြင်းဟို မကြောက်ကြနဲ့၊ မစိုးရိမ်ကြနဲ့။ နင်လို့ရဲ့ စိတ်နေလုံးထဲနှိုက် ခရစ်တော်ဟို အဆှင်သခင် အဖြစ် ရိုသေကြလော့။ နင်လို့ နှိုက်ဆိလဲ့ မျှော်လင့်ခြင်းအကျောန်းနဲ့ ပတ်သက်ယွေ့ နင်လို့အား မေးသောသူ အားလုံးဟို ဖြေဆှင်း ပြောဆိုနိန်ရန် အမြဲတမ်း အဆင်သင့် ဆိကြလော့။ အဲလိုလဲ နူးညံ့ခြင်းနဲ့ ရိုသေခြင်းဟို ဆိကြလော့။ နင်လို့ဟ ကဲ့ရဲ့ခံရသောအခါ၊ ခရစ်တော်ရဲ့ နောက်လိုက်များ အဖြစ် နင့်ရဲ့ ကောင်းသောအကျင့်ကို မကောင်း ပြောသောသူလို့ဟ သူလို့ ပြောသော စကားအတွက် ဆှက်ကြစေရန် နင်လို့ စိတ်ဟို ကြည်လင်စေကြလော့။ အကျောန်းမှာ ဘုရားသခင် အလိုတော်ဆိရင် မကောင်းသောအမှုဟို လုပ်ယွေ့ ဆင်းရဲဒုက္ခ ခံရတာထက် ကောင်းလဲ့အမှုဟို လုပ်ယွေ့ ဆင်းရဲဒုက္ခခံရခြင်းဟ သာယွေ့ ကောင်းအယ်။ အကျောန်းမှာ ခရစ်တော်ဟ နင့်အား အပစ်များအတွက် တခါတည်း အသေခံ5ခဲ့အယ်။ နင်လို့ဟို ဘုရားသခင်ဆေဟို ပို့ဆောင်မဲ့အကျောန်း ဖြောင့်မတ်သောသူဟ မဖြောင့်မတ်သောသူလို့ ကိုယ်စား ဒုက္ခဝေဒနာဟို ခံစားစေအယ်။ ကိုယ်တော်ဟ ကိုယ်ကာယနှိုက် အမန်အသေခံသော်လည်း ဝိညာဉ်တော်နှိုက် အသက်ဆှင်အယ်။ ဝိညာဉ်တော်အားဖြင့် ကိုယ်တော်ဟ အကျဉ်းကျနေသော ဝိညာဉ်များဆေဟို သွားပင်း တရားဟောအယ်။ အဲဝိညာဉ်များဟ တချိန်ဟ နောဧလက်ထက်နှိုက် သင်္ဘောတည်ဆောက်စဉ်တွင် ဘုရားသခင်ဟ စိတ်ဆှည်စွာဖြင့် စောင့်ပေမဲ့လည်း နားထောင်ခြင်း မဆိခဲ့သော ဝိညာဉ်များ ဖြစ်ကြအယ်။ အေးသင်္ဘောထဲနှိုက် ဆှစ်ယောက်မျှဖြစ်သော လူကတစ်လို့သာ ယေမှတဆင့် ကယ်တင်ခြင်း ခံရကြအယ်။ အေးအရာဟ အခု နင်လို့ဟို ကယ်တင်သော နှစ်ခြင်းဟို ပုံဆောင်အယ်။ နှစ်ခြင်းဟ ကိုယ်ကာယရဲ့ အညစ်အကြေးဟို ချွတ်ပယ်ခြင်း မဟုတ်ဘဲ ယေရှု ခရစ်တော်ရဲ့ ဆှင်ပြန်ထမြောက်ခြင်းအားဖြင့် ကောင်းသော အသိစိတ်ဟို ဘုရားသခင်ဆေ တောင်းဆှောက်ခြင်း ဖြစ်အယ်။ အေးသခင်ဟ ခေါင်းခင်ဘုံဟို ကြွယွေ့ ခေါန်းခင်တမန်များ၊ အာဏာစက်များနဲ့ တန်ခိုးလို့ဟို မိမိလက်အောက်နှိုက် ချထားလျက် ဘုရားသခင်ရဲ့ လက်ယာဘက်နှိုက် ဆိနေအယ်။

Source notes (5)
  1. Cross-reference ဧ ၅.၂၂; ကော ၃.၁၈
  2. Cross-reference ၁ တိ ၂.၉
  3. Cross-reference ဧ ၅.၂၅; ကော ၃.၁၉
  4. Cross-reference မ ၅.၁၀
  5. Footnote အသေခံ၊ ရမ်းဆာ့သော လက်ရေးမူကျမ်းတွင် ဆင်းရဲဒုက္ခ၊ ဟု ပါဆိအယ်။

Danu: Danu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.